Read tshiluba Nsumuinu 29 Bible Online

Nsumuinu 29 - tshiluba bible

Nsumuinu 29

¹Muntu udi mubedibue misangu ya bungi, kadi udi wela mpala mulu, neabutudibue mu katuha ka diba, kayi ne tshia kumusangasha nʼatshi.

²Hikala bantu bakane ne bukokeshi, bantu badi basanka; kadi hakokesha muntu mubi, bantu badi batua mikemu.

³Muntu udi unanga meji udi usankisha tatuʼandi, kadi udi ubuelakana ne bakashi ba masandi udi utangalasha bintu biandi.

⁴Mukelenge udi ujadika buloba buandi ku kulumbulula kuakane, kadi muntu udi ulomba milambu mihite udi ububutula.

⁵Udi ubomba muena mutumba nʼandi udi wandila makasa andi bukuondo.

⁶Mu ditomboka dia muntu mubi mudi buteyi, kadi muntu muakane udi wimba misambu, udi usanka.

⁷Muntu muakane udi mumanye ne, Bahele badi bakengela kulumbulula kuakane, kadi muntu mubi kena ujingulula lungenyi alu nansha.

⁸Babuidi badi batemesha kahia mu musoko, kadi bena meji badi bandamuna tshiji.

⁹Biatandangana muena meji ne muhote mu tshilumbu, muhote udi ukuata tshiji ne udi useka, kakuena ditalala.

¹⁰Badi bakeba kumatshisha mashi badi bakina muntu muakane; kadi bantu bakane badi balama muoyo wandi.

¹¹Muhote udi uhatula tshiji tshionso tshidiye nʼatshi, kadi muena meji udi ntshibanda, udi utshiholesha.

¹²Biunvua mukokeshi mei a mashimi, bonso badi bamukuatshila mudimu badi balua babi.

¹³Muhele ne mukengeshi badi basangile hamue;[49] Yehowa udi umunyika mesu a bubidi buabo.

¹⁴Bialumbuluisha mukelenge bahele ne lulamatu lua bushuwa, nkuasa wandi wa bukelenge neajadikibue tshiendelele.

¹⁵Lukodi ne kubela bidi biyisha meji, kadi muana udibo balekela nkayandi udi ufuishisha mamuʼandi bundu.

¹⁶Hikala bantu babi mu bukokeshi, ditomboka didi didiunda; kadi bantu bakane nebamone dihona diabo talalâ.

¹⁷Kengesha muanʼebe bua kumuyisha, ne neakuhe dikisha; e, neasankishe mutshima webe.

¹⁸Bikalaku kakuyi tshikena kumona tshia muprofete, bantu badi balekela kudikanda; kadi udi utumikila diyisha dia mikenji udi ne disanka.

¹⁹Kabena bamanye mua kuyisha muhika ne mei nkayau; bualu bua nansha biâjingululeye, kena watumikila.

²⁰Udi umona muntu udi wamba mei andi lukasa lukasa, anyi? Ditekemena didibo nʼadi bua muhote didi dihita didibo nʼadi bua muntu au bunene.

²¹Udi udiundisha muhika wandi bimpe ku buana tô ne hakoleye, kunshikidilu neikale kudiye bu muanʼandi muledibue.

²²Muena tshiji udi usonsola ma tandu; muntu utu wafua tshiji lukasa udi utamba kubishisha ditomboka.

²³Kudisua kua muntu nekumuhuekeshe, kadi udi ne mutshima muhuekele neahete buneme.

²⁴Udi wabanyangana ne muibi udi ukina muoyo wandi mene, udi unvua[50] mei a mulau hamutshihishabo, kena usokolola bualu.

²⁵Hatshina muntu bakuabo, bualu ebu budi buteyi kudiye, kadi udi weyemena Yehowa neahanduke.

²⁶Ba bungi badi bakeba diakalengele kudi mukokeshi, kadi dikosa dia nsambu dia muntu didi difuma kudi Yehowa.

²⁷Muena tshishiku udi utondesha bantu bakane, kadi udi wenda mu nshila muakane udi utondesha bantu babi.