Read tshiluba Yeshaya 52 Bible Online

Yeshaya 52 - tshiluba bible

Yeshaya 52

¹Tabala, tabala, wewe Siona, udiluatshishe bukole buebe; udiluatshishe bivualu biebe bilengele, wewe Yelushalema, musoko wa tshijila! Bualu bua ku dituku edi tô ne ku mpala udi kayi mutengula ne udi mubiha kabena babuela munda muebe kabidi.

²Umuke mu dinfuenkenya, uditutule hamʼbidi hebe; juka, shikama mu nkuasa wa bukelenge, wewe Yelushalema; udisululuile nkanu idi ha nshingu hebe, wewe muana mukashi muhika wa Siona.

³Bua Yehowa udi wamba dî ne, Bakanuhana tshianana, nebanuhikule kabayi banuhikula ne argent.

⁴Bua Mukelenge Yehowa udi wamba dî edi ne, Bantu banyi bakahueka ku Ejipitu ku tshibangidilu bua kushikamaku tshituha, ne Bena Ashû bakabakengesha hatuhu.

⁵Nunku mpindiu Yehowa udi ukonka ne, Ndi mmona tshinyi kunoko, bualu bua bakuya ne bantu banyi mu buhika tshianana? Yehowa udi wamba ne, Badi babakokesha badi bela bibingu, ne dina dianyi ditu diahendibua dinda tô ne dilolo.

⁶Nunku bantu banyi nebamanye dina dianyi; nunku nebamanye halua difuku diadia ne, Mmeme Yehowa udi wamba dî edi; ka meme ndiku.

⁷Mona makasa a muntu udi ulua ne lumu luimpe bu mudiu malengele ha mikuna, udi umuangalasha lumu lua ditalala, udi ulua ne lumu lua diakalengele, udi umuangalasha lumu lua luhandu, udi wambila Siona ne, Nzambi webe udi ukokesha!

⁸Unvua! Batentekedi bebe badi babandisha mei abo, badi bimba misambu diatshimue; bualu bua nebamone dihingana dia Yehowa ku Siona ne mesu abo mene.

⁹Bandishai mei enu diatshimue mu kuimba kua misambu, nuenu miaba ya mu Yelushalema yakadi bikulu; bualu bua Yehowa wakusamba bantu bandi, wakuhikula Yelushalema.

¹⁰Yehowa wakuvula tshilulu ha diboko diandi dia tshijila ku mesu kua bisamba bionso bia bantu; ne bonso ba kunfudilu kua buloba bakumona luhandu lua Nzambi wetu.

¹¹Umukai, umukai, nuluhuke mu muaba wawa, kanulengi tshintu tshidi tshibiha! Nuluhuke munkatshi mua musoko au; nudilengeshe, nuenu badi batuala malonga a Yehowa.

¹²Bualu bua kanulubukimu lukasa, kanunyemi lubilu; bualu bua Yehowa neaye ku mpala kuenu, ne Nzambi wa Isalele neanulame ku nyima kuenu.

¹³Monai, muntu wanyi neikale ne diakalengele, neatumbishibue, neahandishibue mulu, neatambe kuikala mulu.

¹⁴Bu muakadi ba bungi ne dikema bua bualu buandi, bualu bua mpala wandi wakadi munyanguke ne dinyanguka dihite dia muntu, ne tshifuanyikishi tshiandi tshiakahita tshia bana ba bantu kunyanguka.

¹⁵Nunku yeye[48] neatabuluishe bisamba bia bungi; bakelenge nebabuikile mukana muabo bua bualu buandi; bualu bua nebamone malu adi bakuabo kabayi banze kubambila; nebelangane meji a malu adibo kabayi banze kunvua.