Read tshiluba Ekesode 38 Bible Online

Ekesode 38 - tshiluba bible

Ekesode 38

¹Wakenza tshioshelu tshia kuosha nyama ne mabaya a acacia. Buludi buatshi buakadi coudées[17] itanu ne butshiama buatshi buakadi coudées itanu, ne bule buatshi bua mulu buakadi coudées isatu.

²Wakenza nsengu ku matumba anai, wakenza nsengu ne tshituha tshijima, wakalamata tshiamu tshia mitaku ku nseke yonso.

³Wakenza malonga onso a tshioshelu ne bivuadi ne nkasu ne malonga ne bitubuidi bia kukuata nʼabi munyinyi ne bihanza bia kahia ne bintu biatshi bionso ne tshiamu tshia mitaku.

⁴Wakenzela tshioshelu munyingu wa tshiamu tshia mitaku, wakatekeye munda mua mibangu ya ku mutu kua tshioshelu hankatshi, mu bule buatshi.

⁵Wakatula nkanu mai ya kuteka ku matumba a tshintu atshi bua kubueshamu mitshi.

⁶Wakenza mitshi ya acacia, wakalamata tshiamu tshia mitaku ku nseke yonso.

⁷Wakabuesha mitshi ei mu nkanu ya ku nseke ya tshioshelu, bua kutshituala nʼai, wakashiya munda muatshi mutuhu.

⁸Wakenza tshiowelu tshia mai ne tshiamu tshia mitaku, ne mesa atshi ne tshiamu tshia mitaku, wakatshienza ne ndimuenu ya ba kashi bakadi benza mudimu ku mbelu kua nsubu wa tshitendelelu.

⁹Wakalongolola luhangu lua muaba wa kutendelela ku luseke lua ku sude wakenza bilulu bia lin muimpe tô ne ku coudées lukama,

¹⁰ne makunshi makumi abidi, ne nkanu ya tshiamu tshia mitaku makumi abidi, kadi bitubuidi bia ku makunshi biakadi bia argent.

¹¹Ku luseke lua ku nôde wakenza bilulu tô ne ku coudées lukama, ne makunshi makumi abidi, ne nkanu makumi abidi, kadi bitubuidi biakadi bia argent.

¹²Ku luseke lua ku wesete wakenza bilulu to ne ku coudées makumi atanu, ne makunshi dikumi, ne nkanu dikumi ne bitubuidi bia argent dikumi.

¹³Ku luseke lua ku esete wakenza bilulu tô ne ku coudées makumi atanu.

¹⁴Bilulu bia ku luseke lumue lua tshibi biakadi coudées dikumi ne itanu, ne makunshi asatu ne nkanu isatu,

¹⁵luseke lukuabo luakadi nunku kabidi, bilulu tô ne ku coudées dikumi ne itanu ne makunshi asatu ne nkanu isatu.

¹⁶Bakenza bilulu ebi bionso ne buanda bua lin muimpe.

¹⁷Bakenza nkanu yonso ya makunshi ne tshiamu tshia mitaku, kadi bitubuidi bia makunshi biakadi bia tshiamu tshia argent, wakalengesha mitu ya makunshi onso ne tshiamu tshia argent, ne makunshi onso a luhangu akadi malengesha ne tshiamu tshia argent.

¹⁸Bakenza tshilulu tshia ku mbelu kua luhangu ne buanda bua bleu ne bukunzubile ne bukunze-kunzû ne bua lin muimpe kudi bantu bakadi ne lungenyi lule bule buatshi buakadi coudées[18] ma kunu abidi ne butshiama buatshi buakadi coudées itanu, muomumue ne bilulu bia luhangu.

¹⁹Makunshi a tshibi akadi anai, ne nkanu ya tshiamu tshia mitaku mai, ne bitubuidi bia argent, bakalengesha makunshi ne tshiamu tshia argent.

²⁰Milonda yonso ya mu nsubu wa tshitendelelu ne mu luhangu lua muaba wa kutendelela yakadi ya tshiamu tshia mitaku.

²¹Ebu mbungi bua bintu bia mu nsubu wa tshitendelelu biakabalabo bu muakamba Mose biakakuatshila Bena Lewi mu mudimu wabo, mu bukokeshi bua Itama, muana mulume wa Alona, muakuidi.

²²Besalele, muana mulume wa Uli, muana mulume wa Hû wa mu tshisamba tshia Yuda wakenza bintu bionso bakambila Yehowa Mose.

²³Oholiaba, muana mulume wa Ahisamaka, wa mu tshisamba tshia Dana wakadi nʼandi, mundi wa lungenyi lule wakenza bilulu bia bleu ne bikunzubile ne bikunze-kunzû.

²⁴Bakasangisha or wa kuenza nʼai mudimu wa mu nsubu wa tshitendelelu ntalanta[19] makumi abidi ne tshitema, ne nshekele[20] nkama muanda mutekete ne makumi asatu, bu muakadi nshekele wa mu nsubu wa Nzambi.

²⁵Bakabala tshiamu tshia argent bu bungi bua bantu, ntalanta[21] lukama ne nshekele tshinunu tshimue, nkama muanda mutekete ne makumi muanda mutekete ne itanu bu muakadi nshekele wa mu nsubu wa Nzambi.

²⁶Muntu ne mundi wakela beka umue udi tshituha tshia nshekele wa mu nsubu wa Nzambi, muntu ne muntu wakadibo babala, waka mana kuhita bidimu makumi abidi, bakadi balume binunu nkama isambombo, binunu bisatu, nkama itanu ne makumi atanu.

²⁷Bakenza nkanu ya mu nsubu ne ya mu bilulu ne ntalanta ya argent lukama, ntalanta ku lukanu, ntalanta ku lukanu.

²⁸Wakenza bitubuidi bia makunshi ne bintu bia kulengesha nʼabi makunshi ne nshekele ya argent tshinunu tshimue, nkama muanda mutekete ne makumi muanda mutekete ne itanu.

²⁹Bakasangisha tshiamu tshia mitaku bu ntalanta makumi muanda mutekete, ne nshekele[22] binunu bibidi ne nkama mai.

³⁰Bakenza nʼatshi nkanu ya ku tshibi tshia nsubu, ne tshioshelu tshia nyama ne biamu bitshiamakane, ne malonga onso a tshioshelu,

³¹ne nkanu ya ku luhangu, ne nkanu ya ku tshibi tshia luhangu, ne milonda yonso ya mu nsubu, ne milonda yonso ya mu luhangu lua ku muaba wa tshitendelelu.