Read tshiluba Nehemiya 13 Bible Online

Nehemiya 13 - tshiluba bible

Nehemiya 13

¹Mu dituku adi bakabala mu mukanda wa Mose mu matshu a bantu. Bakasangana bualu ebu bufunda ne, Muena Amona ne Muena Moaba kababuedi mu disangisha dia bantu ba Nzambi tshiendelele,

²bualu bua bobo kabakaya kusangakena ne Bena Isalele ne bidia ne mai; kadi bakaha Belâma mbueshilu bua kubeleye mulau; kadi Nzambi wetu wakakudimuna mulau bua kuluau disanka.

³Hakunvuabo mikenji, Bena Isalele bakadilamununa kudi bantu ba hatuhu.

⁴Ku mpala kua bualu ebu Eleyashiba muakuidi, wakasungulabo ku mutu kua nsubu mukuabo wa mu nsubu wa Nzambi wetu, wakadi mulamatangane ne Tobiya,

⁵wakamulongoluela nsubu munene, muakadibo bateka milambu ya bukula ne manananshi ne malonga ne tshia dikumi tshia blé ne nyinyo mihia-mihia ne manyi biakahabo Bena Lewi ne bimbi ba misambu ne batuadi diambedi, ne milambu ya kukuha bua bakuidi, bu muakadi mukenji,

⁶Kadi mu tshikondo atshi tahionso meme tshiakadi mu Yelushalema; mu tshidimu tshia makumi asatu ne bibidi tshia bukelenge bua Atashasete, mukelenge wa Babulona, nakaya kudi mukelenge. Hakahita matuku makuabo, nakebesha mukelenge bua luendu luanyi;

⁷nakalua ku Yelushalema, nakunvua bualu bubi buakenza Eleyashiba bua Tobiya bua kumulongolueleye nsubu mu biendedi bia nsubu wa Nzambi.

⁸Bualu ebu buakatamba kunyingalasha mutshima wanyi; nunku nakumusha bintu bionso bia Tobiya mu nsubu.

⁹Hashishe nakela mukenji, bakalengesha nsubu; nakahingashamu malonga a mu nsubu wa Nzambi ne milambu ya bukula ne manananshi.

¹⁰Nakajingulula kabidi ne Bena Lewi kabakadi bangata bintu biabo; nunku Bena Lewi ne bimbi ba misambu, bakadi benza mudimu, bawahingana muntu ne muntu mu budimi buandi.

¹¹Hashishe nakatandangana ne bakokeshi, nakabebesha ne, Nsubu wa Nzambi udi muledibue hua tshinyi? Nakabasangisha bohamue, nakabateka mu miaba yabo.

¹²Hashishe Bena Yuda bonso bakalua ne tshia dikumi tshia blé ne tshia nyinyo mihia-mihia ne tshia manyi mu nsubu ya bibutshilu.

¹³Nakasungula balami ba mutu ha bibutshilu: Shelemeya muakuidi ne Sadoka mufundi ne Pedaya, umue wa Bena Lewi, ne Hanana, muana wa Zakû, muana wa Matanaya, wakadi nʼabo kabidi, bualu bua bobo bakadi babadibue ne mbadi beyemenyibue; bakadi ne mudimu wa kuabanyina bana babo bintu.

¹⁴Nzambi wanyi, unvuluke mu bualu ebu; kujimishi bienzedi bianyi bimpe binakenza bua nsubu wa Nzambi wanyi bua mudimu wandi ku mesu kuebe.

¹⁵Mu matuku au nakatangila Bena Yuda bakuabo bakame tumuma tua nvinyo dituku dia lumingu, basuike bisumbu bia blé, babiteke ha nyima ha nyama ya mpunda; bakadi balua ne nyinyo ne tumuma tukese ne nfigi ne bintu bikuabo ku Yelushalema dituku dia lumingu; meme nakabadimusha mu dituku diakadibo bahana bintu.

