Read tshiluba Misambu 119 Bible Online

Misambu 119 - tshiluba bible

Misambu 119

¹Disanka didi kudi badi bajalame tshishiki mu bienzedi biabo, badi balonda mikenji ya Yehowa!

²Disanka didi kudi badi banemeka mei andi, badi bamukeba ne mitshima yabo mijima.

³Bulelela, kabena benza malu mabi, badi benda mu nshila yandi.

⁴Wewe wakajadika mikenji yebe bua tuetu tuyenze ne dinanukila.

⁵Bienzedi bianyi bikale bishindame bua meme kutumikila mikenji iwakunfundila!

⁶Nunku tshifuishibu bundu handi mmona mikenji yebe yonso bimpe.

⁷Nenkuele tuasakidila ne buakane bua mutshima, hanamanya kulumbulula kuebe kuakane.

⁸Nentumikile mikenji iwakunfundila; kundekedi kashidi nansha.

⁹Nsongalume nealengeshe bienzedi biandi munyi? Adimuke biandi bu mudi dî diebe diamba.

¹⁰Nenkukebe ne mutshima wanyi mujima; kuitabushi bua meme kusesuka ku mikenji yebe.

¹¹Nakulama dî diebe mu mutshima wanyi, bua meme tshikuenzedi bibi.

¹²Wewe Yehowa, usankishibue, unyishe mikenji yebe mifunda.

¹³Mishiku yanyi idi ilondela bantu kulumbulula kuonso kua mukana muebe.

¹⁴Ndi ne disanka mu dilonda dia mei ebe, bu mundi nsanka mu bubanji buonso.

¹⁵Nengelangane meji bua mikenji yebe, nendamate mu nshila yebe.

¹⁶Nendisankishe mu mikenji yebe mifunda, tshiena mpua dî diebe muoyo.

¹⁷Wenzele muntu webe malu mimpe makumbane, bua meme ngikale ne muoyo, ne bua ntumikile dî diebe.

¹⁸Utabashe mesu anyi, bua meme kumona malu a kukema a mu mikenji yebe.

¹⁹Ndi muenyi ha buloba ebu; kusokoki mikenji yebe kundi.

²⁰Muoyo wanyi udi muhandike bua dijinga dindi nʼadi ku kulumbulula kuebe kuakane misangu yonso.

²¹Wewe udi ubela badi badisue, badi bedibue mulau, badi bahambuka ku mikenji yebe.

²²Ungumushile dihetu ne kulengulula, bualu bua nakulama mei ebe awakummanyisha.

²³Hashikama baminyampala bangelela tshifufu, muntu webe nêlangane meji a mikenji yebe mifunda.

²⁴Mei ebe awakammanyisha adi disanka dianyi, adi bu bantu badi bandesha meji.

²⁵Muoyo wanyi udi ulamata ku luhuishi; unsangashe kabidi bu mudi di diebe.

²⁶Nakakulondela bienzedi bianyi, ne wewe wakungitaba. Unyishe mikenji yebe mifunda.

²⁷Unjinguluile nshila wa malu audi musue ngenze, ne nengelangane meji a bienzedi biebe bia kukema.

²⁸Muoyo wanyi udi wenguluka bua kanyinganyinga; unkankamishe bu mudi dî diebe.

²⁹Ungumushile nshila wa mashimi, unyishe mikenji yebe bua dinanga diebe.

³⁰Nakusungula nshila wa lulamatu lua bushuwa, nakuteka mei ebe majalame ku mpala kuanyi.

³¹Ndi ndamata ku mei ebe awakummanyisha; Yehowa kunfuishi bundu nansha.

³²Nenyemene mu nshila wa mikenji yebe, hawadiundisha mutshima wanyi.

³³Yehowa, unyishe nshila wa mikenji yebe mifunda, nendamatemu tô ne kunfudilu kuandi.

