Read tshiluba Nsumuinu 3 Bible Online

Nsumuinu 3 - tshiluba bible

Nsumuinu 3

¹Muanʼanyi, kuhu diyisha dianyi muoyo kadi mutshima webe ntumikile mikenji yanyi.

²Bua neyikutentekashile dileha dia matuku ne bidimu bia muoyo ne ditalala.

³Luse ne lulamatu lua ku bushuwa kabiumuki kûdi. Ubisuike mu nshingu muebe, ubifunde mu mutshima webe.

⁴Nunku neusangane diakalengele ne lumu luimpe ku mesu kua Nzambi ne kua bantu.

⁵Eyemena Yehowa ne mutshima webe wonso, kueyemenyi dijingulula diebe dia mianda.

⁶Umumanye yeye bimpe mu bienzedi biebe bionso, yeye neakululamishile nshila yebe.

⁷Kuikadi umena meji ku mesu kuebe wewe; utshine Yehowa, umuke ku malu mabi.

⁸Muanda eu neuvuishe kusangasha kudi mubidi[4] webe, neutuishe kukankamasha[5] kudi mifuba yebe.

⁹Tumbisha Yehowa ne biuma biebe ne mamuma a kumudilu a mu madimi ebe.

¹⁰Nunku mayeba ebe neûle tente ne bintu bia bungi, bikaminu biebe nebihongolole nvinyo mihia-mihia.

¹¹Muanʼanyi, kuhetudi[6] dikengesha didi Yehowa ukuyisha nʼadi, kubela kuandi kakukutondi.

¹²Bualu bua Yehowa udi ubela udiye munange, bu mudi tatu ubela muanʼandi mulume udi umusankisha.

¹³Disanka didi kudi mundi udi usangana lungenyi, ne kudi muntu udi uheta dijingulula dia mianda.

¹⁴Bualu bua kuheta kuau kudi kutamba kuheta kua argent buimpe, ne makasa adilu lubulula adi atamba tshiamu tshia or bulengele.

¹⁵Wowo adi ahita mabue a bilenga mushinga mukole; kakuena tshintu tshiudi ujinga tshiudi mua kuelekesha nʼau.

¹⁶Dileha dia matuku a muoyo didi mu tshianza tshiau tshia balume; mu tshianza tshiau tshia bakashi mudi bubanji ne butumbi.

¹⁷Nshila yau idi nshila ya disanka, nshila yau yonso idi nshila ya ditalala.

¹⁸Adi mutshi wa muoyo kudi badi bâkuata mu bianza; bonso badi bâkuata bikole badi ne disanka.

¹⁹Yehowa wakafuka buloba ne meji andi; wakajadika bia mu diulu ne lungenyi luandi.

²⁰Bua lungenyi luandi mai male akahatuka, ne matutu a mu diulu adi amatshisha dibungi.

²¹Muanʼanyi, malu â kaumuki ku mesu kuebe; ulame meji adi akukuatshisha, ne bukole bua kuhangidisha malu.

²²Nunku nebikale muoyo ku mutshima[7] webe ne tshilenga mu nshingu muebe.

²³Hashishe, newende mu nshila webe kuyi ne ditshina, dikasa diebe kadiena dilenduka.

²⁴Hawalala hanshi, kuena utshina; bulelela, ha wamana kulala hanshi, tulu tuebe netuikale tuimpe.

²⁵Kutshinyi buowa budi bulua kûdi lukasa, anyi kubutuka kua bantu babi hafikaku kudibo.

²⁶Bualu bua Yehowa neikale tshieyemenu tshiebe, nealame dikasa diebe bua kadikuatshibu mu buteyi.

²⁷Kuhadi bantu tshintu tshimpe, badi bakumbane bua kuikala nʼatshi, hawikala ne bukole bua kubaha tshi.

²⁸Kuambidi muena mutumba nʼebe ne, Anji kuya, uhingane kabidi, makelela nenkuhetshi, hautshidi nʼatshi ha buihi.

²⁹Kuhangidisha bualu bubi bua kuenzela muena mutumba nʼebe, hadiye ushikama hehi nʼebe mukueyemene.

³⁰Kufuilanganyi ne muntu hatuhu, bikaleye kayi mukuenzele bibi.

³¹Kuikadi ne muena tshimbambila mukau, kulondi bualu, nansha bumue, budiye wenza.

³²Bualu bua Yehowa udi ukina muntu udi ne tshishiku, kadi bunyana[8] buandi budi kudi badi ne mitshima miakane.

³³Mulau wa Yehowa udi mu nsubu wa bantu babi, kadi udi uvudishila nsubu wa bantu bakane disanka.

³⁴Udi ubuidia babuidi, kadi udi ulesha badi bahuekele luse.

³⁵Bena meji nebahiane butumbi, adi bundu budi buhianyi bua bahote.