Read tshiluba Nsumuinu 5 Bible Online

Nsumuinu 5 - tshiluba bible

Nsumuinu 5

¹Muanʼanyi, tinvua meji anyi; uteleje matshu ebe ku dijingulula dianyi dia malu,

²bua wewe kushala ne bukole bua kuhangidisha mianda bimpe, ne bua mishiku yebe ilame lungenyi.

³Bua mishiku ya mukashi wa bende idi imata buitshi, mukana muandi mudi muhite manyi busenu.

⁴Kadi kunshikidilu yeye udi ne bululu bu nyongangandu, udi mutue bu muele wa nvita musakisha nseke ibidi.

⁵Makasa andi adi ahueka tô ne ku lufu, biendedi biandi bîdi bilamata ku Muaba wa Bafue.

⁶Bua yeye kena[10] udimuka bua nshila mulandakane wa muoyo, yeye udi utakankana mu nshila yandi kayi mumanye bualu.

⁷Mpindiu, bana banyi, nungunvuile, kanumuki ku mei a mukana muanyi.

⁸Semesha nshila webe kule nʼandi, kufika ha buihi ne tshibi tshia ku nsubu kuandi,

⁹bua wewe kufidi buneme buebe kudi bantu ba bende, ne bidimu biebe kudi muena lukisu,

¹⁰bua benyi kabukutshi ne biuma biebe, ne luhetu lua ku mudimu webe kaluikadi mu nsubu wa muntu wa bende.

¹¹Nunku wewe kufu mikemu kunshikidilu kua muoyo webe, hanyanguka misunyi yebe ne mubidi webe,

¹²ne udi wamba ne, Mona munakukina dikengesha diakadi dinyisha ne muakadi mutshima wanyi uhetula mei a kumbela nʼau!

¹³Tshiakunvuila dî dia bayishi banyi, tshiakuteleja matshu anyi kudi bakadi basue kundesha lungenyi.

¹⁴Nakamba kubuela mu dikengesha dionso anu kaba kabalê munkatshi mua disangisha dia bantu ne bakadi badikungisha.

¹⁵Unue mai a mu tshina tshiebe wewe, ne mai a mushimi audi uhatula mu dina diebe wewe.

¹⁶Mishimi yebe ya mai idi ne bua kumuangalashibua mu muaba wa ha bule, anyi? Tusulu tuebe tua mai tudi ne bua kuhueka mu misesu, anyi?

¹⁷Biobi bikale bintu biebe nkayebe, kabikadi bia bantu ba bende diatshimue nʼebe.

¹⁸Mushimi webe wa mai uvudishibue disanka; usanke bua mukashi uwakabaka mu bunsongalume buebe.

¹⁹Yeye udi bu ntole mukashi udi muena dinanga, udi bu dishina dia ngulungu didi dilengele ku mesu! Mabele andi akusankishe misangu yonso; wikale mukuatshike ne dinanga diandi matuku onso.

²⁰Bua munyi, wewe muanʼanyi, mûdi ne bua kukuatshika ne dinanga dia mukashi wa bende, ne bua kuela tshituha mu tshiadi tshia muena tshiendenda?

²¹Bualu bua nshila ya muntu idi ku mesu kua Yehowa, yeye udi widikisha nshila yandi yonso bimpe.

²²Malu a tshishiku a muntu mubi adi umukuata mu buteyi, udi musuikibue ne mionshi ya bubi buandi.

²³Udi ufua bua dihanga diandi dia kuheta diyisha didi dimuludikila nshila; bua bukole bua buhote buandi udi uhambuka.