Read tshiluba Yeshaya 19 Bible Online

Yeshaya 19 - tshiluba bible

Yeshaya 19

¹Di dia tshijila[28] bualu bua Ejipitu. Monai, Yehowa udi wenda mubande ba ditutu didi diya lukasa, ne neafike ku Ejipitu. Mpingu ya mu Ejipitu neyizakale ku mpala kuandi, mitshima ya ba mu Ejipitu neyivingutuke munda muabo.

²Nensonsole Bena Ejipitu bua kuluishangana ne Bena Ejipitu bakuabo, nebaluangane muntu yonso ne muanʼabo, muntu yonso ne muena mutumba nʼandi; ba mu musoko umue nebaluangane ne ba mu munga musoko, bena bukelenge bumue nebaluangane ne bena bukelenge bukuabo.

³Nyuma wa ba mu buloba bua Ejipitu neahange munda muabo, ne nentuhakashe meji adibo nʼau; nebaye kudi mpingu bua kudikebela lungenyi, ne kudi batempi ba mbuku, kudi bena mbuku ya mibangu, ne kudi bena muhongo.

⁴Mukelenge, Yehowa wa misumba, udi wamba ne, Nenfile Bena Ejipitu mu bianza bia mukokeshi udi muena tshinyangu; ne mukelenge udi ne luonji neabakokeshe.

⁵Mai a mu mai manene neûme onso, ne Musulu wa Nile neunyanguke, neûme.

⁶Misulu yau neyinunke muhuya mubi, maboko a musulu wa mu Ejipitu neakame, neûme; binkete ne luehu lua miû nebifubidile.

⁷Miaba ya masele adi hehi ne Nile, ku muelelu wa Nile mene, ne madimi onso adi ha buihi ne Nile, adibo bakunamu maminu, nebiume, nebihehudibue, nebijimine.

⁸Bilembi bia mishiha nebiase muadi, ne bonso badi bela ndoho mu mai nebadile, badi bâdisha tuhamba tuabo ha mai nebatekete.

⁹Baluki ba bilulu bia lin, ne badi bakuma tshilulu tshia ndanda, nebatuhakashibue.

¹⁰Badi bu makunshi adi akolesha buloba bua Ejipitu nebatshibuke bituha, bantu bonso badi benza mudimu wa ditutu nebikale ne kanyinganyinga mu mitshima yabo.

¹¹Bakokeshi ba mu Soana badi anu bahote; lungenyi lua bena meji ba Palô badi batamba kuikala ne meji luakulua buhote. Nudi bamanye mua kuambila Palô ne, Ndi muana wa bena meji, muana wa bakelenge ba kale munyi?

¹²Nunku bena meji bebe badi kudi kunyi? Bobo bakuambile mpindiu, bamanye biabo bualu budi Yehowa wa misumba muhangidishe bua kuenzela Ejipitu.

¹³Bakokeshi ba mu Soana bakulua bahote, bakokeshi ba mu Mempi bakudingibua; bantu badi bu dibue dia mu ditumba dia bisamba biabo bakuhambuisha ba mu Ejipitu.

¹⁴Yehowa wakusonsola nyuma wa tshibondakasha munkatshi muabo; ne bakuhambuisha Bena Ejipitu mu mudimu wabo wonso, bu mudi muntu mukuatshike maluvu wenda ututubila mu nshila uluka bilushi biandi.

¹⁵Ne kakuena kushala mudimu mukuabo mu Ejipitu, udi mutu anyi mukila, dilala dia dibue anyi disele mua kuenza.

¹⁶Mu dituku adi Bena Ejipitu nebikale bu bakashi. Nebazakale ne nebatshine bua kukuha kua tshianza tshia Yehowa wa misumba tshidiye ukuha ha mutu habo.

¹⁷Buloba bua Yuda nebuhatshishe Ejipitu buowa. Muntu yonso wa ku muaba kudibo batela dina dia Yuda neatshine, bualu bua muanda udi Yehowa muhangidishe, udiye mudisunguile bua kuenzela Ejipitu.

¹⁸Mu dituku adi nemuikale misoko itanu mu buloba bua Ejipitu idi ne bantu bakula muaku wa Bena Kanâna, ne badi baditshiha kudi Yehowa wa misumba. Nebabikile umue wa munkatshi mua misoko yaya ne, Musoko wa Dibutuka.[29]

¹⁹Mu dituku adi tshioshelu tshia Yehowa netshikale mu muaba wa munkatshi mua buloba bua Ejipitu, ne dikunshi nedikale ku mukalu wabu dijidila kudi Yehowa.

²⁰Nedikale bu tshimanyinu ne bu tshimanyishilu kudi Yehowa wa misumba mu buloba bua Ejipitu; bualu bua hadilabo kudi Yehowa bua babakengeshi babo, neabatumine musungidi udi kabidi tshilobo, ne yeye neabasungile.

²¹Yehowa nendimanyishe kudi ba mu Ejipitu, ne Bena Ejipitu nebamanye Yehowa mu ditukuadi. Mmuomu, nebamutendelele ne milambu ya kumuoshela ne milambu ya bia kudia biabo, nebaditshihe mutshihu kudi Yehowa, nebenze bu mudibo baditshiha.

²²Yehowa neakume ba mu Ejipitu, neabatahe ne neabasangashe kabidi; nebahingane kudi Yehowa, ne yeye neitabushe bua bamulombe, neakoleshe mibidi yabo.

²³Mu dituku adi nshila munene neikaleku muhatuke mu Ejipitu ne muyile tô ne ku Ashû, ne muena Ashû neayilemu bua kufikeye mu Ejipitu, ne muena Ejipitu neayilemu bua kufikeye mu Ashû. Ne Bena Ejipitu nebatendelele Nzambi hohamue ne Bena Ashû.

²⁴Mu dituku adi Isalele neikale tshituha tshisatu tshidi tshisangisha Ejipitu ne Ashû bu disankisha dia bantu munkatshi mua ba ha buloba.

²⁵Bualu bua Yehowa wa misumba wakabavudishila disanka, wamba ne, Nuvudishibue disanka, ba mu Ejipitu, bantu banyi, ne Bena Ashû, mudimu wa bianza bianyi, ne Bena Isalele, buhianyi buanyi.