Read tshiluba Yeshaya 42 Bible Online

Yeshaya 42 - tshiluba bible

Yeshaya 42

¹Tangilai, muntu wanyi undi nshindika, wanyi musungula udi mutshima wanyi usanka bualu buandi. Nakumuela Nyuma wanyi hamʼbidi handi; yeye neavuishile bisamba bia bende kulumbulula kuakane.

²Yeye kena wela dî dikole, kena ubandisha dî diandi, kena udiunvuisha mu misesu.

³Kena utshibula disele didi diamba kukoseka, kena ujima kalulu ka muinda kadi kafuîmba muishi. Neavuishe kulumbulula kuakane mu dilamata diandi dia malu a bushuwa.

⁴Kena uhanga kushindama, mutshima wandi kawena unema bujitu, tô ne hajadikeye kulumbulula kuakane ha buloba; ne ba mu maloba a ku muelelu wa mai manene nebindile diyisha dia mikenji yandi.

⁵Nzambi Yehowa wakafuka bia mu diulu ne wakabivungulula, wakafuka buloba ne bintu bionso bidi bifumamu, udi uha bantu badihu muhuya ne bantu badi bendahu nyuma.

⁶Udi wamba ne, Meme Yehowa nakukubikila mu buakane, nenkukuate ku tshianza tshiebe tshia balume, nenkulame; nenkufile wewe bu tshihungidi tshia bantu, bu munya wa bisamba bionso;

⁷bua kutabasha mesu a bafofo, bua kuhatula bena lukanu mu tshina tshia lukanu, ne bua kumusha badi bashikame mu midima mu nsubu wa lukanu.

⁸Meme ndi Yehowa, adi ndina dianyi; tshiena mpa mukuabo butumbi buanyi, anyi kutendelela kuanyi kudi mpingu misonga.

⁹Monai, malu a diambedi akumana kulua, ndi nnuambila malu mahia-mahia; ndi nnuambila malu â diambedi kayi manji kumueneka.

¹⁰Imbilai Yehowa musambu muhia-muhia, numutumbishe tô ne kunfudilu kua buloba! Nuenu badi benda ha mai manene, ne bintu bionso bidimu, maloba a ku muelelu wa mai manene ne bantu bonso badimu bimutumbishe.

¹¹Tshihela tshisanke, ne misoko idimu, misoko mene idi Bena Kedâ bashikamemu; badi bashikame mu Sela bimbe biabo, bele biabo mbila ha mutu ha mikuna.

¹²Batumbishe Yehowa, bambile ba mu maloba a ku muelelu wa mai manene butumbi buandi.

¹³Yehowa nealuhuke bu muena nvita mukole; neasonsole lukunukunu luandi bu muena nvita; nêle dî diandi, nêle mbila mikole; neadimueneshe bu muena bukitu kudi bena lukuna bandi.

¹⁴Nakuhuwa bianyi tô musangu mule, nakushikama talalâ ne nakadikanda; katataka nengase muadi bu mukashi udi ne didinyenga dia ha kuleleye; nempatule muhuya wanyi lubilu ne nempuyakane diatshimue.

¹⁵Nembutule mikuna minene ne mikuna mikese; nenfubishe midioko yonso idi idiundamu; nenkudimune misulu ilue bisanga, nenkamishe tushiba tua mai tuonso.

¹⁶Nenye ne bafofo mu nshila udibo kabayi bamanye; nembalombole mu nshila idibo kabayi bamanye; nenkudimune mîdima bu munya ku mpala kuabo, ne miaba ya bizakalabizakala bu miaba milandakane. Au mmalu andi ngenza, tshiena mpanga mua kuashikisha.

¹⁷Nebakudimune bantu aba mu nshila, nebatambe kubafuisha bundu, badi beyemena mpingu yakutulabo, badi bambila mpingu yakutulabo ne, Nudi nzambi yetu.

¹⁸Unvuai, bena mahaha, ne nuenu bantu bafofo, joshai talalâ bua nuenu numone!

¹⁹Nganyi udi mufofo bu muena mudimu wanyi? Nganyi udi ne mahaha bu mudi muloho wanyi undi ntuma? Nganyi udi mufofo bu yeye undi muidike? Nganyi udi mufofo bu mudi muena mudimu wa Yehowa?

²⁰Wewe wakumona malu a bungi, kadi kuena wabuesha mu mutshima; matshu ebe adi majibuke, kadi kuena unvua bimpe.

²¹Yehowa wakadi ne disanka bua buakane buandi bua kuvuisha diyisha diandi dinene ne ditumbishibue.

²²Kadi aba mbantu badibo banyenga bintu biabo ne babahaula, buonso buabo badi bakuatshibue mu majimba, badi basokokibue mu nsubu ya lukanu; bakulua bu bintu bidi bakuabo banyenga ku bukole, kakuyi muntu wa kubahandisha; badi bu bintu bia kuhaudibua, kakuena muntu udi wamba ne, Ubahingashe kutudi.

²³Nganyi wa munkatshi muenu wateleja matshu andi ku bualu ebu, wateleja ne wunvua biandi bua matuku adi kâyi manji kulua?

²⁴Wakafila bana ba Yakoba mu bianza bia bahaudi, ne Bena Isalele mu bianza bia banyengi nganyi? Yehowa kakenza bualu ebu, anyi? Nyeye wakenzelabo bibi, wakabengabo kuenda mu nshila yandi, wakahidiabo kutumikila diyisha diandi.

²⁵Nunku yeye wakahumuna bukole bua tshiji tshiandi, ne bukole bua nvita hamʼbidi habo. Nvita yakabatemeshila kahia mu nseke yonso, kadi kabakajingulula bualu ebu; kahia kakabosha, kadi kabakateka bualu ebu mu mitshima yabo.