Read tshiluba Nsumuinu 8 Bible Online

Nsumuinu 8 - tshiluba bible

Nsumuinu 8

¹Meji kaena ela dî diau, anyi? Dijingulula dia mianda kadiena dihandisha dî diadi, anyi?

²Wowo adi mimane ha mutu ha mikuna idi hehi ne nshila, ku masangu a nshila mene.

³Hehi ne bibuelelu bia musoko, kudi bantu babuelela mu bibi nkudiu ela dî diau ne,

⁴Nuenu bantu, ndi nnuela dî dianyi; ne dî dianyi didi kudi bukua bantu.

⁵Nuenu batshimbakanyi, nuyile mua kumanya budimu; nuenu bahote, nuyile mua kuikala ne mutshima wa kujingulula malu.

⁶Unvuai, bualu bua nengambe mianda minene; ne ku mishiku yanyi nekuhatuke mei makane.

⁷Bualu bua mukana muanyi nemuambe mei malelela; bubi budi tshintu tshidi tshintonda ku mishiku yanyi.

⁸Mei onso a mukana muanyi adi ambibua mu buakane; kakuena dî dia mashimi anyi dikonyangale munkatshi muau.

⁹Buonso buau adi mei a bushuwa kudi muntu udi ujingulula mianda, adi mei makane kudi badi baheta lungenyi.

¹⁰Nusungule diyisha dianyi, kanusungudi tshiamu tshia argent; nusungule lungenyi bu tshintu tshihite tshiamu tshia or wa mushinga mukole buimpe.

¹¹Bua meji adi ahita mabue a bilenga bulengele; bintu bionso biudi mua kujinga kabiena mua kuelekeshibua nʼau.

¹²Meme, meji, ndi nvuisha budimu muaba wanyi wa kushikama, ndi mpeta lungenyi ne bukole bua kuhangidisha malu bimpe.

¹³Kutshina Yehowa nkuikala ne malu mabi lukuna. Kudisua, kudibandisha ne nshila wa malu mabi, mukana mudi muamba mei a tshitshu, ndi mbikina.

¹⁴Ndi mua kulesha bantu lungenyi, ndi meji a kukuatshisha nʼau bantu; ndi dijingulula dia mianda, ndi ne bukole.

¹⁵Bakelenge badi bakokesha bua bualu buanyi, ne bakokeshi badi balumbulula ne kulumbulula kuakane.

¹⁶Bua bualu buanyi bakokeshi badi bakokesha, ne badi ne butumbi badi bakokesha ne balumbuludi bonso ba ha buloba mene.

¹⁷Ndi munange badi bannanga, bonso badi bankeba ne lukunukunu nebansangane.

¹⁸Biuma ne butumbi bidi kundi, biuma mene bidi bishala musangu mule ne buakane bidi kundi.

¹⁹Mamuma anyi adi ahita or buimpe, mahite or yakulengeshabo mu ditanda buimpe; luhetu lundi mpeta ludi lutamba tshiamu tshia argent tshia mushinga mukole buimpe.

²⁰Ndi ngenda mu nshila wa buakane, mu nshila ya kulumbulula kuakane,

²¹bua kuhesha badi bannanga buhianyi bua biuma, bua kûsha bibutshilu biabo tente.

²²Yehowa wakanfuka ku tshibangidilu tshia bufuki buandi, ku mpala kua bintu biandi bionso, ku tshibangidilu mene.

²³Nakajadikibua ku tshibangidilu tshia bidimu, ku tshibangidilu mene, diambedi buloba kabuyiku.

²⁴Hakadi ndondo ya mai kayiyi mianze kuikalaku, nakaledibua; hakadi mishimi miule tente ne mai kayiyiku, nakadiku.

²⁵Diambedi mikuna mile kayiyi mianze kujadikibua, ku mpala kua mikuna mihuekele, nakaledibua.

²⁶Hakadiye kayi muanze kufuka buloba ne madimi abu, anyi luhuishi lua kumudilu lua ha buloba, nakadiku.

²⁷Hakashimikeye bia mu diulu, nakadiku. Hakatekeye tshijengu tshibaluluke ha mutu ha ndondo wa mai manene,

²⁸hakashindikeye matutu a mu diulu, hakavula mishimi ya mu ndondo wa mai manene mu miaba yai,

²⁹hakahandileye mai manene mukalu wau, bua mai adimu kâsambuki mukenji wandi, hakasunguleye miaba ya bishimikidi bia buloba,

³⁰ha diba adi nakadi hehi nʼandi bu muena[15] mudimu wandi. Nakadi ne disanka ku dituku ku dituku, nakadi nnaya ku mpala kuandi matuku onso.

³¹Nakadi nsanka mu buloba buandi budi ne bantu bashikamamu, ne disanka dianyi divule diakadi bua kusomba ne bukua bantu.

³²Nunku, bana banyi ba balume nungunvuile: bua badi balamata mu nshila yanyi badi ne disanka.

³³Unvuai diyisha, nuikale ne meji, kanudihetudi nansha.

³⁴Muntu udi ungunvuila, udi wimana ku bibi bianyi ku dituku ku dituku, udi windila ku bilua bia ku bibi bianyi, udi ne disanka.

³⁵Bualu bua wansangana udi usangana muoyo, udi uheta diakalengele kudi Yehowa.

³⁶Kadi wahanga kunsangana udi wenzela muoyo wandi bibi; bonso badi bankina badi bananga lufu.