Read tshiluba Yeshaya 7 Bible Online

Yeshaya 7 - tshiluba bible

Yeshaya 7

¹Mu matuku a Ahaza, muana wa Yotama, muana wa Uziya, mukelenge wa Yuda, Lesine, mukelenge wa Sulia, ne Peka, muana wa Lemalaya, mukelenge wa Isalele, bakabanda mu musoko wa Yelushalema bua kuluangana nʼabo, kadi kabakamanya mua kubatshimuna.

²Bakambila ba mu nsubu wa Davidi ne, Bena Sulia bakuasa tshitudilu tshiabo mu buloba bua Efelayima. Mutshima wa mukelenge wakazakala, ne mitshima ya bantu bandi yakazakala, bu mudi mitshi ya muitu izakala ku mpala kua luhehele.

³Hashishe, Yehowa wakambila Yeshaya ne, Ya biebe, wakidile Ahaza, wewe ne muanʼebe, Shea-yashuba,[8] ku ndekelu kua mutuba wa mai udi uhatuka mu tshina tshia mai tshidi ku mutu kua mukuna, mu nshila udi uyila ku budimi bua Muvuwi wa Bilulu.

⁴Wambile Ahaza ne, Udimuke biebe, wikale talalâ! Kutshinyi, ne mutshima webe kauteketshi, bualu bua nshikidilu ya bimunyi ebi bibidi bidi bihatula anu muishi wa kahia, bua tshiji tshikole tshia Lesine ne Bena Sulia ne tshia muana wa Lemalaya.

⁵Bualu bua Bena Sulia, Bena Efelayima ne muana wa Lemalaya bakukuelela tshifufu, bamba ne,

⁶Tubandeku bua kuluisha buloba bua Yuda, tutshinyishe badimu, tuhandemu muaba bua bualu buetu, tubueshe muana wa Tabêle mu bukelenge munkatshi muabu.

⁷Bua bualu ebu Yehowa udi wamba ne, Muanda eu kawena ujalama, kawena wikalaku.

⁸Bualu bua Damaseke udi mutu wa Sulia, ne Lesine udi mutu wa Damaseke; ne haleba bidimu makumi asambombo ne bitanu, Efelayima neahandike bihesa, bua kikadi tshisamba tshia bantu kabidi.

⁹Samalea udi mutu wa Efelayima, ne muana wa Lemalaya udi mutu wa Samalea. Binuikala kanuyi nuitabusha, kanuena nujadikibua bulelela.

¹⁰Yehowa wakambila Ahaza dî tshiakabidi ne,

¹¹Lombela biebe Yehowa Nzambi webe tshimanyinu. Utshilombe nansha mu muaba wa mu ndondo wa mu buloba, nansha mu muaba udi mulu mene.

¹²Kadi Ahaza wakamba ne, Tshiena ntshilomba, tshiena nteta Yehowa munda.

¹³Yeshaya wakamba ne, Unvuai bienu, nuenu ba mu tshiota tshia Davidi. Budi bualu buhite butekete bua nuenu kuhangisha bantu, bua nudi basue malu enu atondeshe Nzambi wanyi kabidi, anyi?

¹⁴Nunku Mukelenge muine neanuhe tshimanyinu. Monai! Mukashi utshidi kamama neimite difu, nealele muana wa balume, neamuidike dina ne, Imanuele.[9]

¹⁵Bia kudia biandi nebikale manteke ne buitshi hamanyeye mua kubenga malu mabi ne mua kusungula malu makane.

¹⁶Bualu bua diambedi muana eu kayi muanze kumanya mua kubenga malu mabi ne mua kusungula malu makane, buloba bua bakelenge aba babidi baudi utamba kutshina nebushale dikolo.

¹⁷Yehowa neafikishe kûdi wewe, ne kudi bantu bebe, ne kudi ba mu nsubu wa tatu webe, matuku mabi adi kayi manji kulua diambedi, katshia difuku diahanduluka Bena Efelayima kudi Bena Yuda, neanutumine mukelenge wa Ashû mene.

¹⁸Mu dituku adi Yehowa nêle muosa bua kubikila lujiji ludi kunfudilu kua misulu ya mai ya mu Ejipitu, ne lubulubulu ludi mu buloba bua Ashû.

¹⁹Yoyo neyilue, ne buonso buai neyikile mu mpongo ya hatuhu, ne mu mitanta ya mabue, ne hamʼbidi ha mitshi idi ne meba, ne ha madimi onso a kudishamu bimuna.

²⁰Mu dituku adi Mukelenge neanuheye ne dihaya diakabuesheye mu mudimu wandi, ne diakangateye mu nseke ya buloba idi ku nyima kua Musulu wa Pelata, neanubeye ne mukelenge wa Ashû mene, neabeye nsuki ya ku mitu ne miosa ya ha makasa; dihaya nediumushe muedi wonso kabidi.

²¹Mu dituku adi muntu neadishe lukungulu lua ngombe ne mikoko ibidi;

²²ne bua bungi bua mabele adiye ukama kudibi, yeye neadie manteke, bualu bua manteke ne buitshi nebikale bia kudia bia muntu yonso washala munkatshi mua buloba abu.

²³Mu dituku adi, mu muaba wonso muakadi mionshi ya tumuma tua nvinyo tshinunu, yakadi mushinga wa bituha bia argent tshinunu, nemuikale buloba budi bumenesha anu meba ne mingonge.

²⁴Bantu nebalueku ne mikete ne mata, bualu bua buloba buonso nebulue ne meba ne mingonge.

²⁵Ne ebu mbualu bualua ku mikuna yakadibo babundulula ne lukasu diambedi; kuena mua kuyaku bualu bua buowa nebukukuate bua meba ne mingonge; kadi neyikale anu miaba ya kutumaku ngombe ne miaba idi mikoko mua kudiata.