Read tshiluba Nsumuinu 16 Bible Online

Nsumuinu 16 - tshiluba bible

Nsumuinu 16

¹Malu adi bantu bahangidisha mu mitshima adi afuma kudibo, kadi dî didi ludimi lukudimuna didi difuma kudi Yehowa.

²Nshila yonso idi muntu wendela idi mitoke ku mesu kuandi, kadi Yehowa udi uteta mioyo ya bantu.

³Teka mudimu webe mu bianza bia Yehowa, ne malu awahangidisha nealubuluke.

⁴Yehowa wakafuka tshintu tshionso ne kafukila katshi; e, wakalongoluela muntu mubi dituku dia dikenga.

⁵Muntu yonso udi ne kudisua mu mutshima udi utondesha Yehowa, manya bimpe ne, Kena uhanga kukengeshibua.

⁶Luse lujalame ne lulamatu lua ku bushuwa bidi bibuikila malu mabi, ne bua ditshina diabo dia Yehowa bantu badi bahanduka mu dikenga.

⁷Bikala bienzedi bia muntu bisankishe Yehowa, yeye udi umulengeshisha ne bena lukuna bandi.

⁸Kuikala ne bintu bibale ne buakane kudi kuhita kuikala ne luhetu luvule ne kulumbulula kubi buimpe.

⁹Mutshima wa muntu udi uhangidisha bua kuya ku luendu, kadi Yehowa udi ulombola makasa andi.

¹⁰Dikosa dia bualu dia tshijila didi ku mishiku ya mukelenge; mukana muandi kamuena mushiha mikenji hakoseye nsambu.

¹¹Tshiamu ne malonga bidi biteta bujitu biakane mbia Yehowa; mabulu onso a mu tshibombi mbintu biakuenzeye.

¹²Bienza bakelenge malu mabi, badi banyanguke, bualu bua nkuasa wa bukelenge udi ujadikibua ku buakane.

¹³Mishiku idi yamba mei makane idi isankisha bakelenge, badi bananga muntu udi wamba dî diakane.

¹⁴Tshiji tshia mukelenge tshidi messager wa lufu, muntu udi ne meji neatshitalashe.

¹⁵Mpala wa musangelu wa mukelenge udi uvuisha muoyo, diakalengele didi muntu uheta kudiye didi bu matutu adi avuisha nvula mishishe.

¹⁶Mona mudi diheta dia meji dihita tshiamu tshia or bulengele! Bulelela, kuheta dijingulula dia mianda kudi kuhita kusungula kua tshiamu tshia argent bulengele.

¹⁷Nshila wa bantu bakane nkuehuka ku malu mabi, muntu udi ulama muoyo wandi udi utangile kudiye uya.

¹⁸Kudisua kudi kuya ku mpala kua dibutuka, mutshima wa kudibandisha udi uya ku mpala kua dihona.

¹⁹Kuikala ne mutshima muhuekele diatshimue ne badihuekeshi kudi kutamba kuabanyangana bintu binyenga mu nvita ne badisu buimpe.

²⁰Udi unvua dî ne ntema neahete diakalengele; udi weyemena Yehowa neikale ne disanka.

²¹Badi babikila muena meji ne, Mujinguludi wa mianda; bulengele bua mei a ku mishiku budi buitabushisha bantu.

²²Lungenyi ludi bu mushimi wa mai a muoyo kudi muntu udi nʼalu, dikengesha dia bahote mbuhote buabo.

²³Mutshima wa muena meji udi uyisha mukana muandi lungenyi, udi uhetamu bukole bua kuitabushisha bantu.

²⁴Mei malengele adi bu dikatshi dia buitshi, adi mashemakane ku muoyo ne adi asangulusha mubidi.

²⁵Nshila udiku udi mululame ku mesu kua muntu, kadi nshikidilu wandi udi lufu.

²⁶Muoyo wa muena mudimu udi usamina bia kudia udi umuenzesha mudimu, bualu bua mukana muandi mudi mumuenzesha bua kukuata mudimu.

²⁷Muntu mulembakana[30] udi umbuila bantu dijimba dia dikenga; mei a ku mishiku yandi adi bu kahia kadi kashidisha.

²⁸Muena mashimi udi utudisha matandu; muena mukoso udi uhandulula balunda banangangane.

²⁹Muena tshimbambila udi uteya muena mutumba nʼandi, udi umulombola mu nshila udi kayi muimpe.

³⁰Udi ubuikila mesu andi bua kuhangidisha malu a bunsonge, udi ubuta mishiku yandi, wakumana kuvuisha malu mabi.

³¹Nsuki mitoke tô idi tshifulu tshia butumbi, nebatshihete mu nshila wa buakane.

³²Udi kayi ukuata tshiji lubilu udi uhita muena bukitu buimpe, udi ukokesha muoyo wandi udi uhita munyengi wa musoko kutumba.

³³Badi belela nshobo ha bibelu, kadi dikosa dionso dia bualu didi difuma kudi Yehowa.