Read tshiluba Ekesode 27 Bible Online

Ekesode 27 - tshiluba bible

Ekesode 27

¹Enza biebe tshioshelu tshia mabaya a acacia, buludi bua tshi nebuikale coudées[8] itanu, butshiama buatshi coudées itanu ne bule buatshi bua mulu coudées isatu.

²Enza bintu bu nsengu ya ngombe ku matumba anai, enza nsengu ne dibaya dimue, lamika tshiamu tshia mitaku ku nseke yonso.

³Enza bivuadi bia tshiamu bia kumusha nʼabi butue bua tshioshelu, ne bikasu biatshi ne malonga atshi ne bitubuidi bia kukuata nʼabi munyinyi, ne bihanza biatshi, enza bintu ebi bionso ne tshiamu tshia mitaku.

⁴Enza tshiamu tshilukibue bu munyingu ne nkanu mai ya tshiamu tshia mitaku ku matumba atshi anai.

⁵Teka tshiamu etshi munda mua nseke mai ya tshioshelu ne hankatshi, mu bule buatshi.

⁶Enza mitshi ya acacia ya kuela ku tshioshelu, lamika tshiamu tshia mitaku ku nseke yonso ya mitshi.

⁷Buesha mitshi ei mu nkanu idi ku nseke ibidi ya tshioshelu bua kutshituala.

⁸Utshienze ne mabaya, ushiye munda muatshi mutuhu, utshienze bu munakukulesha ku mukuna.

⁹Wewe neulongolole luhangu lua tshitendelelu, ku luseke lua sude enza bilulu bidi bituangane tô ne ku coudées lukama,

¹⁰makunshi makumi abidi ne nkanu ya tshiamu tshia mitaku makumi abidi, bitubuidi bia ku makunshi nebikale bia argent.

¹¹Ku luseke lua ku nôde kabidi, enza bilulu bidi bituangane to ne ku coudées lukama, ne makunshi makumi abidi ne nkanu ya tshiamu tshia mitaku makumi abidi; bitubuidi bia ku makunshi nebikale bia argent.

¹²Ku butshiama bua luhangu ku luseke lua ku wesete, enza bilulu bidi bituangane tô ne ku coudées[9] makumi atanu, ne makunshi dikumi ne nkanu dikumi.

¹³Butshiama bua luhangu lua ku esete nebuikale coudées makumi atanu.

¹⁴Bilulu bia ku luseke lua tshibi nebikale coudées dikumi ne itanu, ne makunshi abi asatu ne nkanu isatu.

¹⁵Ku luseke lukuabo lua tshibi bilulu nebikale coudées dikumi ne itanu, ne makunshi asatu ne nkanu isatu.

¹⁶Ku mbelu kua luhangu tshilulu netshikaleku tshia buanda bua bleu ne bukunzubile ne bukunze-kunzû ne bua lin mutambe buimpe, tshienjibue kudi mundi wa lungenyi lule, enza makunshi anai ne nkanu mai.

¹⁷Lengesha makunshi onso ne tshiamu tshia argent, ne bitubuidi bia argent ne nkanu ya tshiamu tshia mitaku.

¹⁸Buludi bua muaba wa luhangu nebuikale coudées lukama ne butshiama bualu nebuikale coudées makumi atanu, ne bule bualu bua mulu coudées itanu, ne bilulu bia lin ne nkanu yabi ya tshiamu tshia mitaku.

¹⁹Bintu bionso bidibo bakuata nʼabi mudimu mu tshiendelele ne milonda yonso yatshi, ne milonda yonso ya luhangu luatshi, nebikale bia tshiamu tshia mitaku.

²⁰Wewe newele dî kudi Bena Isalele bua kuluabo ne manyi a olive a kuela mu muinda, muinda uteme matuku onso.

²¹Mu tshitendelelu ku mpala kua tshilulu tshidi ku mpala kua mushete wa Nzambi Alona ne bana bandi balume nebalame muinda dilolo tô ne dinda ku mesu kua Yehowa, bualu ebu nebuikale bu mukenji ku bikondo bienu tshiendelele kudi bana ba Isalele.