Read tshiluba Yobo 16 Bible Online

Yobo 16 - tshiluba bible

Yobo 16

¹Hashishe, Yobo wakakudimuna Elifaza ne,

²Nakunvua malu a bungi bu nunku, nudi basambi badi bantatshisha, buonso buenu!

³Mei a hatuhu adi ne nshikidilu, anyi? Bualu kai budi bukufikisha munda bua wewe udi witaba?

⁴Meme kabidi nakadi kumanya mua kuakula bu munudi nuakula, bu nuenu bikale mu muaba wanyi. Nakadi mua kubambakasha nʼenu mei bua kunudiula, nakadi mua kunukuhila mutu wanyi.

⁵Nakadi mua kukolesha mitshima yenu ne mei a mukana muanyi, ne busambi bua ku mishiku yanyi buakadi kunuholesha.

⁶Bingamba di, kanyinganyinga kanyi kakena kaholeshibua; binahuwa bianyi, nekumuke kundi, anyi?

⁷Kadi mpindiu yeye wakuntekesha, wewe wakubutula bonso banakadi nʼabo.

⁸Wewe wakunshinguisha; muanda eu wakulua dibandibua dianyi; dinyana dianyi didi dibika bua kunkanda, didi dimbanda ku mesu kuanyi.

⁹Tshiji tshiandi tshiakumpanda ne tshiakunduisha, yeye wakundiangena menu andi, muena lukuna wanyi wakuntshika mesu andi bikole.

¹⁰Bakela miau bua bualu buanyi; bakuntaha mahi ku matama hakumpetulabo; badi badisangisha hamue bua kungelela tshifufu.

¹¹Nzambi udi unfila mu bianza bia bantu babi, udi umbuesha mu bianza bia benji ba malu mabi.

¹²Nakadi nshikama talalâ, kadi yeye wakuntshibula bituha bituha. Wakunkuata ku nshingu, wakunkanda bihesa. Wakungimanyika bu tshimanyinu tshiandi tshia kuasaku mikete.

¹³Mikete yandi idi innyunguluka nseke yonso. Udi uhanda tumuma tua tuonyi tuanyi hankatshi, kayi unfuila luse. Udi uhumuna nyongangandu wanyi hanshi ha buloba.

¹⁴Udi untaha mputa mu miaba yonso, udi ulua kundi lubilu bu mudi umena bukitu.

¹⁵Nakuditelela bilulu bikayabala bindi nduata hamʼbidi hanyi, nakuladika lusengu[17] luanyi mu buloba.

¹⁶Mpala wanyi wakulua mukunzekunzû bualu bua kudila kuanyi, ne ha bilafinyi bianyi hadi mundidimbi ya lufu.

¹⁷Kadi kakuena bienzedi bia tshimbambila ku bianza bianyi, kulomba kuanyi kakuena ne lubombo.

¹⁸Wewe buloba, kubuikidi mashi anyi, muadi wanyi kausanganyi muaba wa kuhuwilau talalâ!

¹⁹Kadi mpindiu mene, monai, mumonyi wa bualu buanyi udi mu diulu, ne mujadiki wa dî dianyi udi mulu kabidi.

²⁰Balunda banyi badi bambuidia; kadi mesu anyi adi ahumuina Nzambi binsonshi,

²¹bua yeye ajadike buakane bua muntu mu tshilumbu tshiandi ne Nzambi, ne buakane bua muntu mu tshilumbu tshiandi ne muena mutumba nʼandi.

²²Bualu bua hahita bidimu bikese, nenye bianyi mu nshila undi tshiyi mua kuhingana kabidi.