¹⁶Bena Tulo bakuabo bakadiku, bakalua ne minyinyi ya mu mai ne bintu bionso, bakabibanyisha kudi Bena Yuda mu Yelushalema dituku dia lumingu.

¹⁷Hashishe nakatandangana ne bantu banene ba mu Yuda, nakabebesha ne, Nudi nuenza bualu ebu bubi bua kunyanga dituku dia lumingu bua tshinyi?

¹⁸Bankambua benu kabakenza nunku, anyi? Nzambi wetu kakatukengesha ne musoko eu bua bualu ebu, anyi? Kadi nuenu nudi nutamba kumuenesha tshiji kudi Bena Isalele hanuanyanga dituku dia lumingu.

¹⁹Nunku diambedi diba kadiyi dianze kubuela dituku dia lumingu, nakela mukenji bua kuimbilabo bibi, kababiunzuludi tô ne hahita dituku dia lumingu; nakateka bena mudimu banyi bakuabo ku bibi, kabitabushi bua muntu abuele ne bujitu dituku dia lumingu.

²⁰Nunku bendi ba mushinga ne bahanyishanganyi ba bintu bakalala ne bintu biabo ku mbelu kua Yelushalema nansha musangu umue nansha ibidi.

²¹Hashishe nakabadimusha, nakabakonka ne, Nudi nulala ku mbelu kua musoko bua tshinyi? Binuenza nunku kabidi meme nennukuate. Ku tshikondo atshi kabakalua dituku dia lumingu kabidi.

²²Nakelela Bena Lewi mukenji bua kudilengeshabo ne bua bobo balame ku bibi, bajidile dituku dia lumingu. Nzambi wanyi, unvuluke bua bualu ebu kabidi, unfuile luse bu mudi bunene bua dinanga diebe.

²³Mu matuku au kabidi nakamona ne Bena Yuda bakadi babake bakashi ba Bena Ashedodo ne Bena Amona ne Bena Moaba;

²⁴bana babo baledibue bakakula tshituha tshia muaku wa Bena Ashedodo, kabakamanya mua kuakula muaku wa Bena Yuda, kadi bakakula miaku ya bantu ne ya bantu.

²⁵Nunku nakatanda nʼabo, nakabela mulau, nakabakuma, nakatua nsuki yabo, nakabatshihisha kudi Nzambi ne, Kanufidi bana benu bakashi kudi bana babo balume, kanuangatshidi bana benu balume bakashi kudibo, kanudiangatshidibo nuenu kabidi.

²⁶Solomo, mukelenge wa Bena Isalele, kakenza bibi mu malu â, anyi? Kadi munkatshi mua bisamba bia bungi bia bantu kamuakadi muikale mukelenge bu yeye, wakadi munangibue kudi Nzambi wandi, ne Nzambi wakamuvuisha mukelenge ku mutu kua Bena Isalele bonso; kadi bakashi ba bende bakamuenzesha yeye mene malu mabi.

²⁷Tuetu netununvuile bua nuenu nuenze bualu ebu bubi bunene buonso ku mesu kua Nzambi wetu bua kubaka bakashi ba bende, anyi?

²⁸Umue wa bana balume ba Yoyada, muana wa Eleyashiba muakuidi munene, wakadi muku wa Sanebalata, Muena Holona; nunku nakamuihata ku mesu kuanyi.

²⁹Nzambi wanyi, ubavuluke bualu bua bobo bakanyanga buakuidi ne tshihungidi tshia buakuidi ne tshia Bena Lewi.

³⁰Nunku nakabalengesha kudi bantu ba bende bonso, nakasungila bakuidi ne Bena Lewi midimu yabo, muntu ne muntu mu mudimu wandi,

³¹ne bua milambu ya nkunyi, ku misangu yakasungulabo, bua mamuma a diambedi. Nzambi wanyi, unvuluke bua kungenzela bimpe.