Read tshiluba Yobo 19 Bible Online

Yobo 19 - tshiluba bible

Yobo 19

¹Hashishe, Yobo wakandamuna ne,

²Musangu bule munyi nenunyingalashe mutshima wanyi, nenuntshibule bituha bituha ne mei enu?

³Misangu ei dikumi nuakumana kumbela; kanuena ne bundu bualu bua nudi nungenzela bibi.

⁴Bingikala muhange bulelela, dihanga dianyi didi dishala kundi nkayanyi.

⁵Binuadibandisha ku mpala kuanyi bulelela, binuakeba kuntuisha bua bundu bundi nʼabu,

⁶nuamanya bienu ne, Nzambi wakutamba bukole, wakunnyunguluka ne bukuondo buandi.

⁷Monai, ndi ngela dî dikole ne, Badi bakeba kunshiha, kadi kabena bunvua dî dianyi; ndi ngela di dikole ne, Unkuatshishe, kadi kulumbulula kuakane kakuenaku.

⁸Yeye wakuasa luhangu lunyunguluka nshila wanyi bua meme tshihitshi; udi uteka mîdima mu nshila yanyi.

⁹Wakunvula butumbi buanyi, wakangumusha tshifulu tshia bukelenge ku mutu kuanyi.

¹⁰Wakalubutula ne bujima buanyi, nakamana kufua; wakutula ditekemena dianyi bu mudibo bajomona mutshi.

¹¹Wakatemesha tshiji tshiandi kundi, udi umbala bu muena lukuna wandi.

¹²Misumba ya masalayi andi adi alua hamue, adi ela mushiki wa buloba bua kutshintshimika, adi anyunguluka ntenta wanyi ne bitudilu biabo.

¹³Wakûmusha bana betu kundi, balunda banyi bonso bakulua bu bantu ba bende kundi.

¹⁴Ba mu diku dianyi bakumpanga, bantu bakadi bammanye bimpe bakumana kumpua muoyo.

¹⁵Badi bashikame mu nsubu muanyi ne bakashi benji ba mudimu wanyi badi bambala bu muenyi; ndi bu muntu wa bende ku mesu kuabo.

¹⁶Binabikila muena mudimu wanyi, kena witaba kundi nansha; bundi nʼabu mbua kumusengelela ne mukana muanyi.

¹⁷Muhuya wa mukana muanyi udi ulonda mukashi wanyi, ndi ntonda kabidi bana betu ba difu dimue.

¹⁸Bana bakese mene badi bampetula; binajuka, badi bampenda.

¹⁹Bantu bonso banakeyemena badi bandengulula, banakunanga bakungela nyima.

²⁰Mifuba yanyi idi ilamatangana ne dikoba dianyi ne munyinyi wanyi, nakuhanduka anu ne nyama ya mu menu.

²¹Nunfuile luse, nuenu balunda banyi; nunfuile luse; bualu bua tshianza tshia Nzambi tshiakundenga.

²²Bualu kai nudi basue kundonda ne kunkengesha bu mudi Nzambi wenza, kanuena banze kukuta munyinyi wanyi?

²³Nakadi kusua bua bafunde mei anyi! Nakadi kusua bua bâfunde mu mukanda muvunga!

²⁴Nakadi kusua bua mei â asongibue ha dibue tshiendelele ku tshiamu tshia kusonga nʼatshi maleta, ne ku tshiamu tshia lutende!

²⁵Kadi meme hanyi ndi mumanye ne, Muakudi[19] wanyi udi ne muoyo; ne mu matuku a kunshikidilu yeye neimane ha buloba.[20]

²⁶Habutuka dikoba dianyi, hashishe, tshiyi ne mubidi wanyi, nemmonangane ne Nzambi.

²⁷Meme mene nemmumone nkayanyi, ne mesu anyi neamumone yeye mene, kayi bu muenyi kundi. Mutshima wanyi udi mule tente ne dijinga dia bualu ebu!

²⁸Binuamba ne, Monai bu mutulualua kumukengesha! Binuamba ne, Bualu bua muji wa bualu bua makenga andi udi umueneka munda muandi!

²⁹Nutshine bienu muele wa nvita: bualu bua tshiji tshikole tshia Nzambi tshidi tshivuisha makengesha adi alua ku muele wa nvita, bua nuenu numanye ne, Kulumbulula kudiku.