Read tshiluba Ekesode 29 Bible Online

Ekesode 29 - tshiluba bible

Ekesode 29

¹Wewe newenze bualu ebu bua kubajidila bankuatshile mudimu wa buakuidi. Angata muana mulume wa ngombe ne bimpanga bibidi bidi biakane,

²ne mampa adi kâyi ne luevene, ne mikata idi kayiyi ne luevene misangisha ne manyi, ne tukata luhehele ludi katuyi ne luevene tudi ne manyi mela ha mutu, ubilambe ne bukula buakane bua blé.

³Ubiteke mu tshisaka tshimue, ulue nʼabi mu tshisaka ne muana wa ngombe ne bimpanga bibidi.

⁴Ulue ne Alona ne bana bandi balume ku tshibi tshia ntenta wa kusangakena, uboweshe mai.

⁵Wewe newangate bilulu, uluatshishe Alona tshikowelu ne tshilulu tshia ha mutu ha efoda ne efoda ne tshilulu tshia ha tshiadi ne umuele mukaba muluka bilengele wa efoda ku tshimono.

⁶Teka tshifulu ha mutu handi ne tshitotolo tshia tshijila ha tshifulu.

⁷Hashishe angata manyi adibo bela ha mutu, ne ela manyi au ha mutu handi.

⁸Wewe neulue ne bana bandi balume, ubaluatshishe bikowelu.

⁹Ubele mikaba ku bimono, Alona ne bana bandi balume, teka bifulu ha mitu habo, bobo nebikale ne mudimu wa buakuidi tshiendelele, wewe neujidile Alona ne bana bandi balume.

¹⁰Wewe neulue ne muana wa ngombe ku tshibi tshia ntenta wa kusambakena, Alona ne bana bandi balume nebatentekashe bianza biabo ha mutu ha muana wa ngombe.

¹¹Wewe neushihe muana wa ngombe ku mesu kua Yehowa ku tshibi tshia ntenta wa kusambakena.

¹²Wewe newangate mashi a muana mulume wa ngombe, ulabe mashi ha nsengu ya ha tshioshelu ne munu webe, hongolola mashi onso ku tshitaku tshia tshioshelu.

¹³Angata dianyi dionso didi ku mala ne lukutu lua ku mutshima ne tumuma tubidi ne, dianyi diabi, ubioshile ha tshioshelu.

¹⁴Kadi wewe newoshe munyinyi wa muana mulume wa ngombe, ne tshiseba ne tunvi ne kahia ku butshika bua tshitudilu ebu mbualu bua kubuikidila bubi bua bantu.

¹⁵Angata tshimpanga tshimue, ne Alona ne bana bandi balume nebatentekashe bianza biabo ha mutu hatshi.

¹⁶Wewe neushihe tshimpanga, newangate mashi atshi wamiamine ha tshioshelu tshionso.

¹⁷Wewe neusaye tshimpanga, uvuwa mala atshi ne mikolo, uteke bituha biatshi hamue ne mutu watshi.

¹⁸Wewe newoshe tshimpanga tshijima ha tshioshelu, tshidi mulambu wa kuoshila Yehowa, udi utua dihembu, udibo boshila Yehowa ha kahia.

¹⁹Wewe newangate tshimpanga tshikuabo, Alona ne bana bandi balume nebatentekashe bianza biabo ha mutu ha tshimpanga.

²⁰Wewe neashihe tshimpanga, angata mashi atshi, wateke ku lusongo lua ditshu didi ku tshianza tshia balume tshia Alona, ne ku lusongo lua ditshu ku tshianza tshia balume tshia bana bandi balume, ne ku tshiala tshia ku tshianza tshiabo tshia bukole, ne ku muanʼa dikasa munene dia ku tshianza tshia balume, umiamine mashi ha tshioshelu tshionso.

²¹Wewe newangate mashi adi ha tshioshelu, ne manyi adibo bela ha mutu, ubimiamine Alona, ha bilulu biandi ne ha bana bandi balume ne ha bilulu biabo, yeye ne bilulu biandi ne bana bandi balume ne bilulu biabo nebikale bijidibue.

²²Wewe newangate dianyi dia tshimpanga, ne mukila udi ne dianyi ne dianyi didi ku mala ne lukutu lua ku mutshima, ne tumuma tubidi ne dianyi diabi ne tshibelu tshia ku tshianza tshia balume, bualu bua tshimpanga etshi ntshia kujidila nʼatshi bakuidi.

²³Angata mutanda wa mampa, ne mukala mulamba ne manyi, ne kakata kahehele bia mu tshisaka tshia bidia bidi kabiyi ne luevene bidi ku mpala kua Yehowa.

