Read tshiluba Nsumuinu 9 Bible Online

Nsumuinu 9 - tshiluba bible

Nsumuinu 9

¹Meji akuasa nsubu wau, akusonga makunshi au muanda mutekete.

²Akushiha nyama yau, akusangisha nvinyo yau ne bintu bia muhuya muimpe; akulongolola mesa au kabidi.

³Akutuma mishikankunde idi yakuatshila mudimu, adi ela dî diau hadiu imana ha mikuna ya mu musoko ne,

⁴Muntu yonso udi utshimbakana abuele biandi munemu. Adi ambila muntu udi uhanga kuikala ne mutshima wa lungenyi ne,

⁵Luai, nudie bidia bianyi, nunue nyinyo inakusangisha.

⁶Lekelai kutshimbakana, nuikale ne muoyo, nuende mu nshila wa dijingulula dia mianda.

⁷Udi usamina mubuidi udi udiangatshila bihendu, udi ubela muntu mubi udi udifuishisha bundu.

⁸Kubedi mubuidi, bua yeye kakukinyi; biwabela muena meji, yeye neakunange.

⁹Uyishe muena meji, yeye neikale ne meji mahite a diambedi; uyishe muntu muakane, yeye neadiunde mu lungenyi.

¹⁰Ditshina dia Yehowa ntshibangidilu tshia meji, kumanya Wa Tshijila ndijingulula dia mianda.

¹¹Bua kundi meme matuku ebe neavulangane, ne bidimu bia muoyo webe nebileheshibue.

¹²Biwikala ne meji, meji ebe nga kudikuatshisha nʼau; biwabuidiangana, mibuidi yebe neyikuandamukile.

¹³Mukashi muhote udi ne lutoyitoyi, udi muntu mujibale, kena[16] mumanye bualu.

¹⁴Udi ushikama ku mbelu kua nsubu wandi, mu tshishikaminu tshia ha mikuna ya mu musoko,

¹⁵bua kubikila badi bahita mu nshila, badi benda balulame mu nshila yabo ne,

¹⁶Muntu yonso mujibale abuele biandi munemu. Udi wambila muntu udi kayi ne lungenyi ne,

¹⁷Mai miba adi mashemakane, bidia bibidi bidia mu musokoko bidi bilengele.

¹⁸Kadi muntu au kena mumanye ne, Bafue[17] badimu; kena mumanye ne, Badi bamuendela buenyi badi mu ndondo wa Muaba wa Bafue.