³⁴Umpe lungenyi, bua ndame mikenji yebe; ne bua meme kuyitumikila ne mutshima wanyi mujima.

³⁵Ungendeshe mu nshila wa mikenji yebe, bualu bua ndi ne disanka bualu buai.

³⁶Inyika mutshima wanyi bua kulondau mei awakummanyisha, kûkumishi ku lukuka lua luhetu.

³⁷Ukudimune mesu anyi bua kâtangidi malu a hatuhu, usangashe muoyo wanyi mu nshila yebe.

³⁸Ujadikile muntu webe mulayi webe kudiye, wowo udiku bua badi bakunemeka.

³⁹Ungumushile tshihendu tshindi ntshina, bualu bua mei ebe majalame adi mimpe.

⁴⁰Mona, nakujinga malu awakunsunguila bua meme kuenza, usangashe muoyo wanyi mu buakane buebe.

⁴¹Yehowa, luse luebe lujalame lufike kundi, nduhandu luebe mene, bu mudi mulayi webe.

⁴²Nunku nengikale ne dî dia kukudimuna muntu udi umpenda, bualu bua ndi ngeyemena dî diebe.

⁴³Kungumutshidi dî dia bushuwa mukana muanyi kashidi; bualu bua ndi ne ditekemena mu mei ebe majalame.

⁴⁴Nunku nentumikile mikenji yebe matuku onso, tô ne tshiendelele mene.

⁴⁵Nengendakane mu budishikaminyi, bualu bua nakakeba kuenza malu a wakungambila.

⁴⁶Nengambe kabidi mei ebe awakammanyisha ku mesu kua bakelenge, ne tshiena nkuatshika bundu.

⁴⁷Nendisankishe mu mikenji yebe, indi nnanga.

⁴⁸Nengolole bianza bianyi kabidi ku mikenji yebe, indi nnanga. Nengelangane meji a mikenji yebe mifunda.

⁴⁹Uvuluke mulayi webe kudi mu ntu webe, uwakubuesha nʼau ditekemena munda muanyi.

⁵⁰Ebu mbusambi buanyi mu dikenga dianyi ne, Mulayi webe udi usangasha muoyo wanyi.

⁵¹Badi badisue bakutamba kunseka, kadi tshiakusesuka ku mikenji yebe.

⁵²Nakuvuluka mei ebe majalame a kale, Yehowa, nakukolesha mutshima wanyi.

⁵³Tshiji tshikole tshiakunkuata bualu bua bantu babi, badi balekela kutumikila mikenji yebe.

⁵⁴Mikenji yebe mifunda yakuikala misambu yanyi mu nsubu mundi mushikame bu muena luendu.

⁵⁵Ndi nvuluka diha diebe butuku, Yehowa, ndi ndonda mikenji yebe.

⁵⁶Ebu mbualu buimpe bundi nʼabu, bualu bua nakatumikila mei awakangambila.

⁵⁷Yehowa udi buhianyi buanyi; nakuamba ne, Nendame mei ebe.

⁵⁸Nakulomba luse luebe ne mutshima wanyi mujima; unfuile luse bu mudi mulayi webe.

⁵⁹Nakelangana meji a bienzedi bianyi, nakahingasha makasa anyi ku mei awakatumanyisha.

⁶⁰Nakenda lukasa, tshiakajanguluka, bua kulonda mikenji yebe.

⁶¹Mionshi ya bantu babi yakunjingila, kadi tshiakuhua mikenji yebe muoyo.

⁶²Ndi mbika mundankulu bua kukuela tuasakidila, bualu bua mei ebe makane majalame.

⁶³Ndi mulunda wa bonso badi bakunemeka, ne wa bonso badi benza bu mudi mei ebe amba.

⁶⁴Yehowa, buloba budi bûle tente ne luse luebe lujalame; unyishe mikenji yebe mifunda.

⁶⁵Wewe wakuenzela muntu webe bimpe, Yehowa, bu mudi dî diebe.

