Read tshiluba Lewitiki 2 Bible Online

Lewitiki 2 - tshiluba bible

Lewitiki 2

¹Halua muntu ne mulambu wa bukula kudi Yehowa, neafile bukula bubotesha, newelehu manyi ne musenga wa manananshi,

²nealue nʼabu kudi bana balume ba Alona bakuidi, neambulule dianza tente ne bukula ne manyi abu ne manananshi abu onso, ne muakuidi neabuoshile ha tshioshelu, bu tshivilukidi, bu tshintu tshidi tshi tua dihembu kudi Yehowa,

³ne tshituha tshia bukula tshidi tshishale netshikale tshia Alona ne bana bandi balume ntshintu tshidi tshitambe tshia tshijila tshia mulambu wa kuoshila Yehowa ha kahia.

⁴Hawalua ne mulambu wa bukula budibo balamba mu nfulu, nebuikale mikata ya bukula budi kabuyi ne luevene busangisha ne manyi, anyi mikata ya bukula budi kabuyi ne luevene idi ne manyi mela ha mutu.

⁵Bikala mulambu webe wa bukula budibo balamba mu dilonga, newikale wa bukula budi kabuyi ne luevene busangisha ne manyi.

⁶Wewe neusunsulule mukata eu, neuwelehu manyi tshintu etshi ntshintu tshia mulambu wa bukula.

⁷Bikala mulambu webe wa bukula budibo balamba mu dilonga, neusangishe bukula bubotesha ne manyi.

⁸Wewe neulue ne mulambu wa bukula budi busangisha ne bintu ebi kudi Yehowa, ulue nʼabi kudi muakuidi ne yeye nealue nʼabi ku tshioshelu.

⁹Muakuidi neameme tshituha tshia mulambu wa bukula bu tshivulukidi, neatshioshile ha tshioshelu ne kahia bu tshintu tshidi tshi tua dihembu kudi Yehowa.

¹⁰Tshituha tshidi tshishale netshikale tshia Alona ne bana bandi balume ntshintu tshidi tshitambe tshia tshijila tshia mulambu wa kuoshila Yehowa ha kahia.

¹¹Kanulu kudi Yehowa ne mulambu wa bukula budi busangisha ne luevene, kanuoshi luevene anyi buitshi bu mulambu wa kuoshila Yehowa.

¹²Nudi mua kulua ne bintu bia kumudilu binudi nuhuola kudi Yehowa, kadi bintu ebi kabiena bu bintu bidi bitua dihembu ha tshioshelu.

¹³Neutuishe milambu yonso ya bukula ne luehu, kanulekedi luehu lua tshihungidi tshia Nzambi mu milambu yenu ya bukula, tuishai milambu yonso ne luehu.

¹⁴Biwalua ne mulambu wa bintu bia kumudilu binudi nuhuola kudi Yehowa, nufile bintu bidi mu miehu biosha mu kahia, miehu mihia-mihia idibo ba tua diambedi.

¹⁵Wewe neuwelehu manyi ne musenga wa manananshi tshintu etshi ntshintu tshia mulambu wa bukula.

¹⁶Muakuidi neabuoshe bu tshivulukidi, tshituha tshia miehu nu tua ne tshia manyi ne musenga wonso wa manananshi tshintu etshi ntshintu tshia mulambu wa kuoshila Yehowa ha kahia.