Read tshiluba Misambu 118 Bible Online

Misambu 118 - tshiluba bible

Misambu 118

¹Sakidilai Yehowa, bualu bua yeye udi muimpe; bua luse luandi ludi lujalame tshiendelele.

²Bena Isalele bambe biabo ne, Luse luandi ludi lujalame tshiendelele.

³Ba mu nsubu wa Alona bambe biabo ne, Luse luandi ludi lujalame tshiendelele.

⁴Badi banemeka Yehowa bambe biabo ne, Luse luandi ludi lujalame tshiendelele.

⁵Mu makenga anyi nakabikila Yehowa; Yehowa wakitaba kundi, wakansulula, wakanteka mu muaba munene.

⁶Yehowa[118] udi nʼanyi, tshiena ntshina nansha. Muntu udi mua kungenzela tshinyi?

⁷Yehowa udi nʼanyi, udi mukuatshishi wanyi; nunku nentangile bualu bundi musue bukuata badi nʼanyi lukuna.

⁸Kunyemena kudi Yehowa kudi kuhita kueyemena muntu buimpe.

⁹Kunyemena kudi Yehowa kudi kuhita kueyemena bakelenge buimpe.

¹⁰Ba mu bisamba bionso badi bannyunguluka; mu dina dia Yehowa nembakose bituha.

¹¹Badi bannyunguluka; bulelela, badi bannyunguluka nseke yonso; mu dina dia Yehowa nembakose bituha.

¹²Badi bannyunguluka bu mbulubulu, badi batema bu mudi kadilu ka mingonga ya meba kajikuka. Mu dina dia Yehowa nembakose bituha.

¹³Wewe, muena lukuna, wakanunkila bua meme kuhona hanshi, kadi Yehowa wakankuatshisha.

¹⁴Yehowa udi bukole buanyi ne musambu wanyi, yeye wakulua luhandu luanyi.

¹⁵Mbila ya disanka ne ya luhandu lua mu nvita idi yunvuika mu nsubu ya ntenta ya bantu bakane; tshianza tshia bukole tshia Yehowa tshidi tshienza malu a bukitu;

¹⁶tshianza tshia bukole tshia Yehowa tshiakubandishibua, tshianza tshia bukole tshia Yehowa tshidi tshienza malu a bukitu.

¹⁷Tshiena ufua nansha, nengikale ne muoyo, nendondele bantu bienzedi bia Yehowa.

¹⁸Yehowa wakunkengesha bikole, kadi kakanfikisha ku lufu.

¹⁹Ungunzuluile bibi bia ku buakane; nembuelemu, nengele Yehowa tuasakidila.

²⁰Etshi ntshibi tshia Yehowa; bantu bakane nebabueleku.

²¹Nenkuhe tuasakidila, bualu bua wakuitaba kundi, wakulua luhandu luanyi kabidi.

²²Dibue[119] diakahidiabo kudi bibaki ba nsubu diakulua mutu wa ditumba.

²³Mudimu eu ngua Yehowa, udi bualu bua kukema ku mesu kuetu.

²⁴Edi ndituku didi Yehowa mujadike; tusanke bietu, disanka dietu dikalemu.

²⁵Tudi tukusengelela, Yehowa, ne, Utusungile. Yehowa, ludi tukusengelela ne, Ututumme diakalengele.

²⁶Udi[120] ubuela mu nsubu wa Yehowa udi muvudishibue disanka! Tuetu tudi tukuvudishila disanka didi difumamu.

²⁷Yehowa udi Nzambi, yeye wakututemeshila munya. Suikai[121] nyama wa mulambu ne mionshi, umulombole tô ne ku nsengu ya ha tshioshelu.

²⁸Wewe udi Nzambi wanyi, nenkuele tuasakidila; wewe udi Nzambi wanyi, nenkutumbishe.

²⁹Sakidilai Yehowa, bualu bua yeye udi muimpe; bua luse luandi ludi lujalame tshiendelele!