Read tshiluba Yeshaya 31 Bible Online

Yeshaya 31 - tshiluba bible

Yeshaya 31

¹Mulau wikale kudi bantu badi bahueka mu nshila wa ku Ejipitu bua kudiangatshila dikuatshisha diabo, badi batekemena tubalu, badi beyemena makalu a nvita bualu bua adi a bungi, ne badi babanda ha nyima ha tubalu bualu bua badi batamba bukole, kadi kabena batangila kudi Wa Tshijila wa Isalele, ne kabena bakeba lungenyi kudi Yehowa!

²Kadi yeye kabidi udi ne meji, udi uvuisha makenga, kena ukudimuna mei andi, kadi neajuke bua kukanda ba mu nsubu wa benji ba malu mabi, ne bakuatshishi ba badi benza malu mabi.

³Bena Ejipitu badi bantu, kabena Nzambi nansha; tubalu tuabo tudi nyama, katuena nyuma nansha. Holola Yehowa tshianza tshiandi, mukuatshishi nealenduke, ne udiye mukuatshishe neadishinde, ne buonso buabo nebajimine hohamue.

⁴Bua Yehowa udi ungambila dî edi ne, Bu mudi nyama wa ntambue ne muana mulume wa ntambue ukungula hadieye nyama udiye mukuate, ne habikilabo tshisumbu tshia balami ba mikoko bua kumuluisha, bu mudiye kayi utshina mei adibo bamuela, kayi unvuila mbila yabo, nunku Yehowa wa misumba neahueke hanshi bua kuluangana nvita ha[41] Mukuna wa Siona ne ha mutu ha mukuna wau.

⁵Bu mudi nyunyu ilembelela ha buihi ne masua ai, Yehowa wa misumba nealame Yelushalema; neamulame, neamuhandishe, neamushiye ne neanusungile.

⁶Hinganai bienu, nuenu bana ba Isalele, kudi yeye unuakutamba kutombokela.

⁷Bua mu dituku adi muntu yonso wa munkatshi muenu neimashe mpingu yandi ya argent ne mpingu yandi ya or, inuakudienzela ne bianza bienu bua kuenza nʼai bubi.

⁸Ne Muena Ashû neahone ku muele wa nvita, kauyi wa bantu; muele wa nvita, kauyi wa bantu, neumubutule. Yeye neanyeme muele wa nvita, ne nebabueshe bansongalume bandi mu mudimu wa buhika.

⁹Neahite dibue diandi dia tshinyemenu, nediumuke bualu bua buowa, ne bilobo biandi nebitshine, nebinyeme dibendela, mmudi Yehowa wa misumba wamba, udi ne kahia kandi mu Siona ne tshikutu tshiandi mu Yelushalema.