Read tshiluba Lewitiki 1 Bible Online

Lewitiki 1 - tshiluba bible

Lewitiki 1

¹Yehowa Wakabikila Mose, wakamuambila mu ntenta wa kusangakena ne,

²Wambile Bena Isalele ne, Halua muntu ne bintu bidiye musue kuoshila Nzambi, alue biandi ne mulambu wa muana wa ngombe anyi muana wa mukoko.

³Bikala mulambu wandi wa kuosha wa muana wa ngombe, neafile mulume udi kayi ne tshilema, neamushihele ku mbelu kua ntenta wa kusangakena, ne Yehowa neamuitabushe.

⁴Yeye neatenteke tshianza tshiandi ha mutu ha ngombe wa mulambu ne Yehowa neawitabushe bua kubuikidila nʼau bubi buandi.

⁵Yeye neashihe muana wa ngombe ku mesu kua Yehowa, ne bana balume ba Alona bakuidi nebaye ne mashi, nebamiamine mashi ku tshioshelu tshidi ku mbelu kua ntenta wa kusangakena.

⁶Neubule tshiseba tshia ngombe, neamukose bituha.

⁷Bana balume ba Alona bakuidi nebateke kahia ha tshioshelu, balonge nkunyi mu kahia,

⁸ne bana balume ba Alona bakuidi nebalonge bituha ne mutu ne dianyi ha nkunyi mu kahia kadi ha tshioshelu,

⁹kadi nebuvuwe bintu bia munda ne bioku ne mai; ne muakuidi neoshile bintu bionso ha tshioshelu, bu mulambu udibo bosha ha kahia bu tshintu tshidi tshi tua dihembu kudi Yehowa.

¹⁰Bikala mulambu wandi wa kuosha muana wa mukoko anyi muana wa mbushi, yeye neafile mulume udi kayi ne tshilema.

¹¹Yeye neamushihe ku luseke lua tshioshelu lua ku nôde, ku mesu kua Yehowa; ne bana balume ba Alona bakuidi nebamiamine mashi ku tshioshelu.

¹²Yeye neamukose bituha ne mutu ne dianyi, ne muakuidi neabilonge ha nkunyi idi mu kahia kadi ha mutu ha tshioshelu,

¹³kadi neuvuwe bintu bia munda ne bioku ne mai, ne muakuidi neoshile bintu bionso ha tshioshelu bu mulambu wa kuosha ha kahia bu tshintu tshidi tshitua dihembu kudi Yehowa.

¹⁴Bikala mulambu wandi wa kuosha wa nyunyu, yeye neafile nansha nyunyu wa nkutshi nansha mputu nyunyu.

¹⁵Muakuidi nealue handi ku tshioshelu, neanyengabashe nshingu wandi, neamuoshile ha tshioshelu, mashi andi neamate hanshi ku luseke lua tshioshelu,

¹⁶yeye neumushe dibodi ne masala, nealele ku luseke lua tshioshelu ludi ku esete, mu muaba wa butue.

¹⁷Yeye neamukuate ku mahuahua andi, neamuhande hankatshi, kadi kahanduludi bituha bibidi nansha, ne muakuidi neamuoshile ha tshioshelu, ha nkunyi idi mu kahia bu mulambu wa kuosha ha kahia bu tshintu tshidi tshitua dihembu kudi Yehowa.