²⁴Uteke bintu ebi bionso mu bianza bia Alona ne mu bianza bia bana bandi balume, bobo nebabinyukule bu mulambu udibo banyukula ku mpala kua Yehowa.

²⁵Wewe newangate bintu ebi ku bianza biabo, ubioshile ha tshioshelu bu mulambu udi utua dihembu dimpe ku mesu kua Yehowa, udi mulambu udibo boshila Yehowa ha kahia.

²⁶Wewe newangate tshiadi tshia tshimpanga tshia kujidila kua Alona, utshinyukule bu mulambu udibo banyukula ku mpala kua Yehowa, netshikale tshituha tshiebe.

²⁷Wewe neujidile tshiadi tshidibo banyukula, ne tshihela tshidibo babisha mulu tshia tshimpanga tshia kujidila kua Alona ne tshia bana bandi balume.

²⁸Tshintu etshi netshikale tshituha tshia Alona ne tshia bana bandi balume kudi Bena Isalele tshiendelele, bualu bua tshidi tshituha tshia bakuidi tshia mu mulambu ya kuvuisha nʼai ditalala ya Bena Isalele, tshidi mulambu udibo babisha mulu kudi Yehowa.

²⁹Bilulu bia tshijila bia Alona nebikale kudi bana bandi balume badi banulonda ku nyima bua kubela manyi ne kubajidila.

³⁰Muana mulume udi biandi muakuidi mu muaba wandi neabiluate matuku muanda mutekete hayeye mu ntenta wa disangisha bua kuenza mudimu mu muaba wa tshijila.

³¹Wewe newangate tshimpanga tshia tshijila, ulambe munyinyi watshi ne mai a kahia mu muaba wa tshijila.

³²Alona ne bana bandi balume nebadie munyinyi wa tshimpanga ne bidia bidi mu tshisaka ku tshibi tshia ntenta wa kusangakena.

³³Bobo nebadie bintu abi bidibo babuikidila nʼabi bantu mibi yabo, bua kubajidila ne kubalengesha kudi Yehowa, kadi muenyi kena mua kudia bintu ebi, bualu bua bidi bia tshijila.

³⁴Bikala tshintu tshikese tshia munyinyi wa tshijila anyi tshia bidia bishale tô ne ku dinda, wewe neutshioshe mu kahia, kabatshidi, bualu bua tshidi tshia tshijila.

³⁵Wewe newenzele Alona ne bana bandi balume bu mudi mei onso anakukuambila, ubajidile matuku muanda mutekete.

³⁶Wewe newoshe muana wa ngombe ku dituku ku dituku bua kubuikidila bantu mibi yabo, wewe neutokeshe tshioshelu hawoshila bintu bia kubuikidila nʼabi bantu mibi yabo, wele manyi ha tshioshelu bua kutshijidila.

³⁷Wewe neubuikile mibi idi ha tshioshelu matuku muanda mutekete, utshijidile, tshioshelu netshikale bu tshintu tshitambe tshia tshijila, muntu yonso udi ulenga tshioshelu neikale wa tshijila.

³⁸Ei mmilambu ludi mua kuoshila ha tshioshelu bana ba mikoko babidi ba tshidimu tshimue ku dituku ku dituku misangu yonso

³⁹Wewe newoshile umue wa mikoko ne dinda ne mukuabo dilolo

⁴⁰Woshe muana umue wa mukoko ne tshia dikumi tshia tshihiminu[10] tshia bukula busangisha ne tshia tshinai tshia tshihiminu tshia manyi, ne tshia tshinai tshia tshihiminu tshia nvinyo bu mulambu wa kunua.

⁴¹Neufile muana wa mukoko mukuabo dilolo, neumufile ne mulambu wa bukula ne mulambu wa kunua, bu muwakenza dinda, bu mulambu wa dihembu dimpe, mulambu udibo boshila Yehowa ha kahia.

⁴²Neboshile bintu ebi ku dituku ku dituku ku bikondo bienu bionso ku tshibi tshia ntenta wa kusangakena ku mesu kua Yehowa, kundi nsangakena nʼenu bua kuyikila nʼebe.

⁴³Meme nensangakeneku ne Bena Isalele, ne tshitendelelu netshikale tshiedibue ku butumbi buanyi.

⁴⁴Meme nenjidile ntenta wa kusangakena ne tshioshelu, nenjidile Alona ne bana bandi balume kabidi bua kunkuatshilabo mudimu wa buakuidi.

⁴⁵Meme nengikale munkatshi mua Bena Isalele, nengikale Nzambi wabo.

⁴⁶Bobo nebamanye ne, Meme ndi Yehowa, Nzambi wabo, wakabahatula mu buloba bua Ejipitu bua meme kuikala munkatshi muabo, ndi bianyi Yehowa, Nzambi wabo.