Read tshiluba Misambu 83 Bible Online

Misambu 83 - tshiluba bible

Misambu 83

¹Nzambi, kuikadi biebe talalâ; kuhuwu biebe talalâ, Nzambi, kushikama hatuhu!

²Mona, badi nʼebe lukuna badi bateka diyoyo; badi bakukina bakuambula mitu yabo.

³Badi babangila malu a budimu a kuenzela bantu bebe; badi bela bifufu biabo hohamue bua kulekela bantu bawakusokoka diyoyo.

⁴Badi bamba ne, Luai, tubabutule bua kabikadi tshisamba tshia bantu kabidi; bua kabavuluki dina dia Bena Isalele kabidi tshiendelele!

⁵Bualu bua badi bela bifufu biabo hohamue ne mutshima umue, badi bahunga tshihungidi bua kukuenzela wewe bibi —

⁶Mbadi bashikame mu ntenta ya mu Edome ne ya Bena Yishemaele. Badi ba mu Moaba ne Bena Hagâ,

⁷mba mu Gebala, Amona ne Amaleka; badi ba mu Peleshete diatshimue ne badi bashikame mu Tulo.

⁸Ba mu Ashû kabidi bakudisangisha nʼabo; bobo badi diboko dikole dia bana ba Lota.

⁹Wenzele bantu aba bu muwakenzela Midiyana; bu muwakenzela Sisela ne Yabina ku musulu wa Kishona,

¹⁰bakashihibua ku Ene-dô, bakatua bu tunvi tua kuela ha buloba.

¹¹Uvuishe bantu babo banene bu Olebe ne Zêbe, uvuishe bakokeshi babo bonso bu Zeba ne Salemuna.

¹²Bakamba biabo ne, Tudinyengele miaba ya kuikala ya Nzambi bua kuikalayi miaba yetu.

¹³Wewe, Nzambi wanyi, ubavuishe bu luhuishi ludi lunyunguluka ku mpala kua nvunde, bu bisote ku mpala kua luhebele.

¹⁴Bu mudi kahia kosha ditu, bu mudi ludimi lua kahia lutemesha kahia ha mikuna,

¹⁵wewe ubihate ne tshihuhu tshiebe, ubatshinyishe ne tshihehele tshiebe tshikole.

¹⁶Ubafuishe bundu ku mesu tente, bua bakebe dina diebe, Yehowa.

¹⁷Batatshishibue bundu ne batshine tshiendelele; e, batamuke, bajimine biabo.

¹⁸Mbua bamanye biabo ne wewe nkayebe, ngudi muidike dina dia Yehowa, udi Mutambe Bunene wa ha mutu ha buloba bujima.