Read tshiluba Lewitiki 15 Bible Online

Lewitiki 15 - tshiluba bible

Lewitiki 15

¹Yehowa wakambila Mose ne Alona ne,

²Nuambile Bena Isalele ne, Hahatuka tufina mu mubidi wa muntu, tufina atu tudi tubi.

³Eu mmukenji wa bukoya buandi nansha hahatuka tufina mu mubidi wandi nansha hashalatu mu mubidi tudi anu tubi.

⁴Bulalu buonso budiye ulalahu hahatuka tufina budi ne bukoya, ne bintu bionso bidiye ushikamahu bidi ne bukoya.

⁵Muntu yonso udi ulenga bulalu buandi tshianza neuvuwe bilulu biandi, neadioweshe ne mai, neikale mukoya tô ne dilolo.

⁶Muntu yonso udi ushikama ha tshintu tshiashikameye neuvuwe bilulu biandi, neadioweshe ne mai, neikale ne bukoya tô ne dilolo.

⁷Muntu yonso udi umulenga tshianza hamʼbidi handi neuvuwe bilulu biandi, neadioweshe ne mai, neikale ne bukoya tô ne dilolo.

⁸Biahatuka tufina mu mubidi wa muntu, biatuidileye muntu udi muakane lute, yeye neuvuwe bilulu biandi, neadioweshe ne mai, neikale ne bukoya tô ne dilolo.

⁹Biashikameye ha tshiseba tshia ha nyima ha kabalu, netshikale ne bukoya.

¹⁰Muntu yonso udi ulenga tshintu tshiakashalameye tshianza neikale ne bukoya tô ne dilolo, muntu udi utuala bintu ebi neuvuwe bilulu biandi, neadioweshe ne mai, neikale ne bukoya tô ne dilolo.

¹¹Bialenga muntu udi tufina tuhatuka mu mubidi wandi munga muntu tshianza diambedi yeye kayi muanze kuowa bianza biandi, yeye neuvuwe bilulu biandi, neadioweshe ne mai, neikale ne bukoya tô ne dilolo.

¹²Bialenga muntu udi tufina tuhatuka mu mubidi wandi tshivuadi tshia dima tshianza, nebatshishihe, ne nguvu yonso yakasongabo ya mabaya nebayuvuwe ne mai.

¹³Hashika disama dia muntu udi tufina tuhatuka mu mubidi wandi, nebamubadile matuku muanda mutekete bua kumulengesha, ne yeye neuvuwe bilulu biandi, neadioweshe mu mai a mueji, neikale muakane.

¹⁴Halua dituku dia muanda mukulu, yeye neadiangatshile nansha nyunyu ya nkutshi ibidi nansha mputu nyunyu ibidi, nealue nʼai ku mpala kua Yehowa ku mbelu kua ntenta wa kusangakena, neayifile mu bianza bia muakuidi,

¹⁵ne muakuidi neayifile bu mulambu wa kubuikila nʼau bubi ne mukuabo bu mulambu wa kuosha ha kahia, muakuidi neafue milambu ya kumubuikidila nʼai bubi ku mpala kua Yehowa bualu bua tufina tuandi.

¹⁶Hela muntu bilumi, yeye neadioweshe mubidi wandi wonso ne mai, neikale ne bukoya tô ne dilolo.

¹⁷Biamatshila bilumi tshilulu anyi tshiseba nebatshiuvuwe ne mai, netshikale ne bukoya tô ne dilolo.

¹⁸Bialala mulume ne mukashi, biamueleye bilumi, bubidi buabo nebadioweshe ne mai, nebikale ne bukoya tô ne dilolo.

¹⁹Hamona mukashi katshetshi, yeye neikale ne bukoya tô matuku muanda mutekete, ne muntu yonso udi umulenga tshianza neikale ne bukoya tô ne dilolo.

²⁰Tshintu tshionso tshidiye ulala hadiye ku katshetshi netshikale ne bukoya, ne tshintu tshionso tshidiye ushikama netshikale ne bukoya.

²¹Muntu yonso udi ulenga bulalu buandi tshianza neuvuwe bilulu biandi, neadioweshe ne mai, neikale ne bukoya tô ne dilolo.

²²Muntu yonso udi ulenga tshintu tshiakashikameye neuvuwe bilulu biandi, neadioweshe ne mai, neikale ne bukoya tô ne dilolo.

²³Bikala tshintu atshi ha bulalu buakadiye anyi ha tshintu tshiakashikameye hakatshilengeye, yeye neikale ne bukoya tô ne dilolo.

²⁴Bialala handi mulume ne biamumatshila katshetshi, yeye neikale ne bukoya tô matuku muanda mutekete, bulalu buonso budiye ulala nebuikale ne bukoya.

²⁵Biamona mukashi katshetshi mu matuku a bungi adi kâyi a tshikondo tshiandi, matuku au onso neikale bu matuku a tshikondo tshia ndi, yeye udi ne bukoya.

²⁶Bulalu buonso budiye ulala hatshidiye ne disama, nebuikale bu bulalu bua mu tshikondo tshiandi tshia katshetshi, tshintu tshionso tshi diye ushikama netshikale ne bukoya bu muditshi mu tshikondo tshiandi.

²⁷Muntu yonso udi ulenga bintu ebi bianza neikale ne bukoya, neuvuwe bilulu biandi, neadioweshe ne mai, neikale ne bukoya tô ne dilolo.

²⁸Hashika disama diandi, nebamubadile matuku muanda mutekete, ku nyima neikale mulengele.

²⁹Halua dituku dia muanda mukulu, yeye neangatshile nansha nyunyu ya nkutshi ibidi nansha mputu nyunyu ibidi, nealue nʼai kudi muakuidi ku mbelu kua ntenta wa kusangakena.

³⁰Muakuidi neafile umue bu mulambu wa kubuikila nʼau bubi ne mukuabo bu mulambu wa kuosha ha kahia Muakuidi neafile milambu ei bua kumubuikidila nʼai bubi ku mpala kua Yehowa bualu bua bukoya bua katshetshi kandi.

³¹Nunku nenutahulule Bena Isalele ku bukoya buabo, bua bobo kabafu mu bukoya buabo honabo nsubu wanyi wa tshitendelelu tshidi munkatshi muabo.

³²Eu mmukenji kudi muntu udi tufina tuhatuka mu mubidi wandi ne wa bintu bidi bilumi bimatshila bua kumuvuisha mukoya,

³³ne kudi mukashi hamoneye katshetshi, ne kudi muntu udi tufina tuhatuka mu mubidi wandi, ne kudi muntu udi ulala ne mukashi hatshidiye ha katshetshi.