Read tshiluba Lewitiki 16 Bible Online

Lewitiki 16 - tshiluba bible

Lewitiki 16

¹Yehowa wakayikila ne Mose ku nyima kua lufu lua bana balume ba Alona hakaluabo ku mpala kua Yehowa ne hakafuabo.

²Yehowa wakambila Mose ne, Wambile Alona, mukulu webe, ne, Kulu nusangu yonso mu muaba wa tshijila udi ku nyima kua tshilulu tshikudika ku mpala kua tshibuikilu tshia mushete wa Nzambi, kufu biebe, bualu bua meme nemmueneke mu difutu ku mutu kua tshibuikilu tshia mushete wa Nzambi.

³Alona nealue ne bintu ebi mu muaba wa tshijila ne muana mulume wa ngombe wa mulambu wa kubuikila nʼau bubi ne tshimpanga tshia mulambu wa kuosha ha kahia.

⁴Nealuate tshikowelu tshia ku ne mihanu ya lin, nêle mukaba wa lin ku tshimono tshiandi, nease tshifufu tshia lin ku mutu ebi mbilulu bia tshijila, yeye neowe mai, neabiluate.

⁵Yeye neangate kudi Bena Isalele mpumbu ya mbushi ibidi bu mulambu wa kubuikila nʼau bubi ne tshimpanga tshimue tshia mulambu wa kuosha ha kahia.

⁶Alona neafile muana mulume wa ngombe wa mulambu wa kubuikila nʼau bubi buandi ne bubi bua bantu ba mu nsubu muandi.

⁷Neangate mbushi ibidi, neayiteke ku mpala kua Yehowa ku mbelu kua ntenta wa kusangakena.

⁸Alona nêle mbushi ei ibidi nshobo, biakuata nshobo umue, ngua Yehowa, ne biakuata nshobo mukuabo, ngua Azazele.

⁹Alona neafile mbushi wakakuatabo kudi nshobo wa Yehowa bu mulambu wa kubuikila nʼau bubi.

¹⁰Kadi mbushi wakakuatabo kudi nshobo wa Azazele neamuteke ne muoyo ku mpala kua Yehowa bua kubuikila nʼandi bubi bua bantu, ne bua kumuihatshilabo bua Azazele mu tshihela.

¹¹Alona neafile muana mulume wa ngombe wa mulambu wa kubuikila nʼau bubi buandi, neadibuikidile bubi ne bua bantu ba mu nsubu muandi, neashihe muana mulume wa ngombe wa mulambu wa kubuikila nʼau bubi buandi.

¹²Neangate dilonga tente ne makala a kahia ku tshioshelu tshidi ku mpala kua Yehowa, ne bianza biandi tente ne musenga wa manananshi, nealue nʼabi ku nyima kua tshilulu tshikudika,

¹³neateke musenga wa manananshi ha kahia ku mpala kua Yehowa bua ditutu dia muishi wa musenga wa manananshi dibuikile tshibuikilu tshia mushete wa Nzambi, bua yeye katu nansha.

¹⁴Neangate mashi a muana mulume wa ngombe, neamiamine mashi ne munu wandi ku tshibuikilu tshia mushete ku luseke lua ku esete, neamiamine mashi ku mpala kua tshibuikilu tshia mushete ne munu wandi kabidi misangu muanda mutekete.

¹⁵Nunku yeye neashihe mbushi wa mulambu wa kubuikila nʼau bubi bua bantu, nealue ne mashi andi ku nyima kua tshilulu tshikudika, nênze bu muakenzeye ne mashi a muana mulume wa ngombe, neamiamine mashi ku tshibuikilu tshia mushete wa Nzambi ne ku mpala kua tshi kabidi.

¹⁶Yeye neafile mulambu eu bua muaba wa tshijila, bualu bua Bena Isalele kabena bakane, ne bualu bua disambuka diabo dia mikenji, ne bualu bua malu mabi abo onso, nênze nunku bua kulengesha ntenta wa kusangakena udi munkatshi muabo, munkatshi mua bubi buabo.

