Read tshiluba Lewitiki 25 Bible Online

Lewitiki 25 - tshiluba bible

Lewitiki 25

¹Yehowa wakambila Mose mu mukuna wa Sinai ne,

²Wambile Bena Isalele ne, Hanuabuela mu buloba bundi nnuha, nenushiye buloba bua kubandabu kudi Yehowa.

³Nenukune bintu mu madimi enu bidimu bisambombo, nenulongolole mitshi ya tumuma, ne nuhuole tumuma tua mitshi bidimu bisambombo,

⁴kadi tshidimu tshia muanda mutekete buloba nebuikale mua kubandabu kudi Yehowa, kanukunyi bintu mu madimi, kanulongolodi mitshi ya tumuma.

⁵Kanuhuodi bintu bidi bidimenena anyi tumuma didi tudimenena etshi ntshidimu tshia kubanda kua buloba.

⁶Bintu bidi bidimenena mu tshidimu tshia kubanda kua buloba nebikale bintu bienu bia kudia, bintu biebe ne bia muhika webe mulume ne bia muhika webe mukashi ne bia muena mudimu webe ne bia muenyi udi ushikama nʼebe

⁷ne bia bimuna biebe ne bia nyama yonso idi mu buloba buebe bintu bionso biakadimenena nebikale bintu bia kudia.

⁸Wewe neubale bidimu bia kubanda kua buloba muanda mutekete, bidimu muanda mutekete misangu muanda mutekete, neubale nunku bidimu muanda mutekete bia kubanda kua buloba misangu muanda mutekete tô ne ku bidimu makumi anai ne tshitema.

⁹Nunku wewe neweleshe mpungi bikole dituku dia dikumi mu ngondo wa muanda mutekete, mu dituku dia kubuikila bubi bua bantu wewe neweleshe mpungi kuonso mu buloba buenu.

¹⁰Wewe neujidile tshidimu tshia makumi atanu, newele di bua bantu bonso bahete budishikaminyi, etshi ntshidimu tshia disanka dinene kunudi, neuhingishe buloba buonso kudi bena buloba, ne muntu yonso neahingane kudi bana babo.

¹¹Tshidimu tshia makumi atanu netshikale tshidimu tshia disanka dinene kunudi, kanukunyi bintu, kanuhuodi bintu bidi bidimenena anyi tumuma tudi tudimenena.

¹²Etshi ntshidimu tshia disanka dinene, netshikale tshidimu tshia tshijila kunudi, nenudie bintu bidi bidimenena mu madimi.

¹³Mu tshidimu etshi tshia disanka dinene nenuhingane muntu yonso ku buloba buandi muntu yonso ku buloba buandi.

¹⁴Binuahanyisha mukuenu bintu bienu anyi binuasumba bintu ku bianza bia mukuenu, kanuenzedianganyi bibi.

¹⁵Bu mudi bungi bua bidimu ku nyima kua tshidimu tshia disanka dinene wewe neusumbe bintu kudi mukuenu, ne yeye neakusumbishe bu mudi bungi bua bidimu biakamaneye kuhuola bintu.

¹⁶Biahita bidimu bia bungi, wewe udi mumanye mua kuhandisha mushinga wa bintu, ne bialeha bidimu bikese, wewe neuhuekeshe mushinga wabi bu mudi bungi bua bintu bidiye ukusumbisha.

¹⁷Kanuenzedianganyi bibi, nuenu nenutshine Nzambi webe bualu bua meme ndi Yehowa, Nzambi wenu.

¹⁸Nuenu nenutumikile mei anyi ne mikenji yanyi, nenubienze, nenushikame mu buloba talala.

¹⁹Buloba nebukuame bintu bia bungi, nuenu nenukute mafu tente, nenushikame bienu talala.

²⁰Binuadikonka ne, Netudie tshinyi tshidimu tshia muanda mutekete hatudi katuyi tukuna bintu, katuyi tuhuola bintu?

²¹nennuvudishile disanka dianyi tshidimu tshisambombo, ne buloba nebukuame bintu bia bidimu bisatu.

²²Hanuakuna bintu tshidimu tshia muanda mukulu, nenudie bintu bia diambedi biakadi bishale mu nsubu yenu, tô ne ku tshidimu tshia tshitema hanuahuola bintu, nenudie bintu bia diambedi biakadi bishale.

²³Kanuena mua kusumbisha muntu buloba bua yeye kuikala nʼabu tshiendelele, buloba buonso mbuanyi, ne nuenu nudi bu benyi ne bena luendu ku mesu kuanyi.

²⁴Mu buloba buonso bunudi nuhiana biasumbabo bukuabo, nebashiye tshieya tshia buhikudi bua buloba kudi wakabusumbisha.

²⁵Bialua mukuenu muntu muhele, biahaneye tshituha tshia buloba buandi, ne bialua bana babo bua kubuhikula, badi mua kuhikula buloba buakahanabo kudi muanʼabo.

²⁶Bikala muntu eu kayi ne muanʼabo bua kubuhikula, kadi bialueye muntu mubanji udi ne bintu bia kubuhikula nʼabi,

²⁷yeye neabale bungi bua bidimu biakahita hakamusumbisheye buloba, neamuhingashile mushinga wabu ne bintu bikuabo ha mutu, yeye neahingane mu buloba buandi.

