Read tshiluba Misambu 103 Bible Online

Misambu 103 - tshiluba bible

Misambu 103

¹Mutshima[95] wanyi, uvudishile Yehowa disanka; bionso bidi munda muanyi bivudishile dina diandi dia tshijila disanka!

²Mutshima wanyi, uvudishile Yehowa disanka; kuhu muoyo bua masanka onso akutuheye:

³Udi umbuikidila malu mabi ebe onso, udi ushikisha mabedi ebe onso;

⁴udi uhikula muoyo webe ku dibutuka, udi ukuteka luse lujalame ne dinanga ha mutu hebe;

⁵udi ukuatshisha ne bintu bimpe bidimu biebe bionso, nunku bukole bua bunsongalume buebe budi buhingane bu bua nyunyu wa mukanku.

⁶Yehowa udi wenza bienzedi biakane, udi ulumbulula biakane bua kukuatshisha bonso badi bakengeshibua.

⁷Wakalesha Mose nshila yandi, ne Bena Isalele bienzedi biandi.

⁸Yehowa udi ne luse ne dinanga, kena ukuata tshiji lubilu, ud mûle tente ne dinanga dijalame.

⁹Kena utandangana nʼetu tshiendelele, kena ushala ne tshiji tshiandi kashidi.

¹⁰Kena mutuenzele bu mudi mibi yetu, kena mutufute bu mudi malu etu a tshishiku.

¹¹Bua bu mudi diulu kulu kule ha mutu ha buloba, mbu mudi bunene bua luse luandi lujalame kudi badi bamunemeka.

¹²Bu mudi luseke lua esete kule ku wesete, mbu mudiye mumushe matombokela etu kule kutudi.

¹³Bu mudi tatu ufuila bana bandi luse, mbu mudi Yehowa ufuila badi bamunemeka luse.

¹⁴Bua yeye udi mumanye buntu buetu, udi uvuluka ne tudi dinfuenkenya.

¹⁵Bua mundi matuku andi adi bu mashinde, udi utumpuka bu tshilongo tshia mu budimi.

¹⁶Bualu bua luhehele ludi luheha hamʼbidi hatshi, tshidi tshijimina, muaba watshi kawena mutshimanye kabidi.

¹⁷Kadi luse lujalame lua Yehowa ludi ku tshibangidilu tô ne kunshikidilu kudi badi bamunemeka. Buakane buandi budi kudi bana ba bana baledibue.

¹⁸Bidi kudi badi batumikila tshihungidi tshiandi, ne kudi badi bavuluka mikenji yandi bua kuyenza.

¹⁹Yehowa wakajadika nkuasa wandi wa butumbi mu diulu, buandi budi bukokesha ku mutu kua bantu bonso.

²⁰Nuvudishile Yehowa disanka, nuenu banjelo bandi, badi bena bukitu mu bukole buabo, badi benza dî didiye wamba, badi batumikila dî dia mukenji wandi

²¹Nuvudishile Yehowa disanka, nuenu ba mu misumba yandi yonso, nuenu bakuatshi bandi ba mudimu badi benza mudiye musue.

²²Nuvudishile Yehowa disanka, nuenu bifukibua biandi bionso, mu miaba yonso ya bukokeshi buandi. Mutshima[96] wanyi, uvudishile Yehowa disanka!