Read tshiluba Ekesode 15 Bible Online

Ekesode 15 - tshiluba bible

Ekesode 15

¹Mose ne Bena Isalele balambila Yehowa musambu eu, bakamba ne, Nengimbile Yehowa musambu, bualu bua yeye wakatamba bukole ne butumbi buandi. Yeye wakela kabalu ne muntu wakadi wenda ha nyima haku mu bunene bua mai manene.

²Yehowa udi bukole buanyi ne musambu wanyi, yeye wakulua luhandu luanyi, Yeye udi Nzambi wanyi, nemmutumbishe, udi Nzambi wa tatuʼanyi, nemmunemeke.

³Yehowa udi muena nvita, Yehowa ndina diandi.

⁴Wakela makalu a Palô ne bisumbu biandi bionso mu mai manene, wakashiha tuhita tuakasunguleye mu Dishiba Dikunze.

⁵Mai adi ha mutu habo, bakadina mu mai a dijimba bu dibue.

⁶Yehowa, tshianza tshiebe tshia balume tshidi ne butumbi ne bukole, Yehowa, tshianza tshiebe tshia balume tshidi tshisunsula bantu badi nʼetu lukuna.

⁷Mu bunene bua buakane buebe, wewe utu wahita bantu bukole badi badilesha ku mesu kuebe, wewe udi ubatumina tshiji tshiebe, tshidi tshibosha bu bilu.

⁸Muhuya webe wakabandisha mai, akimana bu tshimama, mai akimana dibula. Mai manene akakuatakana mu ndondo wa mai.

⁹Muena lukuna wakamba ne, Nembalonde, nembahete, nentahulule bintu bionso bidi bishala, mutshima wanyi neusanke bualu buabo, nempatule muele wanyi wa nvita, nembashihe ne tshianza tshianyi.

¹⁰Wewe wakatuma luhehele luebe, ne mai manene akababuikila, bakadma bu mabue mu mai manene.

¹¹Nganyi udi bu wewe Yehowa, munkatshi mua nzambi mikuabo? Nganyi udi bu wewe, udi ne butumbi bua tshijila, udi utshinyisha bantu ne bienzedi bia butumbi, udi wenza malu a kukema?

¹²Wewe wakolola tshianza tshiebe ne buloba buakabanda.

¹³Mu luse luebe wewe wakalombela bantu bawakuhikula, wewe wakabenzesha mu bukole buebe to ne ku muaba webe wa tshijila.

¹⁴Bantu bakunvua lumu, bakutshina, mikemu yakukuata Bena Peleshete.

¹⁵Bakelenge ba Edome bakukema, balume bakole ba Moaba badi bazakala, bantu bonso ba mu buloba bua Kanana bakujimina.

¹⁶Buowa ne ditshina biakubakuata, bualu bua bukole bua diboko diebe bobo badi bashikama holâ bu mabue, to ne hasabuka bantu bebe, Yehowa, tô ne hasabuka bantu bawakahikula.

¹⁷Wewe neulue nʼabo, neubateke mu mukuna wa buhianyi buebe, muaba uwakusungula, Yehowa, ne, Nenshikamemu, muaba wa tshijila, uwakajadika ne bianza biebe.

¹⁸Yehowa neakokeshe bantu tshiendelele.

¹⁹Bualu bua tubalu tua Palo ne makalu andi ne masalayi akadi enda ha nyima ha tubalu biakaya mu mai manene ne Yehowa wakahingasha mai ha mutu habo, kadi Bena Isalele bakenda ha buloba bûme munkatshi mua mai manene.

²⁰Mîyama, muprofete mukashi, muanʼabo mukashi ne Alona, wakangata tshisanji mu tshianza tshiandi, ne bakashi bonso bakamulonda ne bisanji, benda batuhika.

²¹Mîyama wakabambila ne, Nuimbile Yehowa musambu, bualu bua yeye wakatamba bukole ne butumbi buandi, wakela kabalu ne muntu wakadi wenda ha nyima haku mu bunene bua mai manene.

²²Mose wakalombela bantu bua kuyabo ku mpala bumuke ku Dishiba Dikunze, bakaya mu tshihela tshia Shû bakaya mu tshihela matuku asatu, kabakasangana mai.

²³Hakaluabo ku Mala kabakamanya mua kunua mai a Mala, mai akadi ne bululu, nunku balodiha muaba au ne, Mala.

²⁴Bantu baka tontolola Mose ne, Netunue tshinyi?

²⁵Yeye wakadila kudi Yehowa, ne Yehowa wakamulesha mu tshi, wakawela mu mai, mai akalua mimpe. Yehowa wakela nʼabo tshifufu, wakabateta,

²⁶wakabambila ne, Binuatumikila di dia Yehowa Nzambi wenu, binuenza malu adi mimpe ku mesu kuandi, ne binuateleja matshu kudi mikenji yandi, binuenza mei andi onso, tshiena nnutumina nansha disama dimue dinakatumina Bena Ejipitu, bualu bua meme ndi Yehowa udi unuondaha.

²⁷Bakalua ku Elima kuakadi mpokolo ya mai dikumi ne ibidi, ne mabue makumi muanda mutekete bakashikamaku hehi ne mai.