Read tshiluba Lewitiki 23 Bible Online

Lewitiki 23 - tshiluba bible

Lewitiki 23

¹Yehowa wakambila Mose ne,

²Wambile Bena Isalele ne, Nakasungula matuku andi musue bantu badie bidia bia Yehowa anudi mua kumanyisha bantu, matuku au neikale matuku a tshijila.

³Nukuate mudimu matuku asambombo kadi dituku dia muanda mutekete ndituku dia lumingu dia kuikisha, dituku dia disangisha dia tshijila, kanuenji mudimu, edi ndituku dia lumingu dia Yehowa mu nsubu yenu yonso.

⁴Au mmatuku a kudia bidia bia Yehowa, matuku a tshijila andi musue wewe ubamanyishe ku bikondo biau.

⁵Ngondo wa kumudilu, mu matuku dikumi ne anai, diba dia dilolo, ndituku dia kuhita kua Yehowa.

⁶Dituku dia matuku dikumi ne atanu a ngondo eu mene ndituku dia kudila Yehowa bidia bidi kabiyi ne luevene, nenudie bidia bidi kabiyi ne Iuevene matuku muanda mutekete.

⁷Dituku dia kumudilu nedikale dituku dia tshijila, kanuenji mudimu.

⁸Kadi nenufile milambu ya kuoshila Yehowa ha kahia tô matuku muanda mutekete, dituku dia muanda mutekete ndituku dia tshijila, kanuenji mudimu.

⁹Yehowa wakambila Mose ne,

¹⁰Wambile Bena Isalele ne, Hanuabuela mu buloba bundi nnuha, ne hanuahuola bintu bia mu buloba, nulue bienu ne bintu binudi nuhuola diambedi kudi muakuidi,

¹¹yeye neanyukule tshisumbu tshia bintu ku mpala kua Yehowa, bualu bua kunuitabushisha kudi Yehowa, muakuidi neatshinyukule dituku didi dilonda dia lumingu.

¹²Mu dituku dinudi nunyukula bintu, nenufile muana mulume wa mukoko wa tshidimu tshimue udi kayi ne tshilema bu mulambu wa kuoshila Yehowa ha kahia.

¹³Nenufile diatshimue ne mulambu wa bukula wa bituha bibidi bia dikumi bia épha[10] busangisha ne manyi, mulambu wa kutua dihembu dimpe muoshile Yehowa, nenufile mulambu wa nvinyo wa kunua wa tshituha tshinai tshia hin.[11]

¹⁴Kanudi mampa anyi manvua akoshabo mu kahia, anyi manvua mabishi dituku edi diambedi kanuyi banze kufila milambu yenu kudi Nzambi eu udi mukenji wa tshiendelele mu bikondo bienu bionso mu nsubu yenu yonso.

¹⁵Nenubange ku dituku didi dilonda dia lumingu, dituku dinuakalua ne tshisumbu tshia bintu bidibo banyukula, nenubale matuku a lumingu muanda mutekete,

¹⁶tô ne ku dituku didi dilonda dituku dia lumingu dia muanda mutekete bu matuku makumi atanu nenufile mulambu wa bukula buhia-buhia kudi Yehowa.

¹⁷Nenufume ku nsubu yenu ne mitanda ya mampa ibidi ya kunyukula, milamba ne bituha bibidi bia dikumi bia épha ya bukula bubotesha busangisha ne luevene, ebi mbintu bihuola bia diambedi bifila kudi Yehowa.

¹⁸Nulue ne mampa au ne bana ba mikoko muanda mutekete ba tshidimu tshimue badi kabayi ne bilema ne muana mulume wa ngombe ne bimpanga bibidi, bintu ebi nebikale bu mulambu wa kuoshila Yehowa ha kahia, udibo bafila ne mulambu wa bukula ne mulambu wa bintu bia kunua, bu mulambu wa kuosha ha kahia udi utua dihembu kudi Yehowa.

¹⁹Nenufile mpumbu wa mbushi umue bu mulambu wa kubuikila nʼau bubi ne bana balume ba mikoko babidi ba tshidimu tshimue bu mulambu wa kuvuisha nʼau ditalala.

²⁰Muakuidi neanyukule bintu ebi ne mampa a bintu biakahuolabo diambedi ne bana ba mikoko babidi bu mulambu udibo banyukula ku mesu kua Yehowa, nebikale bintu bia tshijila kudi Yehowa bualu bua muakuidi.

²¹Wewe newambile bantu dituku adi bua dituku adi dikale dituku dia disangisha dia tshijila kunudi, kanuenji mudimu eu udi mukenji wa tshiendelele mu nsubu yenu yonso tô ne mu bikondo bienu bionso.