⁶⁶Unyishe dijingulula dimpe dia malu ne meji, bualu bua nakueyemena mikenji yebe.

⁶⁷Diambedi tshiyi muanze kukengeshibua, nkadi mpambuka mu nshila, kadi mpindiu ndi ntumikila dî diebe.

⁶⁸Wewe udi muimpe, utu wenza bimpe; unyishe mikenji yebe mifunda.

⁶⁹Badi badisue badi banshiminyina[122] bikole, kadi nendame mei awakungambila ne mutshima wanyi mujima.

⁷⁰Mitshima yabo yakuvunda ne manyi, kadi ndi nsanka mu mikenji yebe.

⁷¹Bidi bimpe kundi bua nakukengeshibua, bua nyile bianyi mikenji yebe mifunda.

⁷²Mikenji ya mukana muebe idi ihita bituha binunu bia biamu bia or ne bia argent kundi.

⁷³Bianza biebe biakunfuka, biakunvuisha bu mundi; Umpe lungenyi bua meme kuyila mikenji yebe.

⁷⁴Badi bakunemeka nebantangile, ne basanke, bualu bua nakutekemena dî diebe.

⁷⁵Yehowa, ndi mumanye ne, Kulumbulula kuebe kudi kuakane, ne bua lulamatu luebe lua bushuwa wewe wakunkengesha.

⁷⁶Ndi nkusengelela ne, Luse luebe lujalame luikale busambi buanyi, bu muwakalaya muntu webe.

⁷⁷Luse luebe lufike kundi, bua ngikale bianyi ne muoyo; bualu bua mikenji yebe idi disanka dianyi.

⁷⁸Badi badisue bafuishibue bundu, bualu bua bakunyanga bualu buanyi ne mashimi abo; meme hanyi nengelangane meji bua mei audi ungambila.

⁷⁹Badi bakunemeka balukile kundi, ne bobo badi bamanye mei ebe awakammanyisha.

⁸⁰Mutshima wanyi wikale muakane tshishiki mu kulamata kua mikenji yebe mifunda bua tshifuishibu bundu ku mesu.

⁸¹Muoyo wanyi udi muhungile ne dijinga dia luhandu luebe, ndi ntekemena dî diebe.

⁸²Mesu anyi adi ateketa handi ngindila mulayi webe, handi nkonka ne, Wewe neunsambe diba kai?

⁸³Bualu bua nakulua bu mulondo wa tshiseba wa nyinyo ba muishi wa kahia; kadi tshiena muhue mikenji yebe mifunda muoyo.

⁸⁴Matuku a muena mudimu webe adi bungi munyi? Wewe neulumbuluishe badi bankengesha dituku kai?

⁸⁵Badi badisue bakungumbuila majimba, badi kabayi balonda mikenji yebe.

⁸⁶Mikenji yebe yonso idi mua kueyemenyibua. Badi bankengesha ne bimbandidi bia mashimi; unkuatshishe!

⁸⁷Bakamba kummana kaba kabalê ha buloba, kadi tshiakalekela kutumikila mei ebe mafunda.

⁸⁸Usangashe muoyo wanyi bu mudi luse luebe lujalame, bua ndame mikenji ya mukana muebe.

⁸⁹Yehowa, dî diebe didi dishindame mu diulu tshiendelele.

⁹⁰Lulamatu luebe lua bushuwa ludiku tô ne ku bikondo bionso; wewe wakujadika buloba, ne budi bushindama.

⁹¹Bidi bishindama tô ne dituku edi, bu mûdi ubielela mikenji bua bintu bionso bidi bikukuatshidi bia mudimu.

⁹²Bu mikenji yebe kayiyi mikale disanka dianyi, nakadi kujimina mu makenga anyi.

⁹³Tshiena mpua mei audi ungambila muoyo kashidi, bualu bua wewe wakusangasha nʼau muoyo wanyi.

