Read tshiluba Misambu 69 Bible Online

Misambu 69 - tshiluba bible

Misambu 69

¹Nzambi, usungile! Bualu hua mai akûla to ne mu muoyo wanyi.

²Ndi mpueka mu lunteke ludi kaluyi ne muaba wa meme kuimana. Nakafika mu mai a dilembue, mudi mai mashilangane adi ahita ha mutu hanyi.

³Ndi muhungile bualu bua kudila kuanyi, mununu wanyi wakûma bikole. Mesu anyi adi ne bileshileshi bua kuindila kua Nzambi wanyi.

⁴Badi nʼanyi lukuna kabayi mua kumbanda ne tshilumbu badi bahita nsuki ya ku mutu wanyi bungi. Badi basue kumbutula badi bakole, bikale bena lukuna banyi anu bua mashimi. Tshinakadi tshiyi munyenge ntshindi ne bua kuhingasha.

⁵Nzambi, wewe udi mumanye buhote buanyi; malu mabi anyi kaena masokokibue ku mesu kuebe.

⁶Kuitabushi bua badi bakutekemena bafuishibue bundu bua bualu buanyi, Mukelenge Yehowa wa misumba. Kuitabushi bua badi bakukeba bakeheshibue bua bualu buanyi, Nzambi wa Isalele.

⁷Bualu bua nakuitabusha bihendu bua bualu buebe, bundu buakunkuata ku mesu.

⁸Nakulua muenyi kudi bana betu, ne mulungidi kudi bana ba mamu wanyi.

⁹Lukunukunu lua ku nsubu webe luakundia, luakummana, ne bihendu bia bantu bakukuhenda biakuhona hamʼbidi banyi.

¹⁰Hanakanyingalasha muoyo[59] wanyi ne kujila kua bia kudia, bualu ebu buakalua tshihendu kundi.

¹¹Hanakavuisha bilulu bikayabala bivualu bianyi, nakalua bu lusumuinu kudibo.

¹²Badi bashikama mu tshibuelelu tshia ku musoko badi bayikilangana bualu buanyi; bakuatshiki ba maluvu badi bimba misambu bualu buanyi.

¹³Kadi meme hanyi, Yehowa, nenkutendelele ne mulombu wanyi. Mu tshikondo tshidi tshiakane ku mesu kuebe, Nzambi, mu kukumbana kua luse luebe lujalame, witabe kundi ne luhandu luebe ludi mua kueyemenyibua.

¹⁴Umpatule mu lunteke bua meme tshidinyimu, umpandishe mu bianza bia badi nʼanyi lukuna, umpatule mu mai a dilembue.

¹⁵Kuitabushi bua mai adi atuntumuka ahite ha mutu hanyi, kuitabushi bua ndondo wa mai ammine; Dijimba dia Bafue kadijibiki mukana muanyi ha mutu hanyi.

¹⁶Yehowa, witabe kundi, bualu bua luse luebe lujalame ludi luakane; bu mudi divulangana dia luse luebe, ukudimuke kundi.

¹⁷Kusokoki muntu webe mpala webe; bualu bua ndi mu dikenga, witabe kundi lukasa.

¹⁸Usemene ha buihi ne muoyo wanyi, ûhikule; umpikule bua bena lukuna banyi.

¹⁹Wewe udi mumanye bu mudibo bampenda, udi mumanye mudibo banfuisha bundu, ne mudibo bakebesha; bonso badi nʼanyi lukuna badi bamanyibue kudi.

²⁰Bihendu biakutamba kubanda mutshima wanyi, dinyingalala diakuntonda. Nakatekemena ne, Muntu neanfuile luse, kadi kakadiku; nakatekemena ne, Basambi nebamueneke, kadi tshiakasangana nansha umue.

²¹Bakumpa bintu bia nyongangandu mu bia kudia bianyi; bua kutalasha nyota yanyi bakannuisha nyinyo wakadi ne buanji.

²²Mesa adibo nʼau ku mpala kuabo andamuke, alue muba kudibo; hadibo bashikama mu ditalala, alue bukuondo kudibo.

²³Mesu abo ikale ne bileshileshi, hua kâmonyi, ukankishe bifuka biabo bua kabilekedi kukanka.

²⁴Uhumune tshiji tshiebe hamʼbidi habo, ditema dia tshiji tshiebe tshikole difike kudibo, dibakuate.

²⁵Tshitudilu tshiabo tshilue muaba wa dibutuka; muntu kashikama mu nsubu yabo ya ntenta.

²⁶Bualu bua badi bakengesha muntu uwakukuma; badi bambila bantu bua dikenga dia bawakutaha mputa.

²⁷Utenteke tshishiku ha mutu ha tshishiku tshidibo nʼatshi, kabafiki ku buakane buebe.

²⁸Mena abo ajimishibue mu mukanda wa muoyo, kabafundibu hohamue ne mena a bantu bakane.

²⁹Kadi meme hanyi ndi ne diakabi, ndi ne dikenga; luhandu luebe, Nzambi, lumbandishe kulu!

³⁰Nentumbishe dina dia Nzambi ne musambu, nemmunemeke ne kusakidila kuanyi.

³¹Bualu ebu nebusankishe Yehowa ne disanka dihite dia kufila kua ngombe, anyi diodi dia difila dia mulume wa ngombe udi ne nsengu ne bikono.

³²Bantu bahuekele bakatangila bualu ebu, bakasanka. Nuenu badi bakeba Nzambi, mitshima yenu ikale ne muoyo kabidi.

³³Bualu bua Yehowa udi unvua dî dia badi bakengela bintu, kena uhetula bantu bandi badi bakuatshibue mu nkanu.

³⁴Diulu ne buloba bimutumbishe, mai manene ne tshintu tshionso tshidi tshiendakanamu bimutumbishe.

³⁵Bualu bua Nzambi neasungile Siona, nease misoko ya mu Yuda kabidi; bantu bandi nebashikamemu, nebikale nʼandi bu musoko wabo.

³⁶Bana ba bantu bandi nebauhiane, ne badi bananga dina diandi nebashikamemu.