Read tshiluba Yobo 34 Bible Online

Yobo 34 - tshiluba bible

Yobo 34

¹Elihu wakandamuna dî diandi kabidi ne,

²Nuenu bena meji, unvuai mei anyi, nuenu bena lungenyi, telejai matshu enu kundi.

³Bualu bua ditshu didi diteta mei bu mudi ludimi lulabula bia kudia.

⁴Tudisunguile bualu budi buakane, tumanye munkatshi muetu bualu budi buimpe.

⁵Bualu bua Yobo udi wamba ne, Ndi muakane; Nzambi wakunyenga kulumbulula kuakane kundi.

⁶Ndi mubinge kadi badi bambala bu muena mashimi, kabena bamanye mua kûmisha mputa wanyi, kadi tshiakuenza bualu bubi.

⁷Muntu kai udi bu Yobo, udi unua bihendu bu mai,

⁸udi ukuata bulunda ne benji ba malu mabi, udi wenda mu nshila ne bantu babi?

⁹Bualu bua yeye udi wamba ne, Kuikala ne disanka kudi Nzambi kakuena kukuatshisha muntu nansha ku bualu bumue.

¹⁰Nunku nungunvuile, nuenu badi bajingulula malu; bualu ebu kabuikadi kudi Nzambi bua yeye kuenza malu mabi, anyi bua Wa Bukole Buonso kuenzeye bibi!

¹¹Bualu bua Nzambi neafute muntu bu mudi bienzedi biandi, yeye neavuishile muntu yonso bualu bu muakenzenzeye.

¹²E, bulelela, Nzambi kena wenza bibi, Wa Bukole Buonso kena unyanga kulumbulula kuakane.

¹³Wakamuha bukokeshi ha mutu ha buloba nganyi? Wakamuha buloba bujima bua yeye kubulama nganyi?

¹⁴Biumusheye mutshima wandi bua kuhinganau kudiye, biasangisheye nyuma wandi ne muhuya wandi munda muandi nkayamu,

¹⁵ba ha buloba bonso nebajimine diatshimue, ne bantu nebahingane ku dinfuenkenya.

¹⁶Biwikala ne dijingulula dia malu unvua dî edi; teleja matshu ebe ku mei andi nkuambila.

¹⁷Udi ukina kulumbulula kuakameka udi mua kukokesha bakuabo anyi? Neubishe udi mukole ne udi muakane, anyi?

¹⁸Neubishe udi wambila mukelenge ne, Wewe udi muntu wa tshianana, udi wambila bantu banene ne, Nudi babi, anyi?

¹⁹Neuhishe udi ubenga kunemeka anu bana ba bakelenge, udi kayi ubala babanji ne, Badi ku mpala kua bahele; bualu bua buonso buabo badi mudimu wa ku bianza biandi?

²⁰Mu tshituha tshia diba badi bafua; nansha ha diba dia mundankulu mene bantu badi bazakashibua ne badi bajimina; bakole badi bumushibua tshianza tshia muntu katshiyi tshibumusha.

²¹Bualu bua yeye udi uteka mesu andi ku nshila idi muntu wendela, udi umona biendedi biandi bionso.

²²Kakuena midima, kakuena mufitu mukole kudi benji ba malu mabi bamanye mua kusokomena.

²³Bualu bua yeye kena ne bualu bua kusunguila muntu tshikondo tshijalame bua yeye kuya ku mpala kua Nzambi bua kulumbuluishibua.

²⁴Udi utshibula bantu banene bituha bituha, kayi muanze kukonkonona malu abo, udi ujadika bakuabo mu miaba yabo.

²⁵Bualu bua udi mumanye midimu yabo, udi ubatonkola mu butuku, nunku badi babutudibua.

²⁶Udi ubakuma bua bubi buabo ku mesu kua bantu bonso,

²⁷bualu bua bakasesuka mu nshila, kabayi balonda Nzambi, kabakasua kuenda mu nshila yandi yonso.

²⁸Bua bualu ebu bakafikisha muadi wa bahele kudiye, ne yeye wakunvua muadi wa bakengi.

²⁹Biahuweye talalâ, muntu kai wamubisha? Biasokokeye mpala wandi, muntu kai wamanya mua kumumona? Yeye udi wenzela tshisamba tshijima ne muntu umue muomumue,

³⁰bua muntu udi ubenga Nzambi kamanyi mua kukokesha, kamanyi mua kukuata bantu mu buteyi.

³¹Muntu kai wakuambila Nzambi dî edi ne, Nakumana kukenga, tshiena ngenza bualu bubi kabidi,

³²wewe unyishe bualu bundi tshiyi muanze kumona; bingikala muenze bualu bubi, tshiena mbuenza kabidi?

³³Yeye neakuenzele bu mûdi musue bualu bua wakabenga dikosa diandi dia nsambu, anyi? Bûdi nʼabu mbua kusungula, kembualu buanyi to. Nunku utuambile bualu bûdi mumanye.

³⁴Bantu badi bajingulula malu nebangambile, e, muena meji yonso udi unvua dî dianyi neambe ne,

³⁵Yobo udi wakula bu udi kayi ne lungenyi, ne mei andi kaena mei a meji.

³⁶Tuakadi kusua bua Yobo atetshibue tô ne ku ndekelu, bualu bua wakuitaba bu mudi bantu babi bitaba.

³⁷Bualu bua udi utentekasha ditomboka ha mutu ha bubi buandi; udi ututa tshikashi munkatshi muetu, ne udi uvudisha mei andi adiye ubanda nʼau Nzambi.