Read tshiluba Nsumuinu 31 Bible Online

Nsumuinu 31 - tshiluba bible

Nsumuinu 31

¹Mei a mukelenge Lemuele: dî dia tshijila[55] diakamuyisha mamu wandi.

²Ngambe tshinyi, muanʼanyi? Ngambe tshinyi, muana mulume wa munda muanyi? Ngambe tshinyi, muana wa mitshihu yanyi?

³Kuheshi bakashi bukole buebe nansha, kulekeledi nshila yebe mu bianza bia badi babutula bakelenge.

⁴Lemuele, bualu ebu kabuena buimpe, kambimpe bua bakelenge kunuabo nyinyo, anyi bua bakokeshi kujingabo malulu makole.

⁵Kabânu, kabahu mikenji muoyo, kabasesuishi bakengi kulumbulula kuakane.

⁶Nuisha muntu udi wamba kufua maluvu makole, nuisha muena mutshima munyingalale nyinyo;

⁷anue biandi, ahue buhele buandi muoyo, kavuluki makenga andi kabidi.

⁸Buluila kamama mukana muebe, ûbulule bua kulumbuluila bonso hadibo bashiya hatuhu.

⁹Bulula mukana muebe, ulumbulule bilumbu ne buakane; ulumbuluile bahele ne bakengi bilumbu biabo.

¹⁰Udi mua kuheta mukashi wa tshikadilu tshimpe nganyi? Bulengele buandi budi butamba mabue a bilenga mushinga mukole.

¹¹Mutshima wa bayandi udi umueyemena, kena ukengela bintu.

¹²Yeye udi wenzela bayandi malu mimpe, kena umuenzela bualu bubi matuku onso a muoyo wandi.

¹³Udi ukeha miosa ya mikoko ne buanda bua lin, udi wenza mudimu wa bianza ne disanka.

¹⁴Udi bu matu a ngendʼa mushinga, udi ulua ne bia kudia biandi ku miaba ya kule.

¹⁵Udi ubika butuku kabuyi buanze kutshia, udi uha ba mu nsubu muandi bia kudia, udi uha bakashi benji ba mudimu wandi tshituha tshiabo tshia mudimu.

¹⁶Udi ukenketa budimi, udi ubusumba; udi utentuisha mionshi ya nyinyo ku luhetu lua ku bianza biandi.

¹⁷Udi usuika bukole bu mukaba mu tshifuka tshiandi, udi ukolesha maboko andi.

¹⁸Udi mumanye ne, Bintu bindi ngenduluka nʼabi mushinga bidi bimpe. Muinda wandi kawena ujima butuku.

¹⁹Udi ulongolola mbungu wandi; udi ukuata mundongo mu bianza biandi.

²⁰Udi woluela bahele tshianza tshiandi; e, udi woluela bakengi bianza biandi.

²¹Yeye kena utshina ne, Mashika a neige neakuate ba mu nsubu muanyi, bualu bua yeye udi umatshisha bonso ba mu nsubu muandi bilulu bikunze.

²²Udi udikumina bilulu bia ha bulalu; bivualu biandi bidi bia lin bia mushinga mukole ne bikunzubile.

²³Bayandi udi mumanyibue ku bibuelelu bia ku musoko, hashikameye munkatshi mua bakulu ba ditunga.

²⁴Udi utela bivualu bia lin, udi ubihana; udi ufila mikaba kudi ngendʼa mushinga.

²⁵Bukole ne buneme bidi bivualu biandi; udi usanka bua matuku alualua.

²⁶Udi ubulula mukana muandi ne meji, diyisha dia luse didi ha ludimi luandi.

²⁷Udi utangila malu a ba mu nsubu muandi benza, katu wadia bia kudia bia bufuba.

²⁸Bana bandi badi bajuka, badi bamuvudishila disanka. Bayandi kabidi udi ujuka, udi umutumbisha ne,

²⁹Bana bakashi bangi bakuenza bimpe, kadi wewe udi utamba buonso buabo.

³⁰Diakalengele didi didinga, mpala mulengele udi hatuhu, kadi mukashi udi unemeka Yehowa neatumbishibue.

³¹Umuhe difutu dia midimu ya bianza biandi; midimu yandi imutumbishe ku bibuelelu bia ku musoko.