Read tshiluba Yeshaya 29 Bible Online

Yeshaya 29 - tshiluba bible

Yeshaya 29

¹Mulau wikale kûdi, Aliele, Aliele,[38] musoko muakasamu Davidi tshitudilu tshiandi! Tentekashai tshidimu ha mutu ha tshidimu; bikondo bia bidia bia disanka bilondangane mu bidimu biabi.

²Hashishe nentatshishe Aliele, ne madilu ne muadi nebikalemu; ne musoko eu newikale kundi bu diku dia tshioshelu.

³Nenkunyungulule ne bitudilu bianyi, nenkutshintshimike ne mialu ya mata, nengele mabula manene, ne nengibake bibumba bikoleshibue ne bielelu bia nvita bua kukuluisha nʼabi.

⁴Nebakutulule hanshi, newambe mei ebe hawikala muinshi mua buloba, muaku webe ndifume munkatshi mua dinfuenkenya. Dî diebe nedikale bu dî dia muakuishi wa biambi dihatuka munda mua buloba, ne mei ebe neikale bu biambi bihatuka mu dinfuenkenya.

⁵Kadi tshisumbu tshia badi nʼebe lukuna netshikale bu dinfuenkenya dibotesha, tshisumbu tshia badi bakuatshisha bantu buowa netshikale bu bisote bidi bihehuka kudi luhehele. Bulelela, bualu ebu nebumueneke lubilu, mu kubunya kua disu:

⁶Yehowa wa misumba nealue kûdi ne mikungulu, kukanka kua buloba, diyoyo dinene, nvunde ne tshihuhu, ne ludimi lua kadilu kadi kayi ngutula bintu bionso.

⁷Tshisumbu tshia bisamba bionso bidi biluisha Aliele, tshia bantu bonso badi balua ngana nʼandi, ne miaba yandi ya ngumbu ya nvita ne badi bamukengesha nebikale bu tshilota, bu tshikena kumona butuku mene.

⁸Muanda au newikale bu tshilota tshidi muntu udi ne nzala uhita ne, Ndi ndia bia kudia, kadi udi utabala, ne mutshima wandi utshidi ne kusamina kua bia kudia. Anyi newikale bu tshilota tshidi muntu udi ne nyota ulota ne, Ndi nnua mai, kadi udi utabala, ne udi muhungile, ne mutshima wandi utshidi usamina mai. Bualu nebuikale nunku ne tshisumbu tshia bisamba ebi bionso bidi biluangana nvita ne ba mu mukuna wa Siona.

⁹Hampakanai! Tuai mikemu! Nudifofomeshe mesu! Nuikale bafofo! Badi bakuatshike, kadi kabayi banua nvinyo; badi butenkakana, kadi kabayi banua maluvu makole.

¹⁰Bualu bua Yehowa wakatshihisha nyuma udi ne tulu tukole hamʼbidi henu; wakubuikila mesu enu, mbaprofete mene, wakubuikila mitu yenu, mbamonyi ba bikena kumona mene.

¹¹Tshikena kumona tshia bualu ebu buonso tshiakulua kunudi bu mei a mu mukanda muvunga, udi bantu bafila mu bianza bia muntu udi mumanye mua kujingulula maleta, bamba ne, Tudi tukusengelela ne, Utubadile mutanda eu; ne yeye udi ubahingishila dî ne, Tshiena mumanye mua kûbala, bualu bua udi muvunga.

¹²Badi bafila mutanda kudi muntu udi kayi mumanye mua kubala mikanda, bamba ne, Tudi tukusengelela ne, Utubadile mukanda eu; ne yeye udi wamba ne, Tshiena mumanye mua kubala mikanda.

¹³Mukelenge wakamba ne, Bualu bua bantu aba badi basemena hehi nʼanyi ne badi bantumbisha ne mukana muabo ne mishiku yabo, kadi bakumusha mitshima yabo kundi ne idi kule, ne badi bantshina anu bualu bua mukenji wa bantu wakuyilabo mu mitu yabo;

¹⁴nunku, tangilai, nengenze kabidi malu munkatshi mua bantu aba adi abakemesha, malu mene adi atamba kubakemesha ne adi biau malu a kukema; ne meji a bena meji babo neajimine, lungenyi lua bena lungenyi babo nelusokokibue.

¹⁵Mulau wikale kudi bantu badi bafundika bifufu biabo muinshi mule bua kubisokoka ku mesu kua Yehowa, ne badi ne midimu yabo mu midima, badi bamba ne, Muntu kai udi mutumone? Muntu kai udi mummanye?

¹⁶Monai tshitshu tshienu! Mufumbi neabadibue bu dima, anyi, bua tshintu tshidiye ufumba tshiambe bua mufumbi watshi ne, Yeye kakunfumba nansha? Tshintu tshienjibue netshiambe bua yeye wakutshienza ne, Yeye kena ne lungenyi, anyi?

¹⁷Diba ndishala dikese bua Lebanona kuandamuka bu budimi budi bulua ne bintu bia bungi, ne budimi budi bulua ne bintu bia bungi nebubadibue bu ditu, anyi?

¹⁸Mu dituku adi badi ne mahaha nebunvue mei a mu mukandu, ne mesu a bafofo neamone mu mufitu ne mu mîdima.

¹⁹Bena kalolo kabidi nebavudishe disanka diabo mu Yehowa, bahele ba munkatshi mua bantu nebasanke mu Wa Tshijila wa Isalele.

²⁰Bualu bua amena tshinyangu wakuvuishibua muntu wa hatuhu, mubuidi wa bualu bua Nzambi wakuhuwa, ne bonso badi batentekela diba dia kubuelabo mu malu mabi badi bajimina.

²¹Badi bavuisha muntu bu muhishibu mu tshilumbu ku dî diabo dia mashimi, badi belela muntu buteyi udi ubela bantu babi ku tshilumbuluidi tshia ku tshibuelelu tshia musoko, badi basesuisha kubinga kua muntu mubinge mu tshilumbu anu bua bualu bua tshianana.

²²Nunku Yehowa wakahikula Abalahama udi wamba dî edi bua bana ba Yakoba ne, Yakoba kena wikala ne bundu ku mesu mpindiu, mpala wandi kena utokoloka kabidi.

²³Kadi hamena bana bandi midimu inuakuenza ne bianza bianyi munkatshi muabo, nebajidile dina dianyi; bulelela, nebajidile Wa Tshijila wa Yakoba, nebikale ne ditshina ku mpala kua Nzambi wa Isalele.

²⁴Bantu kabidi badi batuhakana mu mitshima yabo nebikale ne lungenyi, ne badi batontolola nebayile diyisha.