¹⁷Muntu mukuabo kikadi mu ntenta wa kusangakena hayeye kufila mulambu wa kubuikila nʼau bubi buandi mu muaba wa tshijila ne bubi bua ba mu nsubu muandi ne bubi bua Bena Isalele, tô ne hahatukeye mu nsubu.

¹⁸Neahatuke bua kuya ku tshioshelu tshidi ku mpala kua Yehowa bua kutshilengesha neangate mashi a muana mulume wa ngombe ne mashi a mbushi, nealabe ku nsengu ya ku tshioshelu.

¹⁹Neamiamine mashi ne munu wandi ha mutu hatshi misangu muanda mutekete, neatshilengeshe, neatshijidile bua bubi bua Bena Isalele.

²⁰Hashikisheye kulengesha muaba wa tshijila ne ntenta wa kusambakena ne tshioshelu, nealue ne mbushi udi ne muoyo.

²¹Alona neatentekashe bianza biandi bibidi ha mutu ha mbushi udi ne muoyo, neatondele Bena Isalele mabi yabo ne disambuka diabo dionso dia mikenji ne malu mabi abo onso, neatentekashe malu mabi onso ha mutu ha mbushi, nebamuihate mu tshihela ku tshianza tshia muntu wakasunguleye diambedi,

²²mbushi neatuale bujitu bua mibi yabo mu muaba wa hatuhu, neihate mbushi mu tshihela.

²³Alona nealue biandi mu ntenta wa kusangakena, neavule bilulu biandi bia lin biakadiye muluate hakayeye mu muaba wa tshijila, neabishiyemu,

²⁴yeye neowe mai mu muaba wa tshijila, nealuate bilulu biandi, neahatuke neafile mulambu wandi wa kuosha ha kahia ne mulambu wa bantu wa kuosha ha ka hia, neabuikile bubi buandi ne bubi bua bantu.

²⁵Neoshe dianyi dia mulambu wa kubuikila nʼau bubi ha tshioshelu.

²⁶Muntu wakihata mbushi wa Azazele neuvuwe bilulu biandi, neowe mai, ne ku nyima yeye neuhingane mu tshitudilu.

²⁷Muana mulume wa ngombe wa mulambu wa kubuikila nʼau bubi ne mbushi wa mulambu wa kubuikila nʼau bubi miena mashi akaluabo nʼau bua ku buikila bubi mu muaba wa tshijila nebaye nʼai ku butshika bua tshibi dilu, neboshe biseba biai ne munyinyi wai ne tuma tuai mu kahia.

²⁸Muntu wakuosha bintu ebi neuvuwe bilulu biandi ne mubidi wandi ne ku nyima neuhingane mu tshitudilu.

²⁹Bualu ebu nebuikale mukenji kunudi tshiendelele mu dituku dia dikumi mu ngondo wa muanda mutekete nenujinge mu mitshima yenu, kanuenji mudimu, nansha bantu baledibue mu nsubu yenu nansha benyi badi munkatshi muenu,

³⁰bualu bua edi ndituku didibo banubuikidila bubi buenu bua kunulengesha nunku nenuikale balengeshibue ku mibi yenu yonso ku mpala kua Yehowa.

³¹Edi ndituku dia lumingu dia dikisha dienu, nujinge mu mitshima yenu, eu mmukenji kunudi tshiendelele.

³²Muakuidi wakelabo manyi ha mutu ne wakajidilabo bua kubuela mu mudimu wa tatuʼandi yeye neafile mulambu wa kubuikila nʼau bubi, nealuate bilulu bia lin bilulu bia tshijila,

³³neafile mulambu bua kujidila nsubu wa tshitendelelu ne bua ntenta wa kusangakena ne bua tshioshelu ne bua kubuikila nʼau bubi bua bakuidi ne bua bantu bonso.

³⁴Eu newikale mukenji kunudi tshiendelele bua kubuikila bubi bua Bena Isalele musangu umue ku tshidimu ku tshidimu. Bakenza bu muakambila Yehowa Mose.