Read tshiluba Yobo 6 Bible Online

Yobo 6 - tshiluba bible

Yobo 6

¹Hashishe, Yobo wakandamuna ne,

²Nakadi kusua bua bujitu bua ntatu yanyi buidikishibue bimpe, ne bua bateke makenga anyi onso mu tshiamu tshia kuidikisha nʼatshi bujitu!

³Nunku biakadi kutamba nsenga ya ku mai manene bujitu; bua bualu ebu mei anyi akadi a lukasa lukasa.

⁴Bualu bua mikete ya Wa Bukole Buonso idi munda muanyi, muoyo wanyi udi unua lulengu luai; malu adi Nzambi untshinyisha nʼau adi mela mualu wa nvita ku mpala kuanyi.

⁵Mpunda wa mu tshisuku udi udila muadi hikaleye ne mashinde a kudia, anyi? Ngombe kabidi udi udila muadi hikaleye ne bia kudia, anyi?

⁶Badi badia tshintu tshitshihala tshianana kabayi belamu luehu, anyi? Kutua kuimpe kudi mu milembulembu ya makela, anyi?

⁷Mutshima wanyi udi ubenga kubilenga; bidi bu bia kudia bidi butonda!

⁸Nakadi kusua bua bualu bundi ndomba buenjibue, ne bua Nzambi itabushe bua kumpa muanda undi njinga!

⁹Nakadi kusua bua Nzambi ikale ne disanka bua kumbutula; bua yeye alekele kukanda tshianza tshiandi ne ahempe muonshi wa muoyo wanyi!

¹⁰Nunku busambi buakadi kuikala kundi; nakadi kutungila mu kanyinganyinga kadi kakayi kandekela, bua muanda eu ne, Tshiakubenga mei a Wa Tshijila.

¹¹Ndi ne bukole kai bua meme kumanya mua kuindila talalâ? Nshikidilu wanyi neikale tshinyi bua meme ngikale ne lutulu?

¹²Bukole buanyi budi bu bua mabue, anyi? Mubidi wanyi udi bu wa tshiamu tshia mitaku, anyi?

¹³Bushuwa, kakuena bualu munda muanyi budi mua kunkuatshisha, ne meji akadi mua kunsungila akûmushibua kundi.

¹⁴Kudi muntu udi wamba kuhanga bidi bimpe bua mulunda wandi kumulesha luse, anyi bumue nealekele dishina dia Wa Bukole Buonso.

¹⁵Bana betu bakundinga bu musulu wa mai udi uhasalala, udi ûma ku nyima, bu nshila wa misulu ya mai idi ikama.

¹⁶Idi ne mai mafike bualu bua mabue a mashika[9] adimu, ne bua neige udi usokomamu.

¹⁷Mu tshikondo tshidi munya utema idi ijimina; hatema munya bikole, idi ikama ne idi yumushibua mu miaba yai.

¹⁸Bisumbu bia bena luendu bidi bisesuka mu nshila yabo; bidi bibuela mu tshihela tshia lusenga, bidi bifua.

¹⁹Bena luendu ba ku Tema bakakeba mai, bisumbu bia bena luendu ba ku Sheba biakâtekemena.

²⁰Bakafuishibua bundu bualu bua bakâeyemena, bakafika kudiu, bakatamuka.

²¹Nuenu nudi nanku kundi mpindiu, nudi numona dikenga dianyi, ne buowa budi bunukuata.

²²Nakunulomba bua kumpa tshintu, anyi? Nakunulomba bua kunfidila mbueshilu, anyi?

²³Nakunulomba bua kunsungila mu bianza bia muena lukuna, anyi? Nakunulomba bua kumpikula mu bianza bia banyengi ba bintu, anyi?

²⁴Nunyishe, meme nempuwe bianyi; nundeshe bimpe bu mundi muhange.

²⁵Monai mudi mei malelela ne bukole bua kutuisha muntu! Kadi kubela kuenu kudi kunfuisha ku bubi kai?

²⁶Nudi nuelangana meji bua kungela bua mei anakuamba, anyi? Kadi mei a muntu udi ne bualu budi kumuhita bukole adi bu luhehele.

²⁷Bulelela, nuenu nudi basue kuelela muanʼa nshiya nshobo, nudi basue kuenduluka mushinga ne mulunda wenu!

²⁸Nuanji kuitabusha bua kuntangila ku mesu; bulelela, tshiena ndinga ku mesu kuenu nansha.

²⁹Ndi nnusengelela ne, Lekelai bualu budi kabuyi buakane; e, vulukai, buakane buanyi butshidi bujalame munda muanyi.

³⁰Bualu bubi budi buambibua ku ludimi luanyi, anyi? Meme tshiena mua kujingulula malu adi kâyi makane mukana muanyi, anyi?