Read tshiluba Ekesode 4 Bible Online

Ekesode 4 - tshiluba bible

Ekesode 4

¹Mose wakandamuna ne, Kadi bobo kabena bangitabusha, kabena bunvua di dianyi, bobo nebambe ne, Yehowa kakamueneka kûdi nansha.

²Yehowa wakamuambila ne, Udi ne tshintu kai mu tshianza tshiebe? Yeye wakamba ne, Mulangala.

³Yehowa wakamba ne, Wele hanshi Nunku wakawela hanshi ne wowo wakakudimuka nyoka, Mose wakamunyema.

⁴Yehowa wakambila Mose ne, Olola tshianza tshiebe, umukuate ku mukila, yeye wakolola tshianza tshiandi, wakamukuata ne nyoka wakakudimuka mulangala kabidi.

⁵Yehowa wakamba ne, Bualu ebu nebubitabushishe ne, Yehowa, Nzambi wa bankambua babo, Nzambi wa Abalahama, Nzambi wa Isaka ne Nzambi wa Yakoba wakamueneka kudi.

⁶Yehowa wakamuambila kabidi ne, Teka tshianza mu tshiadi tshiebe. Yeye wakateka tshianza tshiandi mu tshiadi, ne hakatshiumusheye, monai, tshianza tshiandi tshiakadi ne nsudi mutoke bu neige.

⁷Yehowa wakamba ne, Teka tshianza tshiebe mu tshiadi kabidi. Yeye wakateka tshianza mu tshiadi kabidi, hakatshiumusheye mu tshiadi, tshianza tshiandi tshiakakudimuka bu muakadi mubidi wandi.

⁸Bikalabo kabayi bakuitabusha, kabayi bunvue di dia tshimanymu tshia kumudilu, bobo nebitabushe dî dia tshimanymu tshia kunshikidilu.

⁹Bikalabo kabayi bitabusha bimanyinu ebi bibidi, kabayi bunvue dî diebe, wewe newangate mai a mu musulu, wele ha buloba bûme, ne mai awakangata mu musulu neakudimuke mashi ha buloba bûme.

¹⁰Mose wakambila Yehowa ne, Yehowa, meme tshiena mua kuakula bimpe, nansha diambedi, nansha katshia wabanga kuakula ne muntu webe, bualu bua meme ndi muena tshikukumina.

¹¹Yehowa wakamukonka ne, Mufuki wa mukana mua bantu nganyi? Udi ufuka bena kamama ne bena mahaha ne bantu badi mua kumona ne bantu badi bafofo nganyi? Meme Yehowa, tshiena ngenza malu â, anyi?

¹²Nunku, ya biebe, meme nengikale ne mukana muebe, meme nenkuyishe mei andi musue wewe kuamba.

¹³Mose wakamba ne, Yehowa, nda nkusengelela ne, Utume muntu ûdi musue kutuma.

¹⁴Tshiji tshia Yehowa tshiakalua kudi Mose, wakamuambila ne, Alona, muanʼenu mulume, muena Lewi, kenaku, anyi? Ndi mumanye ne, Yeye udi mua kuakula bimpe. Yeye ulualua mu nshila bua kusangakena hebe, ne hakatangileye, yeye neasanke mu mutshima wandi.

¹⁵Wewe neuyikile handi, neuteke mei mukana muandi, meme nengikale ne mukana muebe ne mukana muandi, nenkuyishe malu anudi mua kuenza.

¹⁶Yeye neikale muakuidi webe kudi bantu, yeye neikale bu mukana muebe ne wewe newikale bu Nzambi kudiye.

¹⁷Wangate mulangala eu mu tshianza tshiebe, ûdi wenza nʼau bimanyinu ebi.

¹⁸Mose wakahingana kudi Yetelo tatuʼandi-muenu, wakamuambila ne, Ndi musue kuhingana kudi bana betu badi mu Ejipitu, bua kubamona ne bobo batshidi ne muoyo Yetelo wakambila Mose ne, Ya biebe talala.

¹⁹Yehowa wakambila Mose mu Midiyana ne, Ya biebe, uhingane mu Ejipitu bualu bua bantu bonso bakasua kukushiha bakafua.

²⁰Mose wakangata mukashi wandi ne bana bandi balume, wakabateka ha nyima ha mpunda, wakahingana mu buloba bua Ejipitu. Mose wakaya ne mulangala wa Nzambi mu tshianza tshiandi.

²¹Yehowa wakambila Mose ne, Hawahingana mu Ejipitu, wenza ku mesu kua Palô malu a kukema onso anakuteka mu tshianza tshiebe, kadi meme nenkoleshe mutshima wa Palô, ne yeye kena ulekela bantu.

²²Wewe newambile Palô ne, Yehowa udi Wamba ne, Isalele udi muanʼanyi wa balume, muanʼa bute wanyi,

²³ne meme nakamana kukuambila ne, Ulekela muanʼanyi wa balume, bualu bua kunkuatshila mudimu, kadi wewe wakahidia kulu ulekela, nunku meme nenshihe muana webe, muanʼa bute webe.

²⁴Hakadibo baya mu nshila wa ku nsubu wa tshilala benyi, Yehowa wakasangakena nʼandi, wakamba kumushiha.

²⁵Sipola wakangata dibue ditue, wakatengula muan andi mulume, wakateka dikoba ku makasa a Mose, wakambila Mose ne, Bulelela, wewe udi bayanyi wa mashi.

²⁶Yeye wakalekela Mose. Mukashi wakamba ne, Wewe udi bayanyi wa mashi bualu bua ku tengula.

²⁷Yehowa wakambila Alona ne, Ya biebe mu tshihela bua kusangakena ne Mose Yeye wakaya, wakasangakena handi mu mukuna wa Nzambi, wakatuangana nʼandi mishiku.

²⁸Mose wakambila Alona mei onso akamuambila Yehowa ne bimanyinu bionso biakamuheye.

²⁹Mose ne Alona bakaya, bakasangisha bakulu bonso ba Bena Isalele.

³⁰Alona wakabambila mei onso akadi Yehowa wambila Mose, ne yeye wakenza bimanyinu ku mesu kua bantu.

³¹Bantu bakitabusha ne hakunvuabo ne, Yehowa wakulua kudi Bena Isalele, wakumona dikenga diabo, bakinama mitu yabo, bakatendelela.