Read tshiluba Esetê 4 Bible Online

Esetê 4 - tshiluba bible

Esetê 4

¹Hakamanya Môdekai malu onso akenzabo, Môdekai wakadihanda bilulu biandi, wakadiluatshisha bilulu bikayabala, wakadiela butue hamʼbidi, wakaya munkatshi mua musoko, wenda, udila bikole;

²wakalua ku mpala kua tshibi tshia mukelenge, bualu bua muntu kakamanya mua kubuela mu tshibi tshia mukelenge muluate bilulu bikayabala.

³Mu nseke yonso yakaya mukenji wa mukelenge ne dî diandi, muadi munene wakadi munkatshi mua Bena Yuda, bakajila bia kudia, bakasa muadi, bakadila, ba bungi bakaluata bilulu bikayabala, bakadiela butue hamʼbidi.

⁴Bena mudimu bakashi ba Esetê ne bantu bandi batungula bakalua kudiye, bakamuambila bualu ebu; mukelenge mukashi wakatamba kunyingalasha mutshima wandi; yeye wakatuma bilulu bua Môdekai aluate, ne bua kumusheye bilulu biandi bikayabala; kadi yeye kakabiangata.

⁵Hashishe Esetê wakabikila Hataka, umue wa bantu batungula ba mukelenge wakasunguleye bua kumukuatshileye mudimu, wakamutuma kudi Môdekai bua kujingululeye ne, Buakadi tshinyi ne buakadi bualu kai.

⁶Nunku Hataka wakaya kudi Môdekai mu muaba mubaluluke wakadi ku mpala kua tshibi tshia mukelenge.

⁷Môdekai wakamuambila malu onso akadi mamukuate ne bungi bua argent mene yakalaya Hamana balami ba bintu bia mukelenge bua kubutuleye Bena Yuda.

⁸Wakamuha kabidi umue wa mikanda yakafundabo mu Shushana wakadi ne mukenji wa kubabutula mufundamu, bua kûlesheye Esetê; wakamuambila dî diandi kabidi bua kuyeye kudi mukelenge bua kumuakuila ne bua kuakuileye bantu bandi ku mesu kuandi.

⁹Hataka wakalua, wakambila Esetê mei a Môdekai.

¹⁰Hashishe Esetê wakambila Hataka, wakamuha mukenji wa kuyeye nʼau kudi Môdekai ne,

¹¹Bena mudimu bonso ba mukelenge ne bantu ba mu bukelenge buandi badi bamanye ne, Muntu yonso, ne mulume ne mukashi, wabuela mu tshiendedi tshia munda mua nsubu wa mukelenge, udi kayi mubikidibue kudi mukelenge, mukenji umue udi kudiye bua kumushiheye, anu muntu yonso udi mukelenge wolola dikombo dia or kudiye bua yeye ashale ne muoyo; kadi kabakambikila bua kubuela kudi mukelenge tô matuku â makumi asatu.

¹²Bakambila Môdekai mei a Esetê.

¹³Hashishe Môdekai wakabahingisha ne dî kudi Esetê ne, Kuedi meji ne. Wewe neuhanduke munkatshi mua Bena Yuda bonso bualu bua udi mu nsubu wa mukelenge,

¹⁴bualu bua biwahuwa biebe ku tshikondo etshi, dikuatshisha ne luhandu nebimueneke kudi Bena Yuda bifume ku muaba mukuabo, kadi wewe ne ba mu nsubu wa tatu webe nenufue; nganyi udi mumanye ne, Wewe wakabuela mu bukelenge anu bua tshikondo etshi mene?

¹⁵Hashishe Esetê wakabahingisha kudi Môdekai ne dî edi ne,

¹⁶Ya biebe, usangishe Bena Yuda bonso badi mu Shushana, bajile bia kudia bualu buanyi matuku asatu; kabadi tshintu, kabanu tshintu tô matuku â asatu butuku ne munya; meme ne bena mudimu banyi bakashi netujile bia kudia diatshimue; hashishe nenye kudi mukelenge bu mudi kamuyi mu mikenji; binafua, nenfue.

¹⁷Nunku Môdekai wakaya, Wakenza malu onso akamuambila Esetê.