²⁸Bikaleye kayi ne bintu bia kubuhikula nʼabi, nunku buloba buakahaneye nebuikale mu bianza bia muntu wakabusumba tô ne halua tshidimu tshia disanka dinene, mu tshidimu tshia disanka dinene buloba nebuhikudibue ne yeye neahingane mu buloba buandi.

²⁹Biahana muntu nsubu mu musoko udi munyungulula ne lumbu yeye udi mua kuhikula nsubu diambedi tshidimu tshimue katshiyi tshianze kuhita, tô tshidimu tshijima yeye udi mua kumuhikula.

³⁰Kadi biahangeye kumuhikula diambedi tshidimu tshimue katshiyi tshianze kuhita, nunku nsubu wa mu musoko udi munyungulula ne lumbu neikale kudi wakamusumba tô tshiendelele, muena nsubu kena uhingana mu nsubu halua tshidimu tshia disanka dinene.

³¹Kadi nsubu ya mu misoko idi kayiyi minyungulula ne lumbu neyikale ne madimi, nudi mua kuyihikula, ne bena nsubu nebahingane halua tshidimu tshia disanka dinene.

³²Kadi misoko ya Bena Lewi ne nsubu ya mu misoko yabo, Bena Lewi badi mua kuyihikula hasuabo.

³³Biahikula Muena Lewi nsubu, nunku nsubu wakahanabo ne musoko wa buhianyi buandi nebihingane kudibo halua tshidimu tshia disanka dinene, bualu bua nsubu ya mu misoko ya Bena Lewi idi buhianyi buabo munkatshi mua Bena Isalele.

³⁴Kadi kabena mua kuhana madimi adi ku matshika a misoko yabo, ebu mbuhianyi buabo tshiendelele.

³⁵Bialua mukuenu mundi muhele, biateketa maboko andi ha buihi hebe, wewe neumukuatshishe, yeye neikale kûdi bu muenyi anyi bu muena luendu.

³⁶Kumulombi tshia kasombela, kadi utshine Nzambi webe, mukuenu neikale nʼebe.

³⁷Kumulombi tshia kasombela ku argent iwakamusombesha anyi ku bintu bia kudia biwakamuha.

³⁸Meme ndi Yehowa, Nzambi webe, wakakuhatula mu buloba bua Ejipitu bua kukuha buloba bua Kanâna ne bua kuikala Nzambi webe.

³⁹Bialua mukuenu mundi muhele, biadihaneye kûdi, kumuenzeshi mudimu bu muhika.

⁴⁰Yeye neikale nʼebe bu muena mudimu anyi bu muenyi, neakukuatshile mudimu tô ne halua tshidimu tshia disanka dinene,

⁴¹hashishe yeye neumuke kudi ne yeye ne bana bandi badi nʼandi, nebahingane kudi bana babo ne ku buhianyi bua batatu bandi.

⁴²Bualu bua bobo badi bantu banyi banakuhatula mu buloba bua Ejipitu, kababahanyi bu bahika.

⁴³Kumukokeshi ne tshianza tshikole, kadi utshine Nzambi webe.

⁴⁴Wewe neusumbe bahika balume ne bahika bakashi kudi bisamba bia bantu badi hehi nʼebe.

⁴⁵Udi mua kusumba bana ba benyi badi munkatshi muenu, ne bana ba benyi badi baledibue mu buloba buenu, bobo nebikale bahika benu.

⁴⁶Bobo nebikale bu buhianyi bua bana benu badi banulonda ku nyima bua kubahiana tshiendelele, nudi mua kuangata bahika benu munkatshi muabo, kadi kabakokeshi bana benu ba Bena Isalele ne tshianza tshikole.

⁴⁷Bialua muenyi wa munkatshi muenu mundi mubanji, ne bialua mukuenu udi ushikama hehi handi muntu muhele, biadihaneye kudiye anyi kudi mundi mukuabo wa mu diku diandi,

⁴⁸hadihaneye, badi mua kumuhikula, umue wa bana babo udi mua kumuhikula,

⁴⁹mansebʼandi anyi muana mulume wa mansebʼandi anyi muanʼabo mukuabo udi mua kumuhikula, bialueye muntu mubanji, yeye udi mua kudihikula.

⁵⁰Bobo nebabange ku tshidimu tshiakudihaneye nebabale bungi bua bidimu tô ne halua tshidimu tshia disanka dinene, mushinga wa kudihikula nʼau newikale bu bungi bua bidimu biakashaleye handi bu muena mudimu.

⁵¹Biashala bidimu bia bungi, neamuhingishile bu mushinga wa kudihikula nʼau tshituha tshia bintu biakamusumbabo babi.

⁵²Biashala bidimu bikese tô ne ku tshidimu tshia disanka dinene, bobo nebabibale, yeye neamuhingishile tshituha tshia kudihikula nʼatshi bu bungi bua bidimu biandi bidi bishala.

⁵³Yeye neikale handi bu muena mudimu ku tshidimu ku tshidimu kamukokeshi ne tshianza tshikole ku mesu kuebe.

⁵⁴Bikaleye kayi muhikudibue nunku, yeye neumuke halua tshidimu tshia disanka dinene, yeye ne bana bandi.

⁵⁵Bualu bua Bena Isalele badi bantu banyi banakahatula mu buloba bua Ejipitu meme ndi Yehowa, Nzambi wenu.