Read tshiluba Yeshaya 56 Bible Online

Yeshaya 56 - tshiluba bible

Yeshaya 56

¹Yehowa udi wamba dî edi ne, Nulonde kulumbulula kuakane, nuenze malu makane; bua luhandu luanyi ludi luamba kumueneka, ne buakane buanyi mu luhandu budi buamba kubuluibua.

²Udi muvudishibue disanka mmuntu udi wenza muanda eu, muana wa muntu udi ûlamata bikole, udi ulamata dituku dia Lumingu bua kadinyangi, udi ukanda tshianza tshiandi bua katshienji bualu bubi.

³Muena tshisamba tshia bende wakalamata kudi Yehowa kambi biandi ne, Yehowa neantahulule kudi bantu bandi bulelela; ne muntu mutungula kambi biandi ne, Mona, ndi mutshi mûme.

⁴Bualu bua Yehowa udi wamba dî edi ne, Ndi ngambila bantu batungula badi bajidila matuku anyi a Lumingu, badi basungula malu adi ansankisha, ne badi balamata ku tshihungidi tshianyi ne,

⁵Nembahe tshivulukidi ne dina mu nsubu muanyi ne munda mua ngumbu yanyi bidi bihita bana balume ne bana bakashi buimpe; nembahe dina dia tshiendelele didi kadiyi dijimishibua.

⁶Bantu ba bende kabidi badi balamata kudi Yehowa bua kumukuatshila mudimu, bua kunanga dina dia Yehowa, ne bua kuikalabo bantu bandi, muntu yonso udi ujidila dituku dia Lumingu bua kadinyangi, udi ulamata tshihungidi tshianyi bikole—

⁷nendue ne bantu aba ku mukuna wanyi wa tshijila, nembavudishile disanka mu nsubu wanyi wa kutendelela. Milambu yabo ya kuosha ne milambu yabo ya bia kudia neyitabushibue ha tshioshelu tshianyi; bualu bua nebabikile[53] nsubu wanyi ne, Nsuhu wa tshitendelelu tshia bantu bonso.

⁸Mukelenge Yehowa, udi usangisha bamuangalashibue ba mu Isalele, udi wamba ne, Nensangishe bakuabo kudiye kabidi, ha mutu ha banakamana kusangisha diambedi.

⁹Nuenu nyama yonso ya mu mpata, nulue kudia, ne nuenu nyama yonso ya muitu kabidi.

¹⁰Batentekedi bandi badi bafofo, buonso buabo kabena ne meji, buonso buabo badi bu mbua idi ihuwa, idi kayiyi mua kubuluka; idi ilotakana, idi ilala hanshi, idi misue kulala tulu.

¹¹Mbua idi ne lumpukusu kabidi, kayena mua kukuta; ne bantu aba badi balami ba mikoko badi kabayi ne meji. Buonso buabo bakuhingana bua kuenda mu nshila yabo, muntu ne muntu udikebela luhetu luandi, kakuyi muntu udi kayi wenza nunku.

¹²Badi bamba ne, Luai bienu, ndi ndua ne nvinyo, netûshe mafu etu tente ne maluvu makole; makelela neikale bu mudi lelu, dituku ditamba bunene.