Read tshiluba Musambu wa Solomo 6 Bible Online

Musambu wa Solomo 6 - tshiluba bible

Musambu wa Solomo 6

¹Webe munanga wakuya kudi kunyi, wewe mukashi udi uhita bakuabo bulengele? Webe munanga wakuya kudi kunyi bua tuetu tukukebeleye?

²Wanyi munanga wakuya ku tshibunda tshiandi, ku malalu andi a bintu bia muhuya muimpe bua kudieye bintu mu tshibunda tshiandi, ne bua kuangateye bilongo bia nsungubidi.

³Meme ndi wa wanyi munanga; wanyi munanga nguanyi kabidi; yeye udi udisha mikoko yandi munkatshi mua nsungubidi.

⁴Wanyi munanga, wewe udi mulengele bu mukuna wa Tisa: udi mulengele bu Yelushalema; udi ukuatshisha bakuabo buowa bu tshisumbu tshia masalayi tshidi ne mabendela.

⁵Umusha mesu ebe kundi, bua adi atshinyisha. Nsuki yebe idi bu tshisumbu tshia mbushi idi yendakana ku mukuna wa Gilada.

⁶Menu ebe adi bu tshisumbu tshia mikoko idi ifuma ku tshiowelu tshia mai; buonso buai yakalela bana ba mahasa, nansha umue wai wakufua.

⁷Matama ebe adi bu bihela bia dimuma dia grenade ku nyima kua tshilulu tshiebe tshibuikila ha mutu hebe.

⁸Bakelenge bakashi makumi asambombo badiku, ne bakashi bahika babakibue makumi muanda mukulu badiku, ne bakashi batshidi tumama badiku badi kabayi mua kubadibua.

⁹Wanyi nyunyu wa nkutshi udi muakane be, udi anu umue umuehele; yeye udi muana umuehele wa mamu wandi; yeye udi muana mulengele kudi mumuledi. Bana ba bakashi bakamutangila, bakamuvudishila disanka; bakelenge bakashi ne bakashi bahika babakibue bakamutangila, bakamutumbisha.

¹⁰Nganyi udi ufuanangana ne lunkelu, udi ne bulengele bu ngondo, udi ukenka bu diba, udi ukuatshisha bantu buowa bu tshisumbu tshia masalayi tshidi ne mabendela?

¹¹Nakaya bianyi mu tshibunda tshia mamuma, bua kutangila Buitshi idi mimene mu tshibanda; bua kumona mionshi bikalayi miele ntonga, ne grenades bikalayi miele bilongo.

¹²Diambedi tshiyi muanji kumanya bualu, mutshima wanyi wakanshikika munkatshi mua makalu a bantu banyi banene.

¹³Hingana, hingana, wewe Muena Shulama; hingana, hingana, bua tuetu tukutangile. Nuenu nudi nutangila Muena Shulama bu munudi nutangila maja a bisumbu bibidi bia masalayi bua tshinyi?