Read tshiluba Nsumuinu 20 Bible Online

Nsumuinu 20 - tshiluba bible

Nsumuinu 20

¹Nyinyo udi museki wa bantu, maluvu makole adi bu muena diyoyo; muntu yonso udi ubikuatshika kena ne meji.

²Buowa budi mukelenge utshinyisha nʼabu bantu budi bu muadi wa nyama wa ntambue; udi umufuisha tshiji udi udienzela muoyo wandi bibi.

³Butumbi budi kudi muntu biashilanganeye ne matandu, kadi muhote yonso neahatule mei a kutandangana nʼau.

⁴Muhote kena udima budimi tshikondo tshidi mashika a banga; nunku hakebeye bia kudia mu tshikondo tshia kunowa, kena ne tshintu.

⁵Meji adi muntu uhangidisha mu mutshima adi bu mai male, kadi mujinguludi wa mianda neâhatule.

⁶Ba bungi badi badiamba ne, Tudi bena luse; kadi udi mua kusangana muntu udi mua kueyemenyibua nganyi?

⁷Muntu muakane udi wenda mu buakane bua mutshima wandi,— bana bandi badi bamulonda badi bavudishibue disanka!

⁸Mukelenge udi ushikama mu nkuasa wa bukelenge ukosamu bilumbu udi usungulula[33] malu mabi onso ne mesu andi.

⁹Muntu kai udi mua kuamba ne, Nakuvuisha mutshima wanyi mutoke, ndi mulengeshibue ku bubi buanyi?

¹⁰Majitu a mishindu ibidi ne bihiminu bia mishindu ibidi, bubidi buabi bidi bitondesha Yehowa.

¹¹Muana mene udi umuenesha tshikadilu tshiandi ku bienzedi biandi, ne bikala mianda idiye wenza milengele ne miakane.

¹²Ditshu didi diunvua ne disu didi ditangila,— Yehowa wakafuka bubidi buabi.

¹³Kunangi tulu, bua kubuedi mu buhele; tabala mesu ebe, newikale ne bia kudia bikumbane.

¹⁴Musumbi udi wamba ne, Tshidi tshibi, tshidi tshibi; kadi hayeye, udi utshianyisha.

¹⁵Or ne mabue a bungi a mushinga mukole bidiku; kadi mishiku idi ne mei a lungenyi idi tshianga tshia mushinga mukole.

¹⁶Angata tshivualu tshia muntu udi mueyeke muenyi tshieya; ukuate udi mueyeke ba tshisamba tshia bende tshieya lukola.

¹⁷Bidia bidi muntu uheta ku kudinga kuandi bidi bishemakana mukana muandi, kadi ku nyima mukana muandi nemûshibue tente ne tusoka.

¹⁸Malu adi bantu bahangidisha adi ajadikibua ku kuhunga kua dî; hakuhabo lungenyi lua kuenza, luangana nvita.

¹⁹Udi wendakana wamba buambamba udi usokolola malu masokoka; nunku kubuelakana ne muntu udi wakula[34] biakulakula.

²⁰Biela muntu tatuʼandi anyi mamuʼandi mulau, nebajime muinda wandi mu midima mikole.

²¹Buhianyi budi muntu uheta lubilu ku tshibangidilu kabuena buvudishibua disanka kunshikidilu kuabu.

²²Kuambi ne, Nempingishe bubi ku bubi; windile Yehowa, yeye neakusungile.

²³Majitu a mishindu ibidi adi atondesha Yehowa; tshiamu tshia kuidikisha nʼatshi bujitu tshidi tshidinga katshiena tshimpe kabidi.

²⁴Biendedi bia muntu bidi biendeshibua kudi Yehowa; nunku muntu neamanye mua kujingulula nshila wandi munyi?

²⁵Budi buteyi kudi muntu bua kuambeye lukasa ne, Tshidi tshia tshijila, ne bua kuelanganeye meji anu ku nyima bua kuditshiha kuandi.

²⁶Mukelenge udi ne meji udi usungula bantu babi, udi ubungulusha dikalu dia kushihula nʼadi hamʼbidi habo.

²⁷Nyuma[35] wa muntu udi muinda wa Yehowa, ukebakebe[36] malu onso adi munda muandi.

²⁸Luse lujalame ne lulamatu lua bushuwa bidi bilama mukelenge; nkuasa wandi wa bukelenge udi mushindame ku luse lujalame.

²⁹Butumbi bua bansongalume mbukole buabo, bulengele bua bantu banunu budi mutu mutoke tô.

³⁰Mitutu idi itaha mputa idi ilengesha muntu ku malu mabi; mikumu idi ilengesha malu adi munda muandi.