Read tshiluba Yobo 28 Bible Online

Yobo 28 - tshiluba bible

Yobo 28

¹Bulelela, tshina tshidiku tshia bantu kumbula tshiamu tshia argent, ne ditanda didiku dia kufulamu tshiamu tshia or bua kutshilengesha.

²Badi bumbula tshiamu tshifike mu buloba, badi bafula tshiamu tshia mitaku tshifume ku mabue.

³Bantu badi bihata midima, badi baya ne minda tô ne kunfudilu kua tshina, badi bakeba tubanda ludi mu mufitu ne mîdima mikole.

⁴Yeye udi umbula tshina mu muaba udi kauyi hehi ne miaba idi bantu bashikame, mu miaba idi bantu kabayi bavuluka; badi kule, kabayi hehi ne bantu bakuabo, badi balembelela eku ne eku.

⁵Buloba budi bumenesha bia kudia, kadi munda muabu mene mudi mukudimuka bua kahia kadi kabuandamuna.

⁶Mabue abu adi ne mabue a saphir[29] munda muau, ne munda muabu mudi musenga wa tshiamu tshia or.

⁷Nyunyu itu yadia bintu biakubakulayi kayena mimanye nshila wa ku tshina atshi, mesu a nyunyu wa nkumbi-kumbi kaena manze kumumona.

⁸Nyama minene kayena mianze kumuihata, ne nyama wa ntambue kena muanze kuhitshilamu.

⁹Muntu udi wolola tshianza tshiandi bua kulenga mabue makole; yeye udi umbula mikuna minene ku bitaku biai.

¹⁰Udi uhanda nshila munkatshi mua mabue; mesu andi adi amona bintu bionso bia mushinga mukole.

¹¹Udi wela misulu nkila bua mai kâhueki, tshidi tshisokoka ntshidiye usokolola.

¹²Kadi meji nebâsangane kudi kunyi? Muaba wa kujingulula malu udi kudi kunyi?

¹³Muntu kena mumanye mushinga wau; kabena bâsangana mu buloba bua badi ne muoyo.

¹⁴Ndondo wa muinshi mua buloba udi wamba ne, Kaena munda muanyi; mai manene adi amba ne, Kaena nʼanyi.

¹⁵Kabena bamanye mua kufila tshiamu tshimpe tshia or bua kuaheta; kabena bamanye mua kuidikisha tshiamu tshia argent bu mushinga wau.

¹⁶Kabena bamanye mua kuelekesha mushinga wau ne wa or wa ku Ofî, anyi wa mabue a onyx a mushinga mukole, anyi wa dibue dia saphir.[30]

¹⁷Or ne ntalatala kabiena nʼau muomumue, ne kabena bamanye mua kushintakasha bilenga bia or bia mushinga mukole bua kuangata.

¹⁸Katuena mua kutela mena a mabue a corail ne a cristal diatshimue nʼau. Diheta dia meji didi ditamba dia mabue a perles mushinga mukole.

¹⁹Dibue dia topaze dia ku Atiopa kadiena muomumue nʼau; kabena bamanye mua kubala mushinga wau diatshimue ne wa or wakufulabo mu ditanda.

²⁰Meji adi mafume kudi kunyi? Muaba wa kujingulula kua malu udi kudi kunyi?

²¹Bualu bua muaba wau udi masokoka kudi bintu bionso bidi ne muoyo, ne udi musokoka kudi nyunyu ya mu diulu.

²²Kubutuka[31] ne Lufu bidi biamba ne, Tuakunvua lumu luau ku matshu etu.

²³Nzambi udi ujingulula nshila wa kudiu, ne yeye udi mumanye muaba wau.

²⁴Bualu bua yeye udi umona tô ne kunfudilu kua buloba, ne udi umona miaba yonso ya muinshi mua diulu.

²⁵Hakidikisheye luhehele bujitu bualu, hakidikisheye bungi bua mai ne luidi luandi,

²⁶hakeleye nvula mukenji wandi, hakalongolueleye miele ya nvula ne muku ngulu nshila,

²⁷Mu diba adi yeye wakamona meji ne wakâlondela bantu; wakajadika ne wakâkononona.

²⁸Hashishe, wakambila bantu ne, Monai, ditshina dia Mukelenge didi meji; ne kumuka ku malu mabi kudi kujingulula kua malu.