⁹⁴Meme ndi webe, nusungile, bualu bua nakukeba kumanya mei ebe awakungambila.

⁹⁵Bantu babi badi bangalamina bua kunshiha, kadi nengelangane meji a mikenji yebe ne dinanukila.

⁹⁶Nakumona kunfudilu kua malu onso makane, kadi mukenji webe udi ne butshiama budi butamba bunene.

⁹⁷Mona mundi munange mikenji yebe! Ndi ngelangana meji bualu buai dinda tô ne ku dilolo.

⁹⁸Mikenji yebe idi invuisha muhitshi wa bena lukuna banyi meji; bualu bua yoyo itu yikala munda muanyi matuku onso.

⁹⁹Ndi ntamba bayishi banyi bonso kujingulula malu, bualu bua mikenji yebe idi mu meji andi ngela.

¹⁰⁰Ndi mpita bantu banunu kujingulula malu, bualu bua nakulama mei awakungambila.

¹⁰¹Ndi nkanda makasa anyi bua kaendedi mu nshila yonso mubi, bua ntumikile dî diebe.

¹⁰²Tshiakuehuka ku mei ebe majalame, bualu bua wewe muine wakunyisha.

¹⁰³Mona mudi mei ebe mashemakane handi ngalabula, mahite buitshi kushemakana mukana muanyi!

¹⁰⁴Ndi mpeta lungenyi ku mei audi ungambila, nunku ndi nkina nshila yonso ya mashimi.

¹⁰⁵Dî diebe didi muinda ku makasa anyi ne munya muteme mu nshila wanyi.

¹⁰⁶Nakuditshiha, nengenze munakuditshiha ne, Nentumikile mei ebe makane majalame.

¹⁰⁷Ndi mukengeshibue bikole; usangashe muoyo wanyi, Yehowa, bu mudi dî diebe.

¹⁰⁸Yehowa, witabushe mei adi mukana muanyi mufile kûdi bu milambu ya luse; unyishe mei ebe majalame.

¹⁰⁹Muoyo wanyi udi mu muaba wa njiu matuku onso, kadi tshiena mpua mikenji yebe muoyo.

¹¹⁰Bantu babi bakunteya buteyi, kadi tshiakuehuka ku mei awakungambila.

¹¹¹Nakuangata mikenji yebe bu bubianyi tshiendelele, bualu bua idi disanka dia mu mutshima wanyi.

¹¹²Nakuinyika mutshima wanyi bua kuenzau mikenji yebe mifunda tshiendelele tô ne kunshikidilu mene.

¹¹³Ndi nkina bena mitshima ibidi; kadi ndi nnanga mikenji yebe.

¹¹⁴Wewe udi tshisokomenu tshianyi ne ngabu wanyi; ndi ntekemena dî diebe.

¹¹⁵Nuenu benji ha malu mabi, umukai kundi, bua meme kutumikila mikenji ya Nzambi wanyi.

¹¹⁶Unjadike bu mudi mulayi webe, bua ngikale bianyi ne muoyo; tshifuishibu bundu mu ditekemena dianyi.

¹¹⁷Ungimanyike kulu, bua mpanduke bianyi, ndi nnanukila kutangila mikenji yebe mifunda matuku onso.

¹¹⁸Wewe udi ulengulula bonso badi behuka ku mikenji iwakubafundila; bua malu adibo badingangana nʼau adi hatuhu.

¹¹⁹Wewe udi umana bantu babi bonso ba ha buloba bu mudi mualu umusha tshikanganya; bua muanda eu ndi nnanga mikenji idi ilesha bu mûdi.

¹²⁰Mubidi wanyi udi uzakala bua dikutshina dianyi; ne ndi ntshina kulumbulula kuebe.

¹²¹Nakuenza bienzedi bualame ne biakane, kundekedi mu bianza bia bankengeshi.

