Read tshiluba Misambu 109 Bible Online

Misambu 109 - tshiluba bible

Misambu 109

¹Nzambi undi ntumbisha kuhuwu biebe talalâ!

²Bualu bua mukana mua muntu mubi ne mua mashimi mudi mubulula bua kumbanda. Bakunsonguela ne ndimi idi yamba mashimi.

³Bakanyunguluka ne mei a lukuna kabidi, bakumbunda tshiyi ne bualu.

⁴Nansha meme mubanange, badi bambanda hatuhu; kadi ndi mbalombela Nzambi.

⁵Bakumpingashila malu mabi ku malu mimpe kabidi, ne lukuna bu difutu bua dinanga dianyi.

⁶Sungula biebe muntu mubi bua kuikaleye ku mutu kuandi; mumubandi wandi imane ku tshianza tshiandi tshia balume.

⁷Hamulumbuluishabo, aluhuke mu tshilumbuluidi mumane kuhila, mulombu wandi ubadibue kudiye bu bubi.

⁸Matuku andi ikale manya-manya; munga muntu angate butangidi[110] buandi

⁹Bana bandi bikale bana ba nshiya, mukashi wandi ikale mukashi wa mu lufuila.

¹⁰Bana bandi bikale bena tshiendenda, balombe biabo bintu. Badikebele[111] bia kudia biabo kule ku miaba mibutuke idibo bashikame.

¹¹Musombeshanganyi angate bintu bionso bidiye nʼabi ku mateyi andi. Benyi bahaule bionso biakuheteye ku mudimu wandi.

¹²Muntu kamufuidi luse; muntu kafuidi bana bandi ba nshiya luse.

¹³Tunkanunuma tuandi tujimishibue; dina diandi dijimine mu tshikondo tshidi tshilonda.

¹⁴Malu a tshishiku a batatu bandi avulukibue ku mpala kua Yehowa kababuikidi bubi bua mamuʼandi.

¹⁵Malu â ikale ku mpala kua Yehowa misangu yonso, bua yeye umushe divuluka dia bantu aba ha buloba.

¹⁶Bualu bua muntu au kakavuluka bua kulesha bantu luse, kadi wakakengesha muena dikenga ne muntu muhele, wakakengesha muena mutshima munyingalala, bua kubashiha.

¹⁷Wakananga kuela kua mulau kabidi; mulau umukuate yeye! kakasua kuvudishila muntu disanka; disanka dikale kule kudiye!

¹⁸Wakadiluatshisha kuela kua mulau bu muakadiye uluata tshivualu; mulau ubuele biau tô ne munda muandi bu mai, ubuele biau bu manyi mu mifuba yandi.

¹⁹Wikale biau kudiye bu tshmialu tshidiye udiluatshisha nʼatshi, bu mukaba udiye udijingila nʼau matuku onso.

²⁰Edi nedikale difutu difume kudi Yehowa bua kufuta badi bambanda, dia bantu badi bambilangana malu mabi a kuenzela muoyo wanyi.

²¹Kadi wewe hebe, Yehowa Mukelenge wanyi, ungenzele meme hanyi bimpe bua dina diebe; bua luse luebe lujalame ludi luimpe, umpandishe bianyi.

²²Bualu bua ndi muena dikenga ne ndi muhele, ne mutshima wanyi udi mutahika ka mputa munda muanyi.

²³Nyaya bu mundidimbi haleheshibuau, badi bangumusha bu mudibo batutula mukumbi hamʼbidi.

²⁴Binu bianyi bidi bitekete bualu bua kujila kuanyi kua bidia; mubidi wanyi wakunyana.

²⁵Nakulua tshintu tshidibo badiula; hantangilabo, badi bakuha mitu yabo.

²⁶Unkuatshishe, Yehowa Nzambi wanyi; unsungile bua luse luebe lujalame.

²⁷Bamanye biabo ne, Etshi tshianza tshiebe; ne wewe muine, Yehowa, wakuenza bualu ebu.

²⁸Nansha bobo bangele mulau, kadi wewe unvudishile disanka. Badi bajuka bua kufuilangana nʼanyi bafuishibue bundu, kadi muntu webe asanke biandi.

²⁹Badi bambanda bavuale dinyanguka dia lumu luabo, badibuikile ne bundu bu mudi mu ntu mudibuikile tshikowelu:

³⁰Nensakidile Yehowa bikole ne mei a mukana muanji, nemmutumbishe munkatshi mua bantu ba bungi.

³¹Bualu bua yeye udi wimana ku tshianza tshia balume tshia muhele, bua kumusungila mu bianza bia badi bakeba kumuhisha.