Read tshiluba Misambu 50 Bible Online

Misambu 50 - tshiluba bible

Misambu 50

¹Wa Bukole, Nzambi, Yehowa mene, wakuamba dî diandi, wakubikila buloba kudi kuhatuka diba tô ne kudi kubueladi.

²Mu muaba wandi wa mu Siona, udi mulengele tshishiki, Nzambi udi utema biandi.

³Nzambi wetu udi ulua, kena uhuwa talalâ, kahia kadi ku mpala kuandi kadi kosha bintu, tshihuhu tshitambe bukole tshidi tshimunyunguluka.

⁴Yeye udi wela dî kudi diulu didi mulu ne kudi buloba, bua yeye kulumbuluisha bantu bandi, wamba ne,

⁵Sangishai bienu bantu banyi ba tshijila kundi, bantu aba mene bakuhunga neanyi tshihungidi ku difila dia mulambu.

⁶Diulu didi diamba bua buakane buandi, bualu bua Nzambi muine udi mulumbuluishi.

⁷Unvuai, nuenu bantu banyi, nengakule; Bena Isalele, nennubande. Meme ndi Nzambi, Nzambi wenu mene.

⁸Tshiena nnubela bua milambu yenu; milambu yenu ya kuosha idi ku mpala kuanyi matuku onso.

⁹Tshiena ngitabusha ngombe umuehele wa ku nsubu yenu, anyi mpumbu ya mbushi ya mu mpangu yenu.

¹⁰Bualu bua nyama yonso wa muitu nguanyi, bimuna bia ha mikuna tshinunu mbianyi kabidi.

¹¹Ndi mumanye nyunyu yonso ya ha mikuna, ne tshionso tshidi tshiendakana mu mpata ntshianyi.

¹²Bu meme muikale ne nzala, tshiakadi kukuambila; bualu bua buloba mbuanyi ne tshiuwidi tshiabu tshionso ntshianyi.

¹³Ntu ngadia munyinyi wa ngombe, anyi? Ntu nganua mashi a mbushi, anyi?

¹⁴Fila mulambu wa disakidila kudi Nzambi, futa mitshihu yebe kudi Udi Mutambe Bunene wa mu Diulu.

¹⁵Umbikile mu dituku dia makenga; nenkuhandishe, ne wewe neuntumbishe.

¹⁶Kadi Nzambi udi webesha muntu mubi ne, Wewe udi ne bukokeshi kai bua kumanyisha bantu mikenji yanyi, anyi bua kubuesha mei a tshihungidi tshianyi mukana muebe?

¹⁷Bualu bua wewe udi ukina diyisha, udi wimasha mei anyi ku nyima kuebe.

¹⁸Hawamona muibi, udi usanka bua kuikala nʼandi; ne udi ukuata bulunda ne bendi ba masandi.

¹⁹Udi ufidisha mukana muebe bua kuambau malu mabi, ludimi luebe ludi lusangakasha mei a kudinga.

²⁰Udi ushikama hanshi, udi usonguela muanʼenu; udi wela muana wa mamu webe mene mukoso.

²¹Wewe wakuenza malu â, ne meme nakuhuwa talalâ. Wakuela meji munda muebe ne, Nzambi udi bu meme mu malu onso. Kadi ndi ngamba kukubela mpindiu ne kukulondela malu â ku mesu kuebe.

²²Telejai matshu enu ku dî edi, nuenu badi bahua Nzambi muoyo, bua meme tshinuhandi bihesa bihesa, kakuena wa mua kunuhandisha!

²³Udi ufila disakidila bu mulambu wandi udi untumbisha; nendeshe luhandu lua Nzambi kudi muntu udi ulongolola nshila wandi bimpe.