Read tshiluba Nsumuinu 21 Bible Online

Nsumuinu 21 - tshiluba bible

Nsumuinu 21

¹Mutshima wa mukelenge mu bianza bia Yehowa udi bu misulu ya mai, yeye udi ûtuma kuonso kudiye musue.

²Nshila yonso udi muntu wendela udi muakane ku mesu kuandi, kadi Yehowa udi uteta mitshima.

³Kuenza malu makane ne kukosa nsambu biakane bidi bihita kufila kua nyama mishiha kusankisha Yehowa.

⁴Mesu adi ne dihetu ne mutshima udi udibandisha bidi disanka[37] dia bantu babi, bidi malu mabi.

⁵Meji adi muena mutshima wa mudimu uhangidisha adi amuvudishila luhetu luvule, kadi muntu yonso udi ne lukuluku neahete anu buhele.

⁶Kuheta tshibutshilu ku ludimi lua mashimi kudi bu dibungi didi luhehele lumuangalasha, kudi buteyi bua lufu kabidi.

⁷Tshimbambila tshia bantu babi netshibumusheku, bualu bua badi babenga kulumbulula bilumbu biakane.

⁸Nshila wa muntu mutambe bubi udi mukonyangale, kadi bienzedi bia udi ne mutshima mutoke bidi biakane.

⁹Kushikama ha ditumba dia ha mutu ha nsubu kudi kutamba kushikama mu mbalasa hohamue ne mukashi udi ne mutoyi buimpe.

¹⁰Mutshima[38] wa muntu mubi udi musue kuenzela bantu bibi; muena mutumba nʼandi kena usangana luse ku mesu kuandi.

¹¹Hakengeshabo mubuidi, mutshimbakanyi udi uheta meji; hayishaho muena meji, yeye udi uheta lungenyi.

¹²Muntu muakane udi umona ba mu nsubu wa muntu mubi bu mudibo; bantu babi badi bedibua hanshi tô ne habutukabo.

¹³Udi ujibika mu matshu andi bua kaunvu muadi wa muhele nêle biandi dî bikole, kabena bamunvuila nansha.

¹⁴Diha didi muntu ufila mu musokoko didi diholesha tshiji; mbueshilu misokoko muinshi mua tshibalu idi iholesha tshiji tshikole.

¹⁵Kulumbulula biakane kudi disanka kudi muntu muakane, kadi kudi kukuatshisha benji ba malu mabi buowa.

¹⁶Muntu udi uhambuka mu nshila wa dijingulula dia mianda neashikame mu disangisha dia bantu bafue.

¹⁷Udi unanga disanka neikale muhele; udi unanga nvinyo ne manyi kena wikala mubanji.

¹⁸Muntu mubi udi tshia kuhikula nʼatshi[39] muntu muakane; muena tshitungu udi ubuela mu muaba wakadi bantu bakane.

¹⁹Kushikama mu tshihela tshia lusenga kudi kutamba kushikama mu nsubu ne mukashi, muena matandu ne munyengabadi buimpe.

²⁰Mu nsubu wa muena meji mudi biuma bia mushinga mukole ne manyi kabidi, kadi muntu muhote udi ubimina.

²¹Udi ulonda buakane ne luse lujalame udi uheta muoyo, buakane ne butumbi.

²²Muena meji udi ubanda mu mu soko wa bena bukitu, udi ushimbula ngumbu ya nvita idibo beyemena.

²³Udi ulama mukana muandi ne ludimi luandi udi ulama muoyo wandi bua kaubuedi mu makenga.

²⁴Mubuidi ndina didibo binyika muntu udi ne dihetu ne didibandisha, udi wenza malu andi ne kudisua kuhite bukole.

²⁵Disua dia mufuba didi dimushiha, bualu bua bianza biandi bidi bibenga kukuata mudimu.

²⁶Muntu mubi udi usamina bintu muoyo dinda tô ne ku dilolo, kadi muntu muakane udi uhesha bantu bintu, kena ubahalabi nansha.

²⁷Mulambu udi bantu babi bafila udi utondesha Yehowa; mona mudiu utamba kumutondesha haluabo nʼau ne mitshima idi ihangidisha malu mabi!

²⁸Mumonyi udi ne mashimi nea jimine, kadi muntu udi unvua neambe dî didi dishala kashidi.

²⁹Muntu mubi udi unyenga mpala wandi, kadi muntu muakane udi welangana meji bua nshila idiye wendela.

³⁰Kakuena meji, anyi dijingulula dia mianda, anyi kuhunga kua mei, bidi mua kuhita Yehowa bukole.

³¹Badi basakila kabalu bintu bia nvita difuku dia kuluangana, kadi luhandu lulualua kudi Yehowa.