²²Hanuahuola bintu binuakakuna mu buloba, kanuhuodi ku matengu a madimi, kanusangishi bintu bionso, nenushiye bintu ebi bua kukuatshisha nʼabi bahele ne benyi meme ndi Yehowa, Nzambi wenu.

²³Yehowa wakambila Mose ne,

²⁴Wambile Bena Isalele ne, Dituku dia kumudilu dia ngondo wa muanda mutekete nedikale dituku dia kuikisha kunudi, dituku dia tshivulukidi didibo bela mpungi, dituku dia disangisha dia tshijila.

²⁵Ka nuenji mudimu, nenufile mulambu wa kuoshila Yehowa ha kahia.

²⁶Yehowa wakambila Mose ne,

²⁷Dituku dia matuku dikumi a ngondo eu wa muanda mutekete ndituku dia kubuikila bubi bua bantu, nebikale dituku dia disangisha dia tshijila, nenujinge mu mitshima yenu, nenufile mulambu wa kuoshila Yehowa ha kahia.

²⁸Kanuenji mudimu dituku adi, edi ndituku dia kubuikila bubi buenu ku mesu kua Yehowa.

²⁹Muntu yonso udi uhidia kujinga mu mutshima wandi dituku adi nebamumushe munkatshi mua bana babo.

³⁰Muntu yonso udi wenza mudimu dituku adi nebamumushe munkatshi mua bana babo.

³¹Kanuenji mudimu nansha mukese dituku adi eu udi mukenji wa tshiendelele mu bikondo bienu bionso mu nsubu yenu yonso.

³²Dituku edi nedikale dituku dia lumingu dia kuikisha, ne nuenu nenujinge mu mitshima yenu, nuikishe bienu ku dilolo dia matuku tshitema a ngondo eu tô ne ku dilolo dia matuku dikumi.

³³Yehowa wakambila Mose ne,

³⁴Wambile Bena Isalele ne, Dituku dia matuku dikumi ne atanu a ngondo eu wa muanda mutekete nebikale dituku didibo badia bidia bia mu bitandatanda tô matuku muanda mutekete.

³⁵Dituku dia kumudilu nedikale dituku dia disangisha dia tshijila, kanuenji mudimu.

³⁶Matuku muanda mutekete nenufile milambu ya kuoshila Yehowa ha kahia, dituku dia muanda mukulu nedikale dituku dia disangisha dia tshijila kunudi, nenufile mulambu wa kuoshila Yehowa ha kahia, edi ndisangisha dia tshijila, kanuenji mudimu.

³⁷Â mmatuku anakasungula bua nuenu nuambile bantu bua bikondo bia masangisha a tshijila bia kufila milambu ya kuoshila Yehowa ha kahia, mulambu wa kuosha ha kahia ne mulambu wa bukula ne mulambu wa bintu bia kunua, mulambu dituku diau mulambu dituku diau,

³⁸malu â adi ha mutu ha matuku a lumingu lua Yehowa ne bintu binudi basue kufila ne ha mutu ha bintu bidi mitshima yenu musue kufila kudi Yehowa.

³⁹Halua dituku dia matuku dikumi ne atanu a ngondo wa muanda mutekete hanuashikisha kuhuola bintu, nenudie bidia bia Yehowa matuku muanda mutekete, dituku dia kumudilu nedikale dituku dia kuikisha, ne dituku dia muanda mukulu nedikale dituku dia kuikisha.

⁴⁰Dituku dia kumudilu nenuangate mamuma a mitshi mimpe ne bikola bia mabue ne matamba a mitshi ne ntuhu ya mu mai, nenusanke ku mesu kua Yehowa, Nzambi wenu, matuku muanda mutekete.

⁴¹Nenudie bidia nunku ku mesu kua Yehowa matuku muanda mutekete ku tshidimu ku tshidimu, eu udi mukenji wa tshiendelele mu bikondo bienu bionso, nenuenze bualu ebu mu ngondo wa muanda mutekete.

⁴²Nenuikale mu bitandatanda matuku muanda mutekete; bantu bonso hakalelabo mu Isalele nebashikame mu bitandatanda

⁴³bua kumanyisha bantu ba mu bikondo bienu bionso ne, Bena Isalele bakashikama mu bitandatanda hanakahatuka nʼabo mu buloba bua Ejipitu, meme ndi Yehowa, Nzambi wenu.

⁴⁴Mose wakambila Bena Isalele nunku bua matuku a kudia bidia akasungula Yehowa.