Read tshiluba Ekesode 35 Bible Online

Ekesode 35 - tshiluba bible

Ekesode 35

¹Mose Wakabikila tshisumbu tshionso tshia Bena Isalele, wakabambila ne, Â mmalu adi Yehowa musue nuenu nuenze.

²Enzai mudimu matuku asambombo; kadi dituku dia muanda mutekete nedikale dituku dia tshijila, dituku dia kuikisha ku mesu kua Yehowa; muntu yonso udi wenza mudimu dituku adi nebamushihe.

³Kanutemeshi kahia mu matshika enu onso dituku dia Lumingu.

⁴Mose wakambila Bena Isalele bonso ne, Ebu mbualu buakamba Yehowa ne,

⁵Usangishe kuha kua Yehowa munkatshi muenu; muntu yonso udi witabusha mu mutshima wandi, alue biandi ne kuha kua Yehowa: ne or ne argent ne tshiamu tshia mitaku,

⁶ne bilulu bia bleu ne bikunzubile ne bikunze-kunzû ne bia lin ne miosa ya mbushi

⁷ne biseba bia bimpanga bitua mu mai makunze-kunzû, ne biseba bia nkonge wa mu mai, ne mitshi ya acacia,

⁸ne manyi a mu muinda ne manananshi a kulengesha nʼau manyi adibo bela ha mutu, ne manananshu adi atua dihembu dimpe,

⁹ne mabue a onyx, ne mabue makuabo adibo bateka mu efoda ne mu tshilulu tshia ha tshiadi.

¹⁰Muntu yonso udi ne lungenyi lule alue biandi bua kuenza bi ntu bionso biakunuambila Yehowa

¹¹ne nsubu wa tshitendelelu ne tshilulu tshia ha mutu, ne nkanu yatshi ne mabaya atshi, ne mitshi yatshi ne makurishi atshi ne nkanu ya ku makunshi,

¹²ne mushete ne mitshi ya mushete, ne tshibuikilu tshia mushete, ne tshilulu tshia munkatshi mua tshitendelelu,

¹³ne mesa ne mitshi ya mesa ne malonga a mesa ne bidia bia ha mesa,

¹⁴ne tshitekelu tshia minda ne malonga atshi ne minda yatshi, ne manyi a muinda,

¹⁵ne tshioshelu tshia musenga wa manananshi, ne mitshi yatshi, ne manyi adibo bela ha mutu ne manananshi adi atua dihembu dimpe, ne tshilulu tshia ha mbelu ha tshitendelelu,

¹⁶ne tshioshelu tshia kahia ne bintu bia tshiamu tshia mitaku, ne mitshi yatshi ne malonga atshi, ne tshiowelu ne mesa atshi,

¹⁷ne bilulu bia ku luhangu ne makunshi a luhangu, ne nkanu ya ku makunshi ne tshilulu tshia ha mbelu ha luhangu,

¹⁸ne milondo ya mu tshitendelelu ne ya mu luhangu ne nshinga yai,

¹⁹ne bilulu bia mushinga mukole bia kuenza nʼabi mudimu mu muaba wa tshijila, bilulu bia tshijila bia muakuidi. Alona ne bia bana bandi balume bua kuenza nʼabi mudimu wa buakuidi.

²⁰Hashishe, tshisumbu tshia Bena Isalele tshionso tshiakumuka ku mesu kua Mose.

²¹Muntu yonso wakadi mutshima wandi umuenzesha ne wakadi tshihahai wakalua ne kuha kua Yehowa bualu bua mudimu wa nsubu wa tshitendelelu ne bintu bionso biakadi mu tshitendelelu ne bilulu bia tshijila.

²²Balume ne bakashi bakalua bungi buabo bakadi bitabusha mu mitshima yabo, bakalua ne tukanu tua ku matshu ne tukanu tua ku minu ne nkanu ya ku maboko ne bintu bionso bia or, muntu ne muntu wakalua ne kuha kua or kudi Yehowa.

²³Muntu ne muntu wakadi ne bilulu bia bleu ne bikunzubile ne bikunze-kunzu ne bia lin, ne bia miosa ya mbushi ne biseba bia bimpanga bitua mu mai makunze-kunzû, ne biseba bia nkonge ya mu mai, wakalua nʼabi.

²⁴Muntu ne muntu wakadi ne tshiamu tshia argent ne tshia mitaku wakalua nʼabi bu kuha kua Yehowa, muntu yonso wakadi ne mitshi ya acacia yakadibo mua kuenza nʼai mudimu wakalua nʼai.

²⁵Bakashi bonso bakadi ne lungenyi lule bakakuma bilulu ne bianza biabo, bakalua ne bilulu biakakumabo ne bia bleu ne bikunzubile ne bikunze-kunzû ne bia lin muimpe.

²⁶Bakashi bonso bakadi ne lungenyi lule mu mitshima yabo bakakuma bilulu ne miosa ya mbushi.

²⁷Bakokeshi bakalua ne mabue a onyx ne mabue makuabo a kuteka mu efoda ne mu tshilulu tshia ha tshiadi,

²⁸ne manyi ne bintu bia dihembu dimpe bia kuela mu manyi, ne manyi a muinda ne manyi adibo bela ha mutu, ne manyi adi atua dihembu.

²⁹Bena Isalele bonso, balume ne bakashi, ba mitshima miololoke bakitabusha kufila bintu ku mudimu wakadi Yehowa Wambila Mose bua kuenjibua, bakabika kudi Yehowa bu kuha kuabo kua disanka.

³⁰Mose wakambila Bena Isalele ne, Yehowa wakamana kuhikula Besalele, muana mulume wa Uli, muana mulume wa Hû wa mu tshisamba tshia Yuda,

³¹wakamûsha tente ne Nyuma wa Nzambi ne lungenyi lule lua kuenza nʼalu midimu yonso,

³²ne lua kulongolola nʼalu mudimu muimpe wa bintu bia or ne bia argent ne bia tshiamu tshia mitaku,

³³ne mudimu wa kusonga mabue ne wa kusonga mabaya ne midimu yonso ya bantu badi ne lungenyi lule.

³⁴Wakabuesha lungenyi lua kuyisheye nʼalu bantu mu mutshima wandi, ne yeye ne Oholiaba, muana mulume wa Ahisamaka wa mu tshisamba tshia Dana.

³⁵Yeye wakabûsha mitshima tente ne lungenyi bua kuenza nʼalu midima yonso ya bantu badi basonga bintu ne badi bakuma bilulu bia bleu ne bikunzubile ne bikunze-kunzû ne bia lin, ne ya bantu bonso badi balongolola midimu ya lungenyi.