Read tshiluba Musambu wa Solomo 1 Bible Online

Musambu wa Solomo 1 - tshiluba bible

Musambu wa Solomo 1

¹Musambu wa mu misambu, udi wa Solomo.

²Utuangane nʼanyi mishiku, Bualu bua dinanga diebe didi dihita nvinyo buakane,

³manyi ebe adi ne dihembu dimpe, dina diebe didi bu manyi adibo bahongolola; nunku bansongakashi batshidi tumama badi bakunanga.

⁴Unkoke; netukulonde lukasa. Mukelenge wakulua nʼanyi mu nsubu muandi. Netusanke bua bualu buebe; kutumbisha kuetu kua dinanga diebe kudi kutamba kutumbisha kuetu kua nvinyo; badi bakunanga bulelela.

⁵Nuenu bana bakashi ba mu Yelushalema, meme ndi mufike kadi ndi mulengele bu nsubu ya ntenta ya mu Kedâ ne bu bilulu bikudika bia Solomo.

⁶Kanuntangidi bualu bua dikoba dianyi didi difike, bualu bua munya wakungosba. Bana betu ba balume ba difu dimue bakadi nʼanyi tshiji, bakunteka bua kulama mionshi ya tumuma tua nvinyo tua bakuabo, kadi tshiakalama mionshi yanyi.

⁷Wewe, udi mutshima wanyi munange, ungambile kûdi udisha mikoko yebe ne kudiyi ilala munda munya. Bua tshinyi ndi ne bua kuikala bu muhambuke munkatshi mua mikoko ya balunda bebe?

⁸Wewe mukashi udi uhita bakuabo bulengele, biwikala kuyi mumanye, ya biebe, ulonde mikono ya mikoko, udishe bana bebe ba mikoko ha buihi ne ntenta ya balami.

⁹Wanyi munanga, nakakuelekesha ne kabalu kadi kakoka dikalu dia Palô.

¹⁰Matama ebe adi malengele bua mabue adi malembelelahu, ne nshingu webe udi mulengesha ne mabue a mushinga mukole.

¹¹Netukulongoluele bilenga bia or bilamika argent.

¹²Hakadi mukelenge mushikame ku mesa andi, manananshi anyi akanunka muhuya muimpe.

¹³Wanyi munanga udi kundi bu kabombi ka myrrhe[1] kadi kalala mu mabele anyi.

¹⁴Wanyi munanga udi kundi bu tshisumbu tshia bilongo bia mu madimi a Ene-gedi.

¹⁵Mona, wanyi munanga, wewe udi mulengele, mona, udi mulengele be; mesu ebe adi bu a nyunyu wa nkutshi.

¹⁶Mona, wanyi munanga, wewe udi mulengele, udi mulengele be; bulalu buetu budi buadisha mabeshi a mitshi.

¹⁷Mikamba ya mu nsubu muetu idi ya mitshi ya cèdre maleka etu adi a mitshi ya cyprès.