Read tshiluba Ekesode 14 Bible Online

Ekesode 14 - tshiluba bible

Ekesode 14

¹Yehowa wakambila Mose ne,

²Wambile Bena Isalele ne, Nuhingane, Shikamai ku mpala kua Pi-hahilota, hankatshi ha Migedola ne mai manene, ku mpala kua Bâla-sefona, Shikamai bienu ku mpala kua muaba eu hehi ne mai manene.

³Palô neambe bua Bena Isalele ne, Bakuhambuka mu nshila, tshihela tshiakubahumbisha.

⁴Meme nenkoleshe mutshima wa Palô, yeye neabalonde, nempete butumbi kudi Palô ne kudi bisumbu biandi bionso, Bena Ejipitu nebamanye ne, Meme ndi Yehowa Bakenza nunku.

⁵Lumu bakafika kudi mukelenge wa Ejipitu ne, Bantu bakanyema Palô ne bantu bandi bakakudimuna mitshima yabo, bakamba ne, Tuakenza tshinyi hatuakalekela Bena Isalele ku mudimu wetu?

⁶Yeye wakalongolola dikalu diandi, wakaya ne bantu bandi.

⁷Wakangata makalu nkama isambombo masungula, ne makalu onso makuabo a mu Ejipitu ne tuhita tua makalu onso.

⁸Yehowa wakakolesha mutshima wa Palô, mukelenge wa Ejipitu, yeye wakalonda Bena Isalele, bualu bua Bena Isalele bakahatuka ne tshianza tshikole.

⁹Bena Ejipitu bakabalonda ne tubalu dionso ne makalu onso bia Palô Masalayi andi ne bantu ba ha nyima ha tubalu bakabaheta hakadibo bashikama hehi ne mai manene, hehi ne Pi-hahilota ku mpala kua Bâla-sefona.

¹⁰Hakalua Palo ha buihi, Bena Isalele bakabandisha mesu abo, bakamona Bena Ejipitu babalonda ku nyima, bakatamba kutshina, Bena Isalele bakadila kudi Yehowa.

¹¹Bakambila Mose ne, Bualu bua kakuakadi nkita mu Ejipitu, wewe wakulua nʼetu bua tuetu kubala mu tshihela, anyi? Wakutuenzela nunku tshinyi, bua kutuhatula mu Ejipitu?

¹²Edi kadiena di dituakukuambila mu Ejipitu ne, Utulekele bua tukuatshile Bena Ejipitu mudimu, anyi? Bua kukuatshila Bena Ejipitu mudimu budi butamba bua kufua mu tshihela buimpe.

¹³Mose wakambila bantu ne, Kanutshinyi, imanai, numone luhandu lua Yehowa lualueye kunuha lelu, bua Bena Ejipitu banuakumona lelu kanuena nubamona kabidi tshiendelele.

¹⁴Yehowa neanuluile nvita yenu, nenuikale holâ.

¹⁵Yehowa wakambila Mose ne, Udi udidila kundi tshinyi? Ambila Bena Isalele ne, Baye ku mpala.

¹⁶Wewe ubishe mujangala webe, wolola tshianza tshiebe ha mai, wahandulule, Bena Isalele nebaye munkatshi mua mai ha buloba bûme.

¹⁷Ne tangila, meme nenkoleshe mitshima ya Bena Ejipitu, nebayemu ku nyima kua Bena Isalele, nengangate butumbi bualu bua Palô ne bisumbu biandi bionso ne makalu andi ne masalayi andi adi enda ha tubalu.

¹⁸Bena Ejipitu nebamanye ne, Meme ndi Yehowa, hanakuangata butumbi buanyi bualu bua Palô ne makalu andi ne masalayi andi adi enda ha tubalu.

¹⁹Muanjelo wa Nzambi, wakadi wenda ku mpala kua Bena Isalele, wakumukaku, wakaya ku nyima kuabo, ne difutu diakumuka ku mpala kuabo kabidi, diakimana ku nyima kuabo.

²⁰Difutu diakadi hankatshi ha Bena Ejipitu ne Bena Isalele, difutu ne midima biakadiku kadi diakadi ne dinkenke butuku Kabikadianganyi ha buihi to butuku buonso.

²¹Mose wakolola tshianza tshiandi ha mai, ne Yehowa wakatuma luhehele lukole lua ku esete, wakahingasha mai butuku abu buonso, buloba bûme buakamueneka kuakadi mai, mai akahanduluka.

²²Bena Isalele bakaya mu bunene bua mai ha buloba bûme, mai akadi bu tshinunu kudibo ku tshianza tshia balume ne ku tshianza tshia bakashi.

²³Bena Ejipitu bakamba kubihata, bakabalonda ku nyima kuabo mu bunene bua mai, tubalu tua Palô bionso ne makalu andi onso ne masalayi andi onso akadi enda ha tubalu.

²⁴Hakatshia butuku, Yehowa wakatangila bisumbu bia Bena Ejipitu mu ditutu diakadi ne dinkenke dia kahia, wakabatshinyisha.

²⁵Wakakanga nkata ya makalu, kabakamanya mua kuya bimpe, Bena Ejipitu bakamba ne, Tunyeme bietu ku mesu kua Bena Isalele, bualu bua Yehowa udi ubaluila nvita yabo, udi uluangana ne Bena Ejipitu.

²⁶Yehowa wakambila Mose ne, Olola tshianza tshiebe ha mai, mai ahingane kabidi ha mutu ha Bena Ejipitu ne ha makalu abo ne ha masalayi abo adi enda ha tubalu.

²⁷Mose wakolola tshianza tshiandi ha mai, ne hakatshia butuku mai akahingana kabidi ne bukole buau, Bena Ejipitu bakanyema ne Yehowa wakahita Bena Ejipitu bukole mu bunene bua mai.

²⁸Mai akahingana, akabanda ha mutu ha makalu ne ha mutu ha masalayi akadi enda ha tubalu, ha mutu ha bisumbu bionso bia Palô, biakabalonda mu bunene bua mai, nansha umue wabo wakahandika.

²⁹Kadi Bena Isalele bakenda mu buloba bûme munkatshi mua mai, mai akadi bu tshimanu kudibo ku tshianza tshia balume ne ku tshianza tshia bakashi.

³⁰Nunku Yehowa wakasungila Bena Isalele mu bianza bia Bena Ejipitu dituku adi Bena Isalele bakatangila Bena Ejipitu bafue kukala kua mai manene.

³¹Bena Isalele bakatangila bualu bukole buakenzela Yehowa Bena Ejipitu, ne bantu bonso bakatshina Yehowa, bakeyemena Yehowa ne muntu wandi Mose.