Read tshiluba Esetê 3 Bible Online

Esetê 3 - tshiluba bible

Esetê 3

¹Ku nyima kua malu a mukelenge Ahashawelosha wakabandisha Hamana, muana wa Hamedata, Muena Agaga, wakamuteka ku mutu kua bantu banene bonso bakadi nʼandi.

²Bena mudimu ba mukelenge bonso bakadi ku tshibi tshia mukelenge bakatua binu hanshi, bakakukuila Hamana; bualu bua mukelenge wakela mukenji nunku bua bualu buandi. Kadi Môdekai kakatua binu hanshi, kakamukuila.

³Hashishe bena mudimu ba mukelenge bakadi bashikame ku tshibi tshia mukelenge bakebesha Môdekai ne, Wewe udi ushiha mukenji wa mukelenge bua tshinyi?

⁴Hakadibo bamukonka nunku ku dituku ku dituku ne hakadiye kayi mubunvuile, bakambila Hamana bua kutangilabo ne malu a Môdekai neajalame. Bualu bua yeye wakabambila ne, Meme ndi Muena Yuda.

⁵Hakamanya Hamana ne, Môdekai kena utua binu hanshi, kena unkukuila, yeye wakûlangana ne tshiji tshikole.

⁶Hakelanganeye meji, yeye wakabenga kukuata Môdekai nkayandi, bualu bua bakamumanyisha bua tshisamba tshia Môdekai; nunku Hamana wakakeba bua kushiheye Bena Yuda bonso bakadi mu bukelenge bua Ahashawelosha, ba mu tshisamba tshia Môdekai mene.

⁷Mu ngondo wa kumudilu, ngondo wa Nisana mene, mu tshidimu tshia dikumi ne bibidi tshia bukelenge bua mukelenge Ahashawelosha bakadi bela Pû, eu nnshobo mene, ku mesu kua Hamana ku dituku ku dituku ne ku ngondo ku ngondo tô ne ku ngondo wa dikumi ne ibidi udi ngondo wa Ada mene.

⁸Hamana wakambila mukelenge Ahashawelosha ne, Kudi bantu bakuabo bakamuangalaka munkatshi mua bantu ba mu nseke yonso ya bukelenge buebe; mikenji yabo idi mitahuluke ku ya bantu bonso; kabena batumikila mikenji ya mukelenge; nunku kambimpe bua mukelenge abitabushe.

⁹Nunku biasua mukelenge, bafunde mukanda bua babutudibue; hashishe meme nenfile ntalanta[2] ya argent binunu dikumi mu bianza bia bantu badi benzela mukelenge mudimu eu, balue nʼai mu tshibutshilu tshia mukelenge.

¹⁰Mukelenge wakakohola kakanu ka ku munu wandi, wakakafila kudi Hamana, muana wa Hamedata, Muena Agaga, muena lukuna wa Bena Yuda.

¹¹Mukelenge wakambila Hamana ne, Bakakuha argent, ne bantu kabidi; enza nʼabi bu mudi umona ne mbimpe.

¹²Hashishe bakabikila bafundi ba mukelenge mu ngondo wa kumudilu mu dituku dia dikumi ne asatu dia ngondo; bakafundila miloho ya mukelenge ne ba-gouverneur ba ku nseke yonso ne bantu banene bakadi ku mutu kua bantu bonso, bantu mu muaku wabo bantu mu muaku wabo, bu muakamba Hamana; bakafunda malu â mu dina dia mukelenge Ahashawelosha, bakatekahu tshimanyinu tshia ku kakanu ka mukelenge.

¹³Bakatuma mikanda ei mu bianza bia bantu ku nseke yonso ya mukelenge bua kushihabo ne bua kubutulabo Bena Yuda bonso ne batekete ne banunu ne bana bakese ne bakashi dituku dimue, mu dituku dia dikumi ne asatu dia ngondo wa dikumi ne ibidi, ngondo wa Adâ mene, ne bua kuhaulabo bintu biabo bionso.

¹⁴Bakatuma mikanda ei ku nseke yonso, bakamanyisha bantu bonso bua bikale bamane kudilongolola bua dituku adi.

¹⁵Bena mikanda bakaya lubilu bua mukenji wa mukelenge, ne mukenji wakaledibua mu nsubu wa mukelenge wa mu Shushana. Mukelenge ne Hamana bakashikama bua kunuabo nvinyo, kadi bonso ba mu musoko wa Shushana bakadi bakema.