¹²²Wikale tshieya kudi umena mudimu webe bua kumuenzela bimpe; badi badisue kabankengeshi nansha.

¹²³Mesu anyi adi ateketa ne ditekemena diau dia luhandu luebe, ne dia dishikisha dia mulayi webe muakane.

¹²⁴Wenzela muena mudimu webe bu mudi luse luebe lujalame; unyishe mikenji yebe mifunda.

¹²⁵Ndi muena mudimu webe; umpeshe lungenyi, bua mmanye bianyi mikenji yebe idi ilesha bu mûdi.

¹²⁶Tshikondo tshiakufika bua Yehowa kuenza mudimu[123] wandi wa kulu mbuluisha, bua bantu aba bakavuisha mikenji yebe ne ntshianana.

¹²⁷Bua malu â ndi ntamba kunanga mikenji yebe ku mpala kua tshiamu tshia or; e, ku mpala kua or mufula mu ditanda.

¹²⁸Bua malu a ndi[124] mbala mei ebe onso audi ungambila ne, Adi makane; ndi nkina nshila yonso wa mashimi.

¹²⁹Mikenji yebe idi ilesha bu mûdi idi ya dikema, nunku muoyo wanyi udi uyilama.

¹³⁰Kubulula kua mei ebe kudi kutemeshila bantu munya, kudi kuhesha muntu mutshimbakane lungenyi.

¹³¹Nakubuela mukana muanyi bu tshibalubalu, nakuhuyakana, bualu bua nakujinga mikenji yebe.

¹³²Ukudimune mpala webe kundi, undeshe dinanga, bu mutu wenzela badi bananga dina diebe.

¹³³Ujadike biendedi bianyi mu dî diebe, kuitabushi bua dihambuka dia ku buakane dinkokeshe.

¹³⁴Umpikule ku dikengesha dia bantu, bua ndame mei audi ungambila.

¹³⁵Utemeshile muena mudimu webe mpala webe, unyishe mikenji yebe mifunda.

¹³⁶Mesu anyi adi ahatula binsonshi bu misulu ya mai; bualu bua bantu kabena batumikila mikenji yebe.

¹³⁷Yehowa, wewe udi muakane, kulumbulula kuebe kudi kuakane kabidi.

¹³⁸Wewe wakujadika mikenji yebe mu buakane buebe ne mu lulamatu luebe lua bushuwa luhita bunene.

¹³⁹Lukunukunu luanyi luakunshiha, bualu bua bena lukuna banyi badi bahua mei ebe muoyo.

¹⁴⁰Dî diebe didi dilengeshibue tshishiki, nunku muena mudimu webe udi nʼadi dinanga.

¹⁴¹Ndi muntu wa hatuhu, ndi muhetudibue, kadi tshiena mpua mei audi ungambila muoyo.

¹⁴²Buakane buebe budi buakane bua kashidi, mikenji yebe idi ya bushuwa.

¹⁴³Dikenga ne kanyinganyinga biakunkuata, kadi mikenji yebe idi disanka dianyi.

¹⁴⁴Mikenji yebe idi ilesha bu mûdi idi miakane tô ne kashidi, umpeshe lungenyi bua ngikale ne muoyo.

¹⁴⁵Ndi nkubikila ne mutshima wanyi mujima; witabe kundi, Yehowa. Nendame mikenji yebe mifunda.

¹⁴⁶Ndi nkubikila; unsungile, bua ntumikile mikenji yebe idi ilesha bu mûdi.

¹⁴⁷Ndi ndianjila kubika butuku kabuyi buanji kutshia, ndi nkubikila, ndi ntekemena mei ebe.

¹⁴⁸Mesu anyi adi matahale diambedi mpolo ya kutentekela butuku kayiyi mianze kufika, bua ngelangane meji a mulayi webe.

