Read tshiluba Misambu 81 Bible Online

Misambu 81 - tshiluba bible

Misambu 81

¹Nuimbile Nzambi udi bukole buetu musambu ne dî dikole; nuelele Nzambi wa Yakoba mbila ya disanka!

²Nuambulule mei enu mu musambu, nuakuishe dikasa, nuimbe lunkombe ludi ne tshiona tshimpe, nuimbe hamue ne lunzenze.

³Nuele mpungi habala ngondo, ne halua ngondo tshibalu, mu dituku dietu dia bidia bia disanka.

⁴Bualu bua eu mmukenji mufundila Bena Isalele, ne dî dijalame diakela Nzambi wa Yakoba.

⁵Yeye wakajadikila Yosefe mukenji eu bu tshimanyishilu, hakahiteye mu buloba bua Ejipitu. Ndi ngunvua dî mu muaku unakadi tshiyi muanze kumanya ne,

⁶Nakatentumuna diaha diandi ku dituala dia bujitu, bianza biandi biakasululuka ku tshibondo.

⁷Wakungela dî hawakadi mu dikenga, nakakuhidisha; nakitaba kûdi mu tshisokomenu tshianyi tshia mukungulu; nakakuteta ku mai a Meliba.

⁸Unvuai, nuenu bantu banyi, nennudimushe. Nuenu Bena Isalele, nakadi kusua bua nuenu nunvue dî dianyi!

⁹Nzambi wa bende kikadi munkatshi muenu, kanukukuidi nzambi wa bantu ba bende.

¹⁰Meme ndi Yehowa Nzambi webe wakakuluhula mu buloba bua Ejipitu. Bulula mukana muebe bitongatonga, nemmûshe tente.

¹¹Kadi bantu banyi kabakunvua dî dianyi; Bena Isalele kabakasua kungitabusha, nansha kakese.

¹²Nunku nakabalekela bua kulondabo tshitshu tshia mu mitshima yabo, bua kuendabo mu nshila wakadi meji abo masungule.

¹³Nakadi kusua bua bantu banyi bunvue mei anyi, ne bua Bena Isalele bende mu nshila yanyi!

¹⁴Nakadi kutekesha bena lukuna babo lukasa, nakadi kukudimuna tshianza tshianyi bua kukengesha nʼatshi badi baluangana nʼabo.

¹⁵Badi ne Yehowa lukuna bakadi kulua kumukokela ne lubombo, kadi tshikondo tshia Bena Isalele tshiakadi kuleha to ne kashidi.

¹⁶Yeye wakadi kubadisha ne blé mutambe buimpe, nakadi kubukutshisha ne buitshi bua mu dibue.