Read tshiluba Yobo 41 Bible Online

Yobo 41 - tshiluba bible

Yobo 41

¹Udi mumanye mua kuhatula ngandu mu mai ne ndobo, anyi? Udi mumanye mua kushindika ludimi luandi ne muonshi, anyi?

²Udi mumanye mua kuela muonshi wa mukudi wa ntuhu mu diulu diandi, anyi kutubula lubanga luandi ne lukanu, anyi?

³Yeye neakutendekene ne mitendekenu ya bungi, anyi? Neakule hebe ne mei a kalolo, anyi?

⁴Neahunge nʼebe tshihungidi, bua wewe umuangate bu muena mudimu webe tshiendelele, anyi?

⁵Udi mua kunaya handi bu mûdi unaya ne nyunyu, anyi? Udi mua kumusuika bua mishikankunde yebe inaye nʼandi, anyi?

⁶Bilembi nebienduluke handi mushinga, anyi? Nebamuabanyangane munkatshi mua benduluki ba mushinga, anyi?

⁷Wewe udi mua kûsha tshiseba tshiandi tente ne biamu bidi ne milonda mitue, anyi mutu wandi tente ne tubenda, anyi?

⁸Lenga tshianza tshiebe hamʼbidi handi; elangana meji a nvita ei; kuena wenza muanda eu kabidi kashidi!

⁹Mona, ditekemena dia muntu udi ukeha kumukuata didi hatuhu. Mutshima wa muntu kawena uhanga munda muandi anu biamumoneye ku mesu, anyi?

¹⁰Kakuena muntu udi ne tshimbambila bua yeye amusonsole; nunku nganyi udi mua kuimana ku mpala kuanyi?

¹¹Muntu kai wakadianjila kumpa tshintu, bua meme mmufute kabidi? Bintu bionso bidi muinshi mua diulu mbianyi.

¹²Tshiena mpuwa talalâ bua bidimba biandi, anyi bua bukole buandi ne bua bulengele bua mubidi wandi.

¹³Muntu kai udi mua kuvula bivualu[48] biandi bidi hamʼbidi handi?

¹⁴Muntu kai udi mua kubuela mu mbanga yandi? Muntu kai udi mua kubulula mukana muandi? Kunyunguluka kua menu andi kudi buowa bukole.

¹⁵Nyima wandi udi ne milongo ya mabamba adi bu ngabu yandi, mikuatakane hohamue bu mituangashe bikole.

¹⁶Diamba dimue didi ditamba kukuatakana ne dikuabo, ne bua muanda eu luhehele kaluena lumanye mua kuhita hankatshi hau nansha.

¹⁷Dinga didi dilamatangana ne dikuabo; onso adi alamatangana bikole, kaena mua kuhanduludibua.

¹⁸Kuela kuandi kua nyashi kudi kukenkesha dinkenka bu munya, mesu andi adi bu bilafinyi bia kabundubundu ka dinda.

¹⁹Ndimi ya kahia idi ihatuka mukana muandi, nsase ya kahia idi ihatuka munda muandi kabidi.

²⁰Muishi wa kahia udi uhatuka mu mihembu ya diulu diandi, bu mudiu uhatuka mu tshivuadi tshidi tshisaba ha kahia ka ntuhu idi ihia muinshi muatshi.

²¹Muhuya wandi udi utemesha makala a kahia, ludimi lua kahia ludi luhatuka mukana muandi kabidi.

²²Bukole budi bujalama mu nshingu wandi, buowa budi buja maja ku mpala kuandi.

²³Bituha bia munyinyi wandi bidi mu difu diandi bidi bilamatangana, bidi bikole hamʼbidi handi ne kabiena mua kunyunguishibua.

²⁴Mutshima wandi udi mukole bu dibue; e, udi mukole bu dibue dia kuhelelahu manvua.

²⁵Hajukeye, bantu bakole badi batshina, bualu bua buowa budi bubakuata, badi balua bu bahale.

²⁶Bakeba muntu kumutaha ne muele wa nvita, kawena umuenzela bualu. Difuma anyi kabenda anyi mukete kabiena binuenzela bualu.

²⁷Yeye udi ubala tshiamu tshifike bu nsona, ne tshiamu tshia mitaku bu mutshi mubole.

²⁸Mukete kawena mumanye mua kumuihata. Yeye udi wandamuna mabue a bieledi alue bu bihatu kudiye.

²⁹Bikau bidi bibadibue kudiye bu bisonsa; udi useka tshiona tshia kabenda hamuelaboku.

³⁰Tshiseba tshia mu tshiadi tshiandi ne tshia mu difu bidi bu biyoyi bia ngesu; udi ushiya tshikoka hanshi ha bintampi bu mudi tshiamu tshia kushihula nʼatshi tshishiya.

³¹Yeye udi uhunja mai male bua asa be bu mudi mai asaba mu tshivuadi. Udi utuntumika mai manene bu mudi manyi a kulaba ha mputa atutuka mu mulondo.

³²Udi ushiya mulanjilanji mu mai ukenka ku nyima kuandi, mukuabo wakadi welangana meji ne. Mai manene adi ne nvi mitoke tô.

³³Kakuena nyama mukuabo bu yeye hanshi ha buloba, udi mufukibue kayi ne buowa.

³⁴Yeye udi utangila bintu bionso bidi bidibandisha, ubihetula; udi mukelenge wa nyama yonso idi iditumbisha.