¹⁴⁹Unvue dî dianyi bua luse luebe lujalame. Yehowa, usangashe muoyo wanyi bu mudi kulumbulula kuebe kuakane.

¹⁵⁰Badi balengesha bua malu mabi abo badi basemena ha buihi nʼanyi; badi kule ne mikenji yebe.

¹⁵¹Wewe Yehowa, udi ha buihi; mikenji yebe yonso idi ya bushuwa.

¹⁵²Katshia matuku mahite kele mikenji yebe idi ilesha bu mûdi yakammanyisha ne, Wewe wakajadika kuikalayiku tshiendelele.

¹⁵³Umone dikenga dianyi, umpandishemu, bualu bua tshiena mpua mikenji yebe muoyo.

¹⁵⁴Ungakuile tshilumbu tshianyi, umpikule; usangishe muoyo wanyi bu mudi mulayi webe.

¹⁵⁵Luhandu ludi kule ne bantu babi, bualu bua kabena bakeba mikenji yebe mifunda.

¹⁵⁶Luse luebe ludi lunene, Yehowa, usangashe muoyo wanyi bu mudi kulumbulula kuebe kuakane.

¹⁵⁷Bakengeshi banyi ne badi nʼanyi lukuna badi ba bungi, kadi tshiakuehuka ku mikenji yebe idi ilesha bu mûdi.

¹⁵⁸Nakatangila batungidi ba tshitungu, malu abo akantonda, bualu bua kabena batumikila dî diebe.

¹⁵⁹Elangana meji bu mundi munange mei audi ungambila! Yehowa, usangashe muoyo wanyi bu mudi luse luebe lujalame.

¹⁶⁰Dishina dia dî diebe mbushuwa, ne kulumbulula kuebe kuonso kudiku tshiendelele.

¹⁶¹Baminyampala bakunkengesha kakuyi bualu, kadi mutshima wanyi udi utshina anu mei ebe.

¹⁶²Ndi nsanka bua di diebe, bu mudibo basanka hasanganabo bintu bingi biakunyengabo mu nvita.

¹⁶³Ndi nkina mashimi, ndi ngalengulula, kadi ndi nnanga mikenji yebe.

¹⁶⁴Ndi nkutumbisha misangu muanda mutekete ku dituku ku dituku, bualu bua mei ebe makane majalame.

¹⁶⁵Badi bananga mikenji yebe badi ne ditalala dinene; kakuena tshidi mua kubalenduisha.

¹⁶⁶Ndi ntekemena luhandu luebe, Yehowa, ndi ngenza mudi mikenji yebe yamba.

¹⁶⁷Muoyo wanyi udi ulamata mikenji yebe idi ilesha bu mûdi; ndi ntamba kuyinanga.

¹⁶⁸Ndi ndama mei ebe ne mikenji yebe; bua nshila yanyi yonso idi ku mpala kuebe.

¹⁶⁹Kudila kuanyi kufike ku mesu kuebe, Yehowa; umpeshe lungenyi bu mudi dî diebe.

¹⁷⁰Kutendekena kuanyi kufike ku mesu kuebe; umpandishe bu mudi mulayi webe.

¹⁷¹Mishiku yanyi ikutumbishe, bualu bua wewe udi unyisha mikenji yebe mifunda.

¹⁷²Ludimi luanyi luimbe bua dî diebe, bualu bua mikenji yebe yonso idi miakane.

¹⁷³Tshianza tshiebe tshikaleku bua kunkuatshisha, bualu bua nakusungula mei audi ungambila.

¹⁷⁴Ndi njinga luhandu luebe, Yehowa, ne mikenji yebe idi disanka dianyi.

¹⁷⁵Mutshima[125] wanyi wikale ne muoyo, ne wowo neukutumbishe; mei ebe majalame ankuatshishe!

¹⁷⁶Nakuhambuka bu mukoko mujimine; ukebe muena mudimu webe, bualu bua tshiena mpua mikenji yebe muoyo.