Read tshiluba Ekesode 10 Bible Online

Ekesode 10 - tshiluba bible

Ekesode 10

¹Yehowa wakambila Mose ne, Ya biebe kudi Palô, bualu bua nakakolesha mutshima wandi ne mitshima ya bantu bandi bua kulesha bimanyinu bianyi munkatshi muabo.

²Wewe newambile muan ebe wa balume mu matshu, ne muana wa muanʼebe wa balume, malu anakuenza mu buloba bua Ejipitu, ne bimanyinu bianyi binakuenza munkatshi muabo, bua nuenu numanye ne, Meme ndi Yehowa.

³Mose ne Alona bakaya kudi Palô, bakamuambila ne, Yehowa, Nzambi wa Bena Ebelu, udi Wamba ne. Wewe neuhidie kudihuekesha ku mesu kuanyi musangu bule munyi? Ulekele bantu banyi baye kuntendelela.

⁴Biwahidia kulekela bantu hanyi, makelela nentumine mikumbi mu buloba buebe,

⁵neyikale ha mutu ha buloba buonso, kabena mua kutangila buloba, yoyo neyidie bintu biakushala ku mabue a nvula, nenudie mitshi yenu yonso idi idiunda mu budimi.

⁶Neyule nsubu yebe tente ne nsubu ya bantu bebe ne nsubu ya Bena Ejipitu bonso, nansha batatu benu nansha bankambua benu kabakatangila bualu ebu katshia babuela mu buloba ebu to ne katataka Mose wakanyunguluka, wakaluhuka kudi Palô.

⁷Bantu ba Palô bakamukonka ne, Muntu eu neikale buteyi kutudi musangu bule munyi? Ulekele bantu baye kutendelela Yehowa Nzambi wabo, wewe kuena mumanye ne, Buloba bua Ejipitu buakushihibua, anyi?

⁸Bakalua ne Mose ne Alona kudi Palo, ne yeye wakabambila ne, Yai bienu nutendelele Yehowa Nzambi wenu kadi badi bamba kuya mbanganyi?

⁹Mose wakamba ne, Netuye ne bana bakese ne bantu banunu, ne bana betu ba balume ne bana betu ba bakashi, netuye ne mikoko yetu ne ngombe yetu, bualu bua tudi ne bualu bua kudia bidia ku mesu kua Yehowa.

¹⁰Yeye wakabambila ne, Yehowa ashale nʼenu binanulekela ne bana benu bakese, bualu bua bualu bubi budi munda muenu.

¹¹Nansha, nuenu bantu balume nudi mua kuya kutendelela Yehowa, bualu bua nudi basue kuenza nunku. Bakabihata ku mesu kua Palô.

¹²Yehowa wakambila Mose ne, Olola tshianza tshiebe ha buloba bua Ejipitu, bua kutuala mikumbi mu buloba bua Ejipitu, neyidie bintu bionso biakashala ku mabue a nvula.

¹³Mose wakolola mula ngala wandi ha buloba bua Ejipitu, ne Yehowa wakatuma luhehele luaku esete dituku adi to ne hakatshia butuku, ne dinda luhehele lua ku esete luakatuma mikumbi.

¹⁴Mikumbi yakamuangalaka buloba bua Ejipitu buonso, yakatamba bungi, kakuakadi mikumbi bu ei diambedi, ne mikuabo bu ei kayena ilua kabidi.

¹⁵Yakabuikila buloba buonso, to ne hakalua buloba midima, yakadia midioko yonso ya mu madimi ne mamuma onso a ku mitshi, biakashala ku mabue a nvula, nansha tshintu tshikese nansha midioko nansha mutshi biakashala mu buloba bua Ejipitu buonso.

¹⁶Hashishe Palô wakabikila Mose ne Alona lubilu, wakamba ne, Nakuenzela Yehowa Nzambi wenu bualu bubi ne nuenu kabidi.

¹⁷Nundekelele bubi buanyi anu musangu eu, nundombele Yehowa Nzambi wenu, yeye angumushile bualu ebu bua lufu.

¹⁸Yeye wakaluhuka kudi Palo, wakalomba Yehowa.

¹⁹Yehowa wakatuma luhehele lukole lua ku wesete, bakabandisha mikumbi, luakayihata mu Dishiba Dikunze, nansha mukumbi umue wakashala mu buloba bua Ejipitu.

²⁰Kadi Yehowa wakakolesha mutshima wa Palô, yeye kakalekela Bena Isalele.

²¹Yehowa wakambila Mose ne, Olola tshianza tshiebe mulu, midima ikale mu buloba bua Ejipitu, bantu babubute mu midima.

²²Mose wakolola tshianza tshiandi mulu ne midima mikole be yakadi mu buloba bua Ejipitu to matuku asatu.

²³Ka bakamanya mua kutangilangana, nansha muntu wakumuka mu muaba wandi tô matuku asatu, kadi munya wakadi mu nsubu ya Bena Isalele bonso.

²⁴Palô wakabikila Mose, wakamuambila ne, Yai bienu nutendelele Yehowa, shiyai anu mikoko ne ngombe, bana benu bakese baye nʼenu.

²⁵Mose wakamba ne, Bualu buakukukuata bua kufila nyama mu bianza bietu ya kuoshila Nzambi, tudi basue kuyishihela Yehowa Nzambi wetu.

²⁶Netuye ne bimuna bietu kabidi, katuena dishiya nansha mukoko umue ku nyima, bualu bua didi ne bualu bua kutendelela Yehowa Nzambi wetu ne nyama ei; katuena bamanye bintu bidi Yehowa musue anu bakafikaku.

²⁷Kadi Yehowa wa kakolesha mutshima wa Palo, yeye kakabalekela.

²⁸Palô wakambila Mose ne, Umuka kundi, udimuke biebe, kuntangidi kabidi, mu dituku diudi utangila mpala wanyi wewe neufue.

²⁹Mose wakamba ne, Wewe wakuamba bimpe, tshiena utangila mpala webe kabidi.