Read tshiluba Misambu 139 Bible Online

Misambu 139 - tshiluba bible

Misambu 139

¹Yehowa, wewe wantangila munda muanyi, wakummanya!

²Wewe muine udi mumanye hanashikama hanshi ne hanajuka; udi ujingulula meji anyi hantshidi kule.

³Wewe udi ujingulula kuenda kuanyi ne kulala kuanyi hanshi, udi mumanye bienzedi bianyi bionso.

⁴Bua dî kadiyi dianze kuikala ku ludimi luanyi, ne mona, wewe Yehowa udi mudi manye tshishiki.

⁵Wewe udi unnyunguluka ku nyima ne ku mpala, udi uteka tshianza tshiebe hamʼbidi hanyi.

⁶Lungenyi alu nunku ludi lutamba kunkemesha; ludi lutamba bule, tshiena mua kuluheta.

⁷Kunyi kundi mua kuya kudi kakuyi Nyuma webe? Ndi mua kunyemena kudi kunyi kudi mesu ebe kâyi ammona?

⁸Binabanda mu diulu, wewe udiku! Binavuisha Muaba wa Bafue bu muaba wanyi wa kulala, mona wewe udiku!

⁹Binangata mahuahua a dinda, binaya kushikama mu nseke idi kunfudilu kua mai manene,

¹⁰tshianza tshiebe netshindomboleku, tshianza tshiebe tshia balume netshinkuateku.

¹¹Butamba bianyi ne, Bulelela mîdima neyimbuikile, ne munya udi unnyunguluka newikale bu butuku;

¹²mîdima mene kayena ijibakasha bintu bua kubisokoka kûdi, butuku budi butema bu munya; bua mîdima idi bu munya kûdi.

¹³Bua wewe wakafuka bituha bianyi bia munda mua mubidi, wakalamakasha bituha bianyi bia mubidi mu difu dia mamuʼanyi.

¹⁴Ndi nkusakidila, bualu bua difukibua dianyi didi dilengesha meji a mua kukunemeka bikole, didi dikemesha. Midimu yebe yonso idi malu a kukema; mutshima[136] wanyi udi mumanye bualu ebu bimpe.

¹⁵Mubidi wanyi kawakadi musokoka kûdi, hanakadi nfukibua mu busokoko, hakadi bituha bia mubidi wanyi bilamakasha mu ndondo ya buloba.

¹⁶Mesu ebe akamona bituha bia mubidi wanyi kabiyi bianze kulamakana. Matuku anyi onso akadi mafunda mu mukanda webe, matuku mene awakahangidisha bua meme ngikale ne muoyo, diambedi dituku dimue dia munkatshi muau kadiyi dianze kuikalaku.

¹⁷Nzambi, mona mudi meji ebe mikale a mushinga mukole kundi! Mona mudi bungi buau buhite bunene!

¹⁸Bu meme muâbale, akadi kuhita lusenga bungi. Hanatabala,[137] ntshidi nʼebe.

¹⁹Nzambi, bidi bimpe bua wewe ushihe bantu babi, ne bua[138] badi bamatshisha mashi a bantu bumuke kundi.

²⁰Badi bakutombokela ne mei abo mabi, badi nʼebe lukuna badi[139] batela dina diebe tshitelatela.

²¹Yehowa, tshiena nkina badi bakukina, anyi? Tshiena nyingalala bua badi bajuka bua kukutantamena, anyi?

²²Ndi mbakina ne lukuna lukole lua tshishiki; ndi mbabala bu bena lukuna banyi.

²³Nzambi, utangile munda muanyi, umanye mutshima wanyi. Untete, Umanye meji anyi.

²⁴Umone ne malu mabi adi munda muanyi, undombole mu nshila